“ТЎЙ КОРТЕЖИ”ДА ЙЎЛ ҲАРАКАТИ ҚОИДАЛАРИНИ БУЗГАНЛАРГА НИСБАТАН ЧОРА КЎРИЛДИ

Бугунги кунда йўл ҳаракати хавфсизлигини таъминлаш, инсон ҳаёти ва соғлиғини турли кўнгилсиз ҳодисалардан асраш ички ишлар органлари ходимлари олдида турган энг устувор вазифалардан биридир. Афсуски, айрим ҳолларда хурсандчилик кунларида, хусусан, тўй маросимларида ўзини кўз-кўз қилиш, "шов-шув" кўтариш мақсадида йўл ҳаракати қоидаларини қўпол равишда бузаётган ҳайдовчилар ҳам учраб турибди. Амударё тумани Ички ишлар бўлими Йўл ҳаракати хавфсизлиги бўлими ходимлари томонидан ўтказилган навбатдаги рейд тадбирлари айнан шундай ҳуқуқбузарликларга қарши қаратилди.

Яқинда ижимоий тармоқларда Амударё туманидаги тўйлардан бирида тасвирга олинган видеолавҳа тарқалиб, кенг муҳокамаларга сабаб бўлган эди. Видеода "Malibu" русумидаги бир нечта автомашиналар гуруҳ бўлиб ҳаракатланиб, "Тўй сайли" баҳонасида кўчани тўлиқ эгаллаб олгани, бошқа ҳаракат иштирокчиларига қасддан халақит бериб, авариявий ва хавфли вазиятларни юзага келтиргани акс этган эди.

Бундай ҳолатлар нафақат йўл ҳаракати маданиятига зид, балки оддий йўловчилар, тез тиббий ёрдам машиналари ва бошқа зарур хизматларнинг ҳаракатига жиддий тўсиқ бўлиши билан ҳам хавотирлидир. Шу боис, Амударё тумани Ички ишлар бўлими Йўл ҳаракати хавфсизлиги бўлими ходимлари томонидан вазиятга тезкорлик билан муносабат билдирилиб, махсус рейд тадбири ташкил этилди.

Рейд давомида видеолавҳада акс этган ва жамоат тартибини бузган ҳайдовчиларнинг шахсига аниқлик киритилди. Гуруҳ бўлиб ҳаракатланиш қоидаларини қўпол равишда бузган, йўлларда сунъий тирбандлик ҳосил қилган ушбу фуқаролар бошқарувидаги "Malibu" ва бошқа русумдаги транспорт воситалари тўхтатилди.

Қонун барча учун баробар. Ҳуқуқбузар ҳайдовчиларга нисбатан Ўзбекистон Республикаси Маъмурий жавобгарлик тўғрисидаги кодекснинг тегишли моддаларига асосан маъмурий баённомалар расмийлаштирилди. Улар бошқарувидаги автомашиналар эса вақтинча сақлаш учун жарима майдончасига жойлаштирилди. Бу чора – бошқа ҳайдовчиларга, айниқса, ёшларга сабоқ бўлиши лозим.

Мутахассисларнинг таъкидлашича, "кортеж" бўлиб, гуруҳ таркибида ҳаракатланиш йўл-транспорт ҳодисалари келиб чиқиш хавфини бир неча баробар оширади. Битта машинанинг кескин тўхташи ёки бошқарувни йўқотиши занжирли реакцияга сабаб бўлиб, оқибати аянчли якунланиши мумкин. Тўй – яхши ниятлар билан қилинадиган тадбир, уни фожиага айлантиришга эса ҳеч кимнинг ҳаққи йўқ.

Ушбу тадбир давомида йўл-патруль хизмати инспекторлари томонидан фақат жазолаш эмас, балки профилактик тушунтириш ишларига ҳам алоҳида эътибор қаратилди. Бошқа ҳайдовчилар билан ўтказилган суҳбатларда йўлларда ўзаро ҳурмат, қоидаларга қатъий риоя қилиш ва йўл маданиятини сақлаш, гуруҳ бўлиб ҳаракатланишдан тийилиш лозимлиги тушунтирилди.

Йўлда ҳар бир қадам эҳтиёткорлик, ҳар бир ҳаракат масъулият билан амалга оширилиши лозим. Автомобиль рулига ўтирган инсон фақат ўз ҳаёти эмас, бошқаларнинг ҳам тақдири унинг ҳаракатларига боғлиқ эканини унутмаслиги керак. Чунки биргина бепарволик – бир умрнинг хазон бўлишига олиб келиши мумкин.

Амударё тумани Амударё тумани Ички ишлар бўлими Йўл ҳаракати хавфсизлиги бўлими ходимлари томонидан ўтказилаётган бундай назорат тадбирлари доимий равишда давом эттирилади. Мақсад – жарима ундириш эмас, балки йўллардаги тартибни сақлаш ва энг олий қадрият бўлган инсон ҳаётини асрашдир.

Шундай экан, барчамиз йўлларда масъулиятли бўлайлик, зеро, уйда бизни оиламиз ва яқинларимиз кутмоқда.