"OQ OLTIN" OVULIDA OʻTKAZILGAN SAYYoR QABULDA AHOLI MUAMMOLARI TINGLANDI

Bugungi kunda "Xalq davlat idoralariga emas, balki davlat idoralari xalqimizga xizmat qilishi kerak" degan ezgu tamoyil hayotimizning asosiy qoidasiga aylandi. Rahbarlarning ish xonalaridan chiqib, eng chekka hududlarga borishi, odamlarning dardini eshitishi va muammolariga joyida yechim topishi — boshqaruv tizimidagi islohotlarning amaliy natijasidir. Amudaryo tumani hokimi Sobir Xoʻjametovning "Oq oltin" ovulida oʻtkazgan navbatdagi sayyor qabuli ham ana shunday ochiq muloqot ruhida boʻlib oʻtdi.

Ovul hududidagi 7-sonli umumtaʼlim maktabi binosida tashkil etilgan ushbu uchrashuvda tuman sektor rahbarlari, Oʻzbekiston Mahallalar uyushmasi Amudaryo tumani boʻlimi boshligʻi Alisher Yoʻldashev, tegishli korxona va tashkilotlar mutasaddilari hamda keng jamoatchilik vakillari ishtirok etdi. Maqsad bitta — "Oq oltin" ovuli aholisini qiynayotgan masalalarni oʻrganish va ularni bartaraf etish choralarini koʻrish.

Sayyor qabul davomida fuqarolar tomonidan koʻtarilgan masalalar hududning bugungi kundagi real manzarasini va ehtiyojlarini namoyon etdi. Xususan, aholi vakillari tomonidan eng koʻp murojaat qilingan mavzulardan biri — bu infratuzilma masalasi boʻldi. Ovul ichidagi yoʻllarning taʼmirtalabligi va ichki kanallar ustidagi koʻpriklarning eskirgani aholi harakatlanishida qiyinchiliklar tugʻdirayotgani aytib oʻtildi. Taʼkidlash joizki, qishloq joylarda yoʻl va koʻprik — bu faqat transport qatnovi emas, balki aholi farovonligi, bolalarning maktabga, bemorlarning shifoxonaga vaqtida yetib borishi demakdir. Shu bois, ushbu masala hokimlik tomonidan ustuvor vazifa sifatida qayd etildi.

Shuningdek, uchrashuvda ijtimoiy sohaga oid muhim takliflar ham ilgari surildi. "Oq oltin" ovulida demografik oʻsish kuzatilayotgani sababli, yangi maktabgacha taʼlim tashkiloti qurishga boʻlgan ehtiyoj kun tartibiga chiqmoqda. Yosh onalar va ovul faollari bolalarni maktabga tayyorlash va ularga sifatli taʼlim-tarbiya berishda zamonaviy bogʻchaning oʻrni beqiyos ekanligini taʼkidlab, bu borada amaliy yordam soʻradilar.

Kuz-qish mavsumi davom etayotgan ayni paytda energiya resurslari taʼminoti ham chetda qolmadi. Aholi tomonidan koʻmir mahsulotlariga boʻlgan talabning yuqoriligi va taʼminotdagi ayrim uzilishlar boʻyicha murojaatlar bildirildi. Bu masala bevosita xonadonlardagi issiqlik va aholi salomatligi bilan bogʻliq boʻlgani uchun mutasaddilarga tezkor topshiriqlar berildi.

Sayyor qabulning yana bir dolzarb mavzusi — aholi bandligi boʻldi. Ishsiz fuqarolarni doimiy daromad manbai bilan taʼminlash, ularni kasb-hunarga yoʻnaltirish va tadbirkorlikka jalb qilish masalalari atroflicha muhokama qilindi. Tuman hokimi har bir ishsiz fuqaro bilan "mahallabay" ishlash, ularga mavjud boʻsh ish oʻrinlarini taklif etish va oʻzini-oʻzi band qilish uchun sharoit yaratish lozimligini taʼkidladi.

Qabul davomida koʻtarilgan har bir murojaat Sobir Xoʻjametov tomonidan diqqat bilan tinglandi. Ayrim muammolar masalan, koʻmir taʼminoti yoki kichik taʼmirlash ishlari boʻyicha shu joyning oʻzida masʼullarga aniq koʻrsatmalar berilib, ijrosi nazoratga olindi. Katta mablagʻ va vaqt talab qiladigan, yaʼni bogʻcha qurilishi, yoʻllarni asfaltlash kabi masalalar yuzasidan esa aniq muddatli "Yoʻl xaritasi" ishlab chiqish va tegishli dasturlarga kiritish boʻyicha qaror qabul qilindi.

Xulosa oʻrnida aytganda, "Oq oltin"da oʻtgan mazkur uchrashuv rahbar va xalq oʻrtasidagi ishonch koʻprigini mustahkamlashga xizmat qildi. Aholi oʻz muammolari eʼtiborsiz qolmasligiga, tuman rahbariyati ularning farovonligi yoʻlida qaygʻurayotganiga yana bir bor amin boʻldi. Zero, xalq roziligi — eng oliy maqsaddir.