AMUDARYoDA VATAN HIMOYaChILARI KUNI VA QUROLLI KUChLARNING 34-YILLIGI KENG NIShONLANDI

Vatanni himoya qilish har bir fuqaro uchun eng ulugʻ va sharafli burch hisoblanadi. Bu burch faqat harbiy xizmatni emas, balki ona yurtga muhabbat, tinchlik va barqarorlikni asrash yoʻlidagi fidokorona mehnatni ham oʻz ichiga oladi. Mamlakatimizda 14-yanvar — Vatan himoyachilari kuni hamda Oʻzbekiston Respublikasi Qurolli Kuchlari tashkil etilganining 34-yilligi munosabati bilan oʻtkazilayotgan bayram tadbirlari ana shu yuksak gʻoyalarni tarannum etmoqda. Shu qutlugʻ sana munosabati bilan Amudaryo tumani madaniyat markazida tashkil etilgan tantanali marosim ham mazmun-mohiyati, koʻlami va taʼsirchanligi bilan alohida ahamiyat kasb etdi.

Bayram tadbiri avvalida madaniyat markazi foyesida tashkil etilgan koʻrgazma ishtirokchilarda katta taassurot qoldirdi. Koʻrgazmada kuch va aql, jismoniy tayyorgarlik va maʼnaviy kamolot uygʻun holda namoyon boʻldi. Harbiy qismlar tomonidan taqdim etilgan zamonaviy qurol-aslahalar, aloqa vositalari va turli harbiy anjomlar, ayniqsa, yoshlar va maktab oʻquvchilarini oʻziga jalb etdi. Ular jangovar texnika va vositalar bilan yaqindan tanishib, bugungi kunda Milliy Armiyamiz qanday yuksak salohiyatga ega ekanini oʻz koʻzlari bilan koʻrdilar.

Koʻrgazmaning ikkinchi qismi maʼnaviy-maʼrifiy mazmunga ega boʻlib, tuman Maʼnaviyat va maʼrifat markazi hamda Axborot-kutubxona markazi tomonidan taqdim etilgan tarixiy, ilmiy va badiiy adabiyotlardan iborat koʻrgazma tashkil etildi. Bu yerda “Bilagi zoʻr birni yiqar, bilimi zoʻr mingni” degan xalq hikmatining hayotiy ifodasi namoyon boʻlib, yoshlarga haqiqiy vatanparvarlik faqat jismoniy kuch bilan emas, balki bilim va tafakkur bilan ham bogʻliq ekani yana bir bor uqtirildi.

Tadbirning rasmiy qismida Amudaryo tumani hokimining birinchi oʻrinbosari Faxriddin Yusupov, tuman prokurori Bahrom Masharipov, Amudaryo tuman Mudofaa ishlari boʻlimi boshligʻi Shuhrat Mamatov va boshqa mutasaddilar soʻzga chiqib, barcha Vatan himoyachilarni bayram bilan samimiy qutladilar. Ular oʻz chiqishlarida Milliy Armiyamiz mamlakat chegaralari daxlsizligi, xalqimizning tinch va osoyishta hayotini taʼminlashda hal qiluvchi kuchga aylanganini alohida taʼkidladilar. Shuningdek, soʻnggi yillarda Qurolli Kuchlar sohasida amalga oshirilayotgan islohotlar natijasida harbiy xizmatchilarning nufuzi va jamiyatdagi oʻrni yanada mustahkamlangani qayd etildi.

Taʼkidlanganidek, oʻtgan 2025-yilda Amudaryo tumani Mudofaa ishlari boʻlimi tomonidan “Umumiy harbiy majburiyat va harbiy xizmat toʻgʻrisida”gi Qonuning 18-moddasiga asosan 1808 nafar yoshlarimiz harbiy roʻyxatga qabul kilingan. Muddatli harbiy xizmat va safarbarlik chaqiruvi rezerviga yuborish boʻyicha yillik reja muddatidan oldin bajarilib, koʻrsatkich 115 foizni tashkil etgan. “Mahallabay” tizimi asosida 18–27 yoshdagi 9 400 nafar chaqiriluvchi va ularning oilalari bilan suhbatlar oʻtkazilib, salomatlik va ijtimoiy masalalar oʻrganilgan.

Shuningdek, tumandagi barcha maktablarning 11-sinflarida tahsil olayotgan 1808 nafar oʻquvchi uchun Nukus dala oʻquv maydonida jangovar qurollardan amaliy oʻq otish mashgʻulotlarini oʻtkazish rejalashtirilgan. Yoshlarni harbiy taʼlimga yoʻnaltirish boʻyicha 7 nafar yoshlar “Temurbeklar maktabi”ga, 5 nafar yoshlar esa oliy harbiy taʼlim muassasalariga qabul qilingan. Ayni paytda 122 nafar amudaryolik yigitlar mamlakatimizning turli hududlarida muddatli harbiy xizmatni sharaf bilan oʻtab kelmoqda.

Amudaryo tuman Mudofaa ishlari boʻlimi boshligʻi, mayor Shuhrat Mamatovning maʼruzasida 2026-yilgi chaqiruv mavsumiga tayyorgarlik rejalari ham maʼlum qilindi. Jumladan, yangi mavsumda 353 nafar yigitni muddatli harbiy xizmatga, 650 nafarini esa safarbarlik chaqiruvi rezerviga yuborish boʻyicha saralash ishlari boshlab yuborilgan. Demak, joriy yilda ham har tomonlama kuchli, sogʻlom va yetuk amudaryolik yigitlar Vatan sarhadlarini himoya qilish va Milliy Armiyamiz qudratini yuksaltirish uchun harbiy xizmatga kirishadilar.

Tantananing eng hayajonli pallalarida mudofaa va xavfsizlik sohasida fidokorona xizmat qilib kelayotgan bir guruh soha faxriylari tuman hokimligining Faxriy yorliqlari hamda qimmatbaho bayram sovgʻalar bilan taqdirlandilar. Bu eʼtirof harbiylar uchun katta ragʻbat va masʼuliyat ramzi boʻldi.

Bayram tadbiri tuman madaniyat boʻlimi sanʼatkorlari tomonidan tayyorlangan mazmunli kontsert dasturi bilan yakunlandi. Vatan, tinchlik va mardlikni madh etuvchi qoʻshiq va kuylar barcha ishtirokchilarga koʻtarinki ruh, faxr va iftixor bagʻishladi.

Chindan ham, bugun mamlakatimizda harbiy xizmat burchini bajarish har bir yigit uchun ulkan sharaf hisoblanadi. Armiya shunchaki harbiy xizmat emas, balki u insonda Vatanga muhabbat, xalq va yurt oldidagi burch hissini mustahkamlaydi. Harbiy xizmatni oʻtab kelgan yoshlar hayotga jiddiyroq qaraydi, maqsad sari qatʼiyat bilan intiladi. Shuningdek, xizmat davomida orttirilgan tajriba kelgusida mehnat faoliyatida, oila va jamiyatda oʻz oʻrnini topishga xizmat qiladi. Harbiy xizmat jarayonida yigitlar jismoniy va ruhiy jihatdan chiniqadi, qiyin vaziyatlarda toʻgʻri qaror qabul qilishni, jamoada ishlashni va qonun-qoidalarga qatʼiy rioya etishni oʻrganadi.

Shu sababli ham bugungi kunda harbiy xizmat — mardlik, sabr-toqat va sadoqat ramzi boʻlib, yigitlarni yetuk, vatanparvar shaxs sifatida kamolga yetkazishda muhim maktab vazifasini oʻtamoqda.

Fursatdan foydalanib, 14-yanvar — Vatan himoyachilari kuni munosabati bilan ona yurt tinchligi va xalq osoyishtaligini taʼminlash yoʻlida sidqidildan xizmat qilayotgan barcha harbiy xizmatchilarni, soha xodimlari hamda faxriylarni, kelgusida Milliyy Armiya safida xizmat qilishni maqsad qilgan yoshlarni samimiy tabriklaymiz!

Ushbu qutlugʻ sana munosabati bilan Vatan himoyachilariga mustahkam salomatlik, oilaviy tinchlik, xizmat faoliyatida muvaffaqiyatlar, yurtimiz osmonining doimo musaffo boʻlishini tilab qolamiz.