3-dekabr – Xalqaro nogironlar kuni Amudaryoda keng nishonlandi

Har yili 3-dekabr kuni butun dunyo boʻylab insoniyatning mehr-oqibatga boʻlgan yuksak eʼtiborini ifodalovchi sanalardan biri – Xalqaro nogironlar kuni nishonlanadi. Bu sana Birlashgan Millatlar Tashkiloti Bosh Assambleyasining 1992-yil 14-oktyabrdagi rezolyutsiyasiga muvofiq joriy etilgan boʻlib, jamiyatda nogironligi boʻlgan shaxslarning huquqlari, imkoniyatlari va ijtimoiy faolligini qoʻllab-quvvatlashga qaratilgani bilan alohida ahamiyat kasb etadi.

Bugun nogironligi boʻlgan insonlarga koʻmak berish, ularni jamiyatning toʻlaqonli aʼzosi sifatida qoʻllab-quvvatlash nafaqat davlat siyosati, balki har birimizning insoniy burchimizga aylangan.

Amudaryo tumanida ham mazkur sana munosabati bilan katta bayramona tadbir tashkil qilindi. Tuman hokimligi tashabbusi bilan “Sher” toʻyxonasida oʻtkazilgan ushbu samimiy uchrashuv nogironligi boʻlgan hamyurtlarimiz uchun chinakam quvonch, eʼtibor va hurmat bayramiga aylandi.

Mehmonlar tashrifning ilk daqiqalardan boshlab mehr-muruvvat, iliq muhit va bayramona kayfiyatning guvohi boʻldilar. Tadbirning har bir lahzasi inson qadri, jamiyatda inklyuzivlik tamoyillarini mustahkamlashga qaratildi.

Tadbirda tuman hokimi Sobir Xoʻjametov, tuman prokurori Bahram Masharipov, tuman Ichki ishlar boʻlimi boshligʻi Timur Doshumbayev ishtirok etib, bayram munosabati bilan nogironligi boʻlgan yurtdoshlarimizga mehrli tilaklarini yoʻlladilar.

Rahbarlar oʻz chiqishlarida inson qadri va uning manfaatlari davlat siyosatining ustuvor yoʻnalishlaridan biri ekanini taʼkidlashdi. Nogironligi boʻlgan shaxslarni qoʻllab-quvvatlash, ularga qulay sharoit yaratish, ijtimoiy himoya tizimini mustahkamlash borasida amalga oshirilayotgan keng koʻlamli islohotlarga eʼtibor qaratildi.

Tadbir ishtirokchilariga maxsus tayyorlangan bayram sovgʻalari topshirildi. Ushbu sovgʻalar nafaqat eʼtibor ramzi, balki koʻngillarga iliqlik, quvonch va qadr topganlik tuygʻusini olib kirdi. Nogironligi boʻlgan hamyurtlarimizning koʻzlaridagi mamnunlik, tabassumlar va minnatdorchilik barcha ishtirokchilarning koʻngliga koʻchdi.

Tuman Madaniyat boʻlimi xonandalari tomonidan ijro etilgan shoʻx va shodon kuy-qoʻshiqlar tadbirga oʻzgacha bayramona ruh bagʻishladi. Musiqa sadolari ostida ishtirokchilarning koʻtarinki kayfiyati, bir-biriga iliq tilaklar yoʻllashi ushbu kunni yanada unutilmas qildi.

Xalqaro nogironlar kuni – bu jamiyatning mehr-muruvvatga boʻlgan ehtiyoji, bir-birimizni qoʻllab-quvvatlash madaniyati va yuksak insoniy qadriyatlarning ifodasidir.

Tumanimizda oʻtkazilgan mazkur tadbir esa yana bir bor shuni koʻrsatdiki, hamyurtlarimizning har biri eʼtibor, izzat-ikrom va qoʻllab-quvvatlashga munosibdir.

Charos Arslonova, tuman hokimligining Axborot xizmati rahbari.