Harbiylikdan muallimlikka: boʻlajak Vatan himoyachilarining ustozi

Vatan himoyachisi boʻlish — sharafli burch. Yosh avlodni shu ruhda tarbiyalash esa ikki karra masʼuliyat talab etadi. Bugungi kunda Ixtisoslashtirilgan taʼlim muassasalari agentligi tizimidagi Amudaryo tuman ixtisoslashtirilgan maktabida faoliyat yuritayotgan zaxiradagi ofitser Davronbek Davletmurotov ana shunday yuksak masʼuliyatni oʻz zimmasiga olgan fidoyi ustozlardan biridir. U harbiy xizmatda orttirgan boy tajribasini taʼlim sohasiga tatbiq etib, yoshlarda vatanparvarlik, intizom va jasorat fazilatlarini shakllantirib kelmoqda.

Davronbek Davletmurotovning hayot yoʻli harbiy intizom va vatanga sadoqat muhitida kechgan. U 2004-yilda Toshkent oliy umumqoʻshin qoʻmondonlik bilim yurtini muvaffaqiyatli tamomlab, “Motooʻqchi qoʻshinlar taktik qoʻmondonligi” mutaxassisligini egallagan. Shundan soʻng Oʻzbekiston Qurolli Kuchlari saflarida turli masʼuliyatli lavozimlarda xizmat qildi.

Jumladan, 2004–2007-yillarda harbiy qismlardan birida maʼlumotlarni qayta ishlash yoʻnalishi boshligʻi, 2006–2007-yillarda 530-safarbarlik chaqiruv rezervi batalonida vzvod komandiri sifatida faoliyat yuritdi. 2007–2021-yillar davomida esa bir qator harbiy qismlarda kadrlar va saf boʻlinmasi boshligʻi lavozimlarida xizmat qilib, shaxsiy tarkib bilan ishlash, harbiy intizomni mustahkamlash borasida katta tajriba orttirdi.

2021-yildan boshlab Davronbek Davletmurotov oʻz faoliyatini taʼlim sohasiga bagʻishladi. Avvaliga Amudaryo tumanidagi 51-sonli maktabda ish boshlagan mutaxassis 2023-yildan buyon Amudaryo tuman ixtisoslashtirilgan maktabida faoliyat yuritmoqda. 2023–2025-yillarda u maktabda yoshlarni vatanparvarlik ruhida tayyorlash boʻyicha direktor oʻrinbosari — Harbiy chaqiriqqacha tayyorgarlik rahbari sifatida samarali mehnat qildi. 2025-yildan esa chaqiriqqa qadar boshlangʻich tayyorgarlik rahbari lavozimida faoliyatini davom ettirmoqda.

Ustozning talabchanligi va masʼuliyatli yondashuvi qisqa vaqt ichida oʻz samarasini berdi. Uning shogirdi, 2023-yilda 9-sinfda oʻqigan Sherali Qurbonboyev Fargʻona shahridagi “Temurbeklar maktabi”ga oʻqishga kirib, 2025-yilda mazkur taʼlim muassasasini muvaffaqiyatli tamomladi. Ayni paytda u Oʻzbekiston Respublikasi Jamoat xavfsizligi universiteti Chegara qoʻshinlari fakultetining 1-bosqichida tahsil olmoqda. Bu — ustoz va shogirdning birgalikdagi mehnati samarasidir.

Shuningdek, 2025-yilda maktabning 10-sinf oʻquvchilaridan tashkil topgan jamoa Prezident maktablari va ixtisoslashtirilgan maktablar oʻrtasida oʻtkazilgan “Turon yoʻlbarslari” harbiy-sport musobaqasida faxrli 3-oʻrinni qoʻlga kiritdi.

Davronbek Davletmurotov nafaqat namunali ofitser va ustoz, balki mehribon ota hamdir. U turmush oʻrtogʻi Zulxumor Artiqboyeva bilan birgalikda toʻrt nafar farzandni vatanga sadoqatli, komil insonlar etib tarbiyalamoqda.

Ixtisoslashtirilgan maktablarda chaqiriqqa qadar boshlangʻich tayyorgarlik rahbari hamda yoshlarni vatanparvarlik ruhida tayyorlash boʻyicha masʼul shaxs sifatida u oʻquvchilarda Vatanga muhabbat va fuqarolik burchini anglash tuygʻularini shakllantirish, harbiy-sport musobaqalariga tayyorlash, harbiy kasbga yoʻnaltirish, tuman Mudofaa ishlari boʻlimi va harbiy qismlar bilan hamkorlikda qator tadbirlarni tashkil etish ishlarini amalga oshirmoqda.

Davronbek Davletmurotovning faoliyati yana bir bor shuni tasdiqlaydiki, haqiqiy vatanparvarlik — bu shunchaki shior emas, balki tinimsiz mehnat, yuksak intizom va yoshlar qalbiga ezgu gʻoyalarni singdirishdir. Ana shu vazifani sharaf bilan oʻtayotgan lavhamiz qahramoni va yurtimizdagi barcha harbiylarni 14-yanvar – Vatan himoyachilari kuni va Oʻzbekiston Respublikasi Qurolli kuchlari tashkil qilinganining 34 yilligi bilan chin qalbimizdan tabriklab, ularning ishlariga omad va zafarlar, oilalariga esa tinchlik-xotirjamlik tilab qolamiz!