“YoNGʻIN XAVFSIZLIGI OYLIGI”: BAYRAM OLDIDAN HUShYoRLIK VA TAYYoRGARLIK SINOVDAN OʻTKAZILDI

Yil yakunlanib, barchamiz intiqib kutadigan Yangi yil bayrami yaqinlashgani sari yurtimizda koʻtarinki kayfiyat hukm surmoqda. Xonadonlardagi shodiyonalar, bezatilgan archalar va bayram tadbirlari, shubhasiz, dillarga quvonch bagʻishlaydi. Biroq, bunday kunlar quvonchi avvalo, osoyishtalik va xavfsizlikka bogʻliq. Shu bois, Qoraqalpogʻiston Respublikasi, xususan, Amudaryo tumanida bayram oldidan xavfsizlik choralari kuchaytirilgan tartibda olib borilmoqda.

Maʼlumki, qish mavsumida isitish moslamalaridan foydalanishga boʻlgan ehtiyojning ortishi, shuningdek, bayram kunlarida pirotexnika vositalari va turli yoritgichlardan foydalanish yongʻin xavfini yuzaga keltirishi mumkin. Ushbu omillarni inobatga olgan holda, Qoraqalpogʻiston Respublikasi Favqulodda vaziyatlarning oldini olish va ularni bartaraf etish boʻyicha hududiy komissiyasining 2025-yil 28-noyabrdagi tegishli bayoni hamda Amudaryo tumani hokimining 2025-yil 29-noyabrdagi topshirigʻi ijrosini taʼminlash maqsadida tumanda 2025-yil 1-noyabrdan 30-dekabrga qadar “Yongʻin xavfsizligi oyligi” eʼlon qilingan edi.

Ayni kunlarda mazkur oylik doirasida tuman hududida favqulodda vaziyatlarning oldini olishga qaratilgan kompleks chora-tadbirlar amalga oshirilmoqda. Yaqinda Amudaryo tumani Favqulodda vaziyatlar boʻlimi hamda tumandagi boshqa mutasaddi tashkilotlar hamkorligida oʻtkazilgan keng koʻlamli oʻquv-amaliy mashgʻulotlar ana shu tizimli ishlarning uzviy davomi boʻldi.

Tumanda joylashgan harbiy qismlardan birida tashkil etilgan koʻrgazmali uchrashuv harbiy xizmatchilar va ularning oila aʼzolari uchun haqiqiy mahorat maktabiga aylandi. Targʻibot tadbirida nafaqat yongʻin xavfsizligi, balki qish mavsumining dolzarb muammosi boʻlgan is gazidan zaharlanishning oldini olish, sifatsiz pirotexnika vositalaridan foydalanmaslik boʻyicha tushuntirishlar berildi.

Harbiy qismda oʻtkazilgan maxsus-taktik oʻquv mashgʻulotlarida ham asosiy eʼtibor bayram tadbirlari oʻtkaziladigan aholi gavjum joylarda yuzaga kelishi mumkin boʻlgan noxush holatlarning oldini olishga qaratildi. Mutaxassislarning taʼkidlashicha, favqulodda vaziyatlarda inson hayotini saqlab qolishda "oltin soat" qoidasi va vahimaga tushmaslik muhim ahamiyatga ega. Shu bois, mashgʻulotlar davomida ommaviy tadbirlar chogʻida yongʻin sodir boʻlganda qanday harakat qilish, odamlarni binolardan xavfsiz evakuatsiya qilish hamda jabrlanganlarga tezkor birinchi tibbiy yordam koʻrsatish boʻyicha maxsus yoʻriqnomalar amalda sinab koʻrildi.

Tadbir doirasida tuman Favqulodda vaziyatlar boʻlimi xodimlari tomonidan zamonaviy yongʻin oʻchirish texnikalari, maxsus qutqaruv asbob-anjomlari koʻrgazmasi tashkil etildi. Mutaxassislar texnikalarning imkoniyatlari haqida batafsil maʼlumot berib, ularni ishga tushirish jarayonlarini namoyish etdilar.

Tumanning bosh archasi oʻrnatilgan maydonda ham amaliy mashgʻulotlar tashkil qilindi. Turli stsenariylar, jumladan, "shartli yongʻin" va "qutqaruv operatsiyasi" asosida tashkil etilgan taktik mashqlarda masʼul xizmatlarning oʻzaro hamkorligi, xabar berish tizimining tezkorligi va voqea joyiga yetib borish vaqti nazoratdan oʻtkazildi. Jabrlanganlarga tez tibbiy yordam koʻrsatish boʻyicha ham amaliy koʻnikmalar sinovdan oʻtkazildi. Bunday mashqlar turli idora vakillarining "soat mexanizmi"dek aniq va muvofiqlashgan holda ishlashini taʼminlashga xizmat qiladi.

Oʻquv mashgʻulotlari davomida shartli ravishda hosil qilingan olov oʻchogʻini bartaraf etish jarayoniga oʻt oʻchiruvchilar bevosita jalb qilindi. Ishtirokchilarga birlamchi oʻt oʻchirish vositalaridan toʻgʻri foydalanish, yongʻinni boshlangʻich pallasida jilovlash usullari oʻrgatildi. Bunday koʻnikmalar har bir fuqaro uchun hayotiy zarurat hisoblanadi. Shuningdek, bayram kunlarida jamoat joyida bezorilik, oʻgʻirlik harakatlarini sodir qilgan shartli huquqbuzar “Milliy gvardiya”ning qoʻriqlash boʻlimi xodimlari tomonidan qoʻlga olindi. Qolaversa, tabiiy gaz va elektr energiyasi taʼminoti korxonalari xodimlari ham bayram kunlarida favqulodda holatlarning oldini olish, energiya manbalarining uzluksiz yetkazib berilishini taʼminlash boʻyicha amaliy mashgʻulot oʻtkazdilar.

Amudaryo tumanida davom etayotgan “Yongʻin xavfsizligi oyligi” tadbirlari shunchaki hisobot uchun emas, balki aholi xavfsizligini real taʼminlash, fuqarolarda favqulodda vaziyatlarda toʻgʻri harakatlanish madaniyatini shakllantirishga xizmat qilmoqda. Zero, bayramlar tinchlik va osoyishtalik bilan fayzlidir.