El xizmatidagi inson

Tumanimizda el xizmati uchun jonini fido qilishga shay insonlar juda koʻp. Shaxsan men shunday insonlardan biri Saʼdulla aka Davlatboyev deb bilaman.

Saʼdulla Davlatboyev 1948-yilda Qipchoq ovulida dehqon oilasida tugʻildi. Otasi Davlatboy Ollaniyozov el-yurtning har bir ishiga boshchilik qilib, hurmatli oqsoqol sifatida "Koʻka” nomi bilan mashhur edi. Onasi Qurbongul mehnatkash, ilgʻor pillakor sifatida elga tanildi.

Saʼdulla Davlatboyev 1967-yilda Nukus qishloq xoʻjaligi texnikumining mexanizatsiya boʻlimini muvaffaqiyatli tamomlab, tumandagi "Uz selxoztexnika” korxonasida slesar boʻlib ish boshladi. U korxonada turli vazifalarda ishlab, mehnatsevarligi bilan barchaning hurmatini qozondi.

1985-yilda shu korxonaning rahbari etib tayinlandi. 1987-yilda Toshkent xalq xoʻjaligi instituti Planlashtirish fakultetini sirtdan bitirdi. Tajribali mutaxassisni tuman rahbariyati 1995-yilda sobiq Qipchoq shirkat xoʻjaligiga rais etib tayinlashdi. U 1997-yilda tuman ishlab chiqarish va taʼminot korxonasi direktori, 2003-yildan boshlab Berdaq fermerlar uyushmasining raisi lavozimlarida ishladi. 2004-yildan Qipchoq oʻrmon xoʻjaligi direktori lavozimida ishlab, nafaqaga chiqdi.

Mehnatkash inson qayerda boʻlmasin, oʻzidan yaxshi nom qoldirishi barchaga ayon. U "Uzselxoz-texnika” korxonasiga rahbarlik qilgan davrda qishloqda obodonlashtirish ishlari rivojlandi. Qipchoq ovuli gazlashtirildi, yordamchi xoʻjaliklar, yangi tsexlar barpo etildi.

U rahbarlik qilgan davrda Qipchoq shirkat xoʻjaligida koʻrkam mevali bogʻ barpo etildi, Berdaq fermerlar uyushmasida uyushma maʼmuriy binosi, biolaboratoriya, bolalar bogʻchasi qayta taʼmirlanib, ishga tushirildi. Qipchoq oʻrmon xoʻjaligida esa bogʻ, tutzorlar bunyod etildi.

Saʼdulla Davlatboyev bir necha bor xalq deputatlarituman Kengashining deputati etib saylandi. Yuqori tashkilotlar tomonidan "Faxriy yorliq”lar bilan mukofotlandi.

Tumanda koʻplab yuqori lavozimlarda ishlagan va ishlab kelayotgan Maqsud Toirov (marhum) Oʻrozboy Safarboyev, Bozorboy Otajonov, Jangaboy Eshmurodov, Soatboy Xidirboyevlar Saʼdulla akaning eng yaqin shogirdlari hisoblanishadi.

Bugungi kunda Saʼdulla aka 8 nafar farzandning otasi, 17 nevara, 4 chevaraning suyukli bobosi.

Dehqon farzandi emasmi, nafaqada boʻlishiga qaramay, bogʻ yaratishdan, sabzavot-poliz ekinlarini ekib, tarbiyalashdan charchamaydi. Farzandlari ham ota izidan borib, mehnatkash boʻlib voyaga yetishdi. Saʼdulla aka yaqinda yana bir xayrli ishga qoʻl urdi. Qishloq markazida yaxshi niyat bilan "Davlatboyev Faxriddin” nomli aholiga savdo va maishiy xizmat koʻrsatish shoxobchasi qurilishini boshladi. Shoxobcha orqali aholiga oshxona, mini market, tikuv tsexi, yoshlar saloni, foto salon, poyafzal taʼmirlash xizmatlari koʻrsatiladi. Shu orqali Saʼdulla aka qishloq yoshlarini yangi ish oʻrinlari bilan taʼminlashni maqsad qilib qoʻygan.

Ha, Saʼdulla Davlatboyev ana shunday fidoyi odam!

Oʻrozali REYIMOV.