QUMYoP MAHALLASIDA AHOLIGA SIFATLI IJTIMOIY XIZMATLAR KOʻRSATILMOQDA

Amudaryo tumanining Qumyop mahallasi oʻzining nafaqat goʻzal, soʻlim tabiati, balki oʻzaro mehr-oqibatli, mehnatkash, elim, yurtim, degan fidoyi insonlari bilan tanilgan aholi maskanlaridan biri sanaladi. Mahallada begona yoʻq, biri qosh, biri koʻz, deganlariday, barchasi qaysidir jihatlari bilan bir-biriga qarindoshlik rishtalari bilan bogʻlanib ketgan. Shundanmi, mahalladoshlar hech qachon biri-birini yolgʻizlatib qoʻyishmaydi.

Aholining qon-qoniga singib ketgan ana shu insonparvarlik tuygʻusi mahallada kompleks ijtimoiy xizmat koʻrsatuvchi xodim sifatida oʻz faoliyatini boshlagan Bahrom Yuldashevga ijtimoiy himoyaga muhtoj aholi qatlamini qoʻllab-quvvatlash, yakka-yolgʻiz fuqarolar hamda nogironligi bor boʻlgan shaxslarning ijtimoiylashuvini taʼminlashga qaratilgan ishlarni toʻkis amalga oshirishida qoʻl keldi.

Bahrom Yuldashev, avvalo, “Mahalla yettiligi” aʼzolari bilan hamkorlikda mahalladagi 735 ta xonadon tarkibiga birikkan 1585 ta oilaga birma-bir kirib borib, xatlovdan oʻtkazdi. Har bir oilaning turmush tarzi, iqtisodiy taʼminlanganlik darajasi puxta oʻrganilib, salkam 5000 nafarga yaqin aholi orasidan ijtimoiy himoyaga muhtojlar boʻyicha alohida-alohida roʻyxatlar shakllantirildi. Ushbu roʻyxat asosida mahalla hududidagi 12 toifaga mansub fuqarolarga 100 dan ortiq ijtimoiy xizmat koʻrsatish yoʻlga qoʻyildi.

Xususan, oʻzgalar parvarishiga muhtoj yolgʻiz keksalar va nogironligi bor boʻlgan shaxslar toifasi boʻyicha 4 nafar fuqaroga mahalliy tadbirkor koʻmagi bilan assistent biriktirilib, ularga namunali ijtimoiy xizmatlar koʻrsatish choralari koʻrildi.

Nogironligi boʻlgan shaxslar, ogʻir kasallikka chalinganlar va uzoq vaqt davolanishga muhtoj bolalar toifasi boʻyicha 112 nafar shaxslar ijtimoiy yordam bilan qamrab olindi. Oʻtgan davr mobaynida 13 nafar nogironligi boʻlgan shaxslarga protez-ortopediya moslamalari va reabilitatsiya texnik vositalari olib berildi.

6 nafar nogironligi boʻlgan fuqarolar Bahrom Yuldashevning koʻmagi bilan barqaror daromadli ishlarga joylashtirildi. 8 nafar nogironligi bor shaxsga esa “Saxovat va koʻmak” jamgʻarmasi hisobidan oʻz salomatliklarini tiklashlari uchun moddiy yordam koʻrsatildi.

Mahalladagi 76 ta oila kam taʼminlangan oilalar roʻyxatiga kiritilib, bolalar nafaqasi va moddiy yordamlar olib kelmoqda. Kambagʻallik reyestriga kiritilgan 57 ta oila esa ijtimoiy xodim va hokim yordamchisi tomonidan individual yondashuv asosida ijtimoiy xizmat turlari bilan qamrab olingan.

Oʻzbekiston Respublikasi Prezidentining 2025-yil 2-apreldagi Qaroriga muvofiq 198 ta oilaning iqtisodiy taʼminlanganlik darajasi puxta oʻrganilib, kuz-qish mavsumi uchun bir martalik moddiy yordam ajratilishiga koʻmaklashildi. 9 ta kam taʼminlangan oilalarning farzandlari imtiyozli ravishda maktabgacha taʼlim tashkilotlariga joylashtirilib, bu boradagi muammolari ijobiy hal qilindi.

Tazyiq va zoʻravonlikka uchragan ayol-qizlarni ijtimoiy-maʼnaviy qoʻllab-quvvatlash choralari koʻrilib, ulardan 4 nafariga himoya orderlari rasmiylashtirildi va ularga psixologik hamda huquqiy yordamlar koʻrsatish choralari koʻrildi.

Vasiylik va homiylikka olingan 1 nafar yetim bola hamda ota-onasi chet davlatlarda mehnat muhojirligida boʻlgan 3 nafar bolaning hayoti, taʼlim-tarbiyasi boʻyicha muntazam ravishda monitoring olib borilmoqda. Shu bilan birga, mahalladagi ota-ona qaramogʻidan mahrum boʻlgan 1 nafar bolaga "Inson" ijtimoiy xizmatlar markazining Amudaryo tumani boʻlimi tomonidan uy-joy bilan taʼminlanishiga yaqindan yordam berildi.

Qumyop mahallasida aholiga kompleks ijtimoiy xizmat koʻrsatish yoʻnalishida amalga oshirilayotgan bu kabi chora-tadbirlar ijtimoiy himoyaga muhtoj aholi qatlamining jamiyatga faol integratsiyalashuvini taʼminlab, ularning hayot sifatini yaxshilash imkonini bermoqda.

ROBIYa YOʻLDOShEVA.