“TOʻY KORTEJI”DA YOʻL HARAKATI QOIDALARINI BUZGANLARGA NISBATAN ChORA KOʻRILDI

Bugungi kunda yoʻl harakati xavfsizligini taʼminlash, inson hayoti va sogʻligʻini turli koʻngilsiz hodisalardan asrash ichki ishlar organlari xodimlari oldida turgan eng ustuvor vazifalardan biridir. Afsuski, ayrim hollarda xursandchilik kunlarida, xususan, toʻy marosimlarida oʻzini koʻz-koʻz qilish, "shov-shuv" koʻtarish maqsadida yoʻl harakati qoidalarini qoʻpol ravishda buzayotgan haydovchilar ham uchrab turibdi. Amudaryo tumani Ichki ishlar boʻlimi Yoʻl harakati xavfsizligi boʻlimi xodimlari tomonidan oʻtkazilgan navbatdagi reyd tadbirlari aynan shunday huquqbuzarliklarga qarshi qaratildi.

Yaqinda ijimoiy tarmoqlarda Amudaryo tumanidagi toʻylardan birida tasvirga olingan videolavha tarqalib, keng muhokamalarga sabab boʻlgan edi. Videoda "Malibu" rusumidagi bir nechta avtomashinalar guruh boʻlib harakatlanib, "Toʻy sayli" bahonasida koʻchani toʻliq egallab olgani, boshqa harakat ishtirokchilariga qasddan xalaqit berib, avariyaviy va xavfli vaziyatlarni yuzaga keltirgani aks etgan edi.

Bunday holatlar nafaqat yoʻl harakati madaniyatiga zid, balki oddiy yoʻlovchilar, tez tibbiy yordam mashinalari va boshqa zarur xizmatlarning harakatiga jiddiy toʻsiq boʻlishi bilan ham xavotirlidir. Shu bois, Amudaryo tumani Ichki ishlar boʻlimi Yoʻl harakati xavfsizligi boʻlimi xodimlari tomonidan vaziyatga tezkorlik bilan munosabat bildirilib, maxsus reyd tadbiri tashkil etildi.

Reyd davomida videolavhada aks etgan va jamoat tartibini buzgan haydovchilarning shaxsiga aniqlik kiritildi. Guruh boʻlib harakatlanish qoidalarini qoʻpol ravishda buzgan, yoʻllarda sunʼiy tirbandlik hosil qilgan ushbu fuqarolar boshqaruvidagi "Malibu" va boshqa rusumdagi transport vositalari toʻxtatildi.

Qonun barcha uchun barobar. Huquqbuzar haydovchilarga nisbatan Oʻzbekiston Respublikasi Maʼmuriy javobgarlik toʻgʻrisidagi kodeksning tegishli moddalariga asosan maʼmuriy bayonnomalar rasmiylashtirildi. Ular boshqaruvidagi avtomashinalar esa vaqtincha saqlash uchun jarima maydonchasiga joylashtirildi. Bu chora – boshqa haydovchilarga, ayniqsa, yoshlarga saboq boʻlishi lozim.

Mutaxassislarning taʼkidlashicha, "kortej" boʻlib, guruh tarkibida harakatlanish yoʻl-transport hodisalari kelib chiqish xavfini bir necha barobar oshiradi. Bitta mashinaning keskin toʻxtashi yoki boshqaruvni yoʻqotishi zanjirli reaktsiyaga sabab boʻlib, oqibati ayanchli yakunlanishi mumkin. Toʻy – yaxshi niyatlar bilan qilinadigan tadbir, uni fojiaga aylantirishga esa hech kimning haqqi yoʻq.

Ushbu tadbir davomida yoʻl-patrul xizmati inspektorlari tomonidan faqat jazolash emas, balki profilaktik tushuntirish ishlariga ham alohida eʼtibor qaratildi. Boshqa haydovchilar bilan oʻtkazilgan suhbatlarda yoʻllarda oʻzaro hurmat, qoidalarga qatʼiy rioya qilish va yoʻl madaniyatini saqlash, guruh boʻlib harakatlanishdan tiyilish lozimligi tushuntirildi.

Yoʻlda har bir qadam ehtiyotkorlik, har bir harakat masʼuliyat bilan amalga oshirilishi lozim. Avtomobil ruliga oʻtirgan inson faqat oʻz hayoti emas, boshqalarning ham taqdiri uning harakatlariga bogʻliq ekanini unutmasligi kerak. Chunki birgina beparvolik – bir umrning xazon boʻlishiga olib kelishi mumkin.

Amudaryo tumani Amudaryo tumani Ichki ishlar boʻlimi Yoʻl harakati xavfsizligi boʻlimi xodimlari tomonidan oʻtkazilayotgan bunday nazorat tadbirlari doimiy ravishda davom ettiriladi. Maqsad – jarima undirish emas, balki yoʻllardagi tartibni saqlash va eng oliy qadriyat boʻlgan inson hayotini asrashdir.

Shunday ekan, barchamiz yoʻllarda masʼuliyatli boʻlaylik, zero, uyda bizni oilamiz va yaqinlarimiz kutmoqda.