Kurash boʻyicha Amudaryo tumani ochiq birinchiligi musobaqalari oʻtkazildi
Oʻsib kelayotgan yosh avlodni har tomonlama yetuk va sogʻlom qilib voyaga yetkazishda mamlakatimizda amalga oshirilayotgan sport-sogʻlomlashtirish tadbirlari muhim ahamiyatga ega. Chunki mazkur tadbirlar orqali sportsevar yoshlar oʻrtasida oʻzlari qiziqqan yoʻnalishlar boʻyicha jiddiy shugʻullanish, bu boradagi kuch va imkoniyatlarini amalda namoyon etishga boʻlgan qiziqish va intilishlari ortib, turli sport musobaqalarida yutuqlarga erishishlariga zamin yaratiladi.
Amudaryo tumanida ham yoshlar sportini rivojlantirish, ayniqsa, umumtaʼlim maktablari oʻquvchilari oʻrtasida sportning olimpiya turlari boʻyicha musobaqalar tashkil etish orqali kuchli, iqtidorli va irodali sportchilarni aniqlash hamda ularni hududiy, mamlakat va xalqaro miqyosdagi musobaqalarga tayyorlash borasidagi amaliy ishlar yaxshi yoʻlga qoʻyilgan. Shu bois, amudaryolik sportchilar orasida turli xalqaro musobaqalar va turnirlar gʻoliblari, Osiyo va jahon chempionatlari sovrindorlari, xalqaro olimpiada oʻyinlari ishtirokchilari yetishib chiqmoqda.
Yaqinda Oʻzbekiston Respublikasi Konstitutsiyasi qabul qilingan kun munosabati bilan sportning kurash turi boʻyicha 2011-2012 hamda 2014-2015-yillarda tugʻilgan oʻsmir yoshlar oʻrtasida oʻtkazilgan Amudaryo tumani ochiq birinchiligi musobaqalari ham iqtidorli, oʻziga ishongan va kuchli sportsevar yoshlarni aniqlashga qaratilgani bilan muhim ahamiyat kasb etdi.
Yuqori saviyada tashkillashtirilgan va qizgʻin taassurotlarga boy tarzda oʻtkazilgan musobaqalarda respublikamizning barcha tumanlaridan 300 nafarga yaqin kurash sporti bilan shugʻullanuvchi oʻsmir yoshdagi oʻgʻil va qiz bolalar ishtirok etdilar.
Musobaqalarning halollik va shaffoflik asosida oʻtkazilishini taʼminlash maqsadida ishtirokchilarga murabbiylari tomonidan oldindan musobaqani oʻtkazish boʻyicha ishlab chiqilgan Nizom talablari yuzasidan zarur tushunchalar berilib, kurash sportining qoidalari boʻyicha bilim va koʻnikmalari sinovdan oʻtkazildi va barcha ishtirokchilar musobaqada yuqori darajadagi tayyorgarlik bosqichlaridan oʻtgan holda qatnashdilar.
Doʻstona vaziyatda, har bir sportchining qalbida gʻalabaga boʻlgan ishonch tuygʻusi bilan oʻtgan musobaqalar ishtirokchilar uchun haqiqiy bayramga aylanib ketdi. Ayniqsa, oʻsmir qizlar oʻrtasidagi kurash bahslari yorqin taassurotlarga boy boʻldi. Ular nafaqat sportda oʻzaro bellashdilar, balki bir-birlariga nisbatan doʻstona va samimiy munosabatlarini ham amalda namoyon etishib, gʻolib sportchilarni chin dildan muborakbod etdilar.
Musobaqalar yakunida gʻolib va sovrindorlar Amudaryo tumani sport maktabi tomonidan diplom va medallar bilan taqdirlandilar.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
