ҚУМЁП МАҲАЛЛАСИДА АҲОЛИГА СИФАТЛИ ИЖТИМОИЙ ХИЗМАТЛАР КЎРСАТИЛМОҚДА

Амударё туманининг Қумёп маҳалласи ўзининг нафақат гўзал, сўлим табиати, балки ўзаро меҳр-оқибатли, меҳнаткаш, элим, юртим, деган фидойи инсонлари билан танилган аҳоли масканларидан бири саналади. Маҳаллада бегона йўқ, бири қош, бири кўз, деганларидай, барчаси қайсидир жиҳатлари билан бир-бирига қариндошлик ришталари билан боғланиб кетган. Шунданми, маҳалладошлар ҳеч қачон бири-бирини ёлғизлатиб қўйишмайди.

Аҳолининг қон-қонига сингиб кетган ана шу инсонпарварлик туйғуси маҳаллада комплекс ижтимоий хизмат кўрсатувчи ходим сифатида ўз фаолиятини бошлаган Баҳром Юлдашевга ижтимоий ҳимояга муҳтож аҳоли қатламини қўллаб-қувватлаш, якка-ёлғиз фуқаролар ҳамда ногиронлиги бор бўлган шахсларнинг ижтимоийлашувини таъминлашга қаратилган ишларни тўкис амалга оширишида қўл келди.

Баҳром Юлдашев, аввало, “Маҳалла еттилиги” аъзолари билан ҳамкорликда маҳалладаги 735 та хонадон таркибига бириккан 1585 та оилага бирма-бир кириб бориб, хатловдан ўтказди. Ҳар бир оиланинг турмуш тарзи, иқтисодий таъминланганлик даражаси пухта ўрганилиб, салкам 5000 нафарга яқин аҳоли орасидан ижтимоий ҳимояга муҳтожлар бўйича алоҳида-алоҳида рўйхатлар шакллантирилди. Ушбу рўйхат асосида маҳалла ҳудудидаги 12 тоифага мансуб фуқароларга 100 дан ортиқ ижтимоий хизмат кўрсатиш йўлга қўйилди.

Хусусан, ўзгалар парваришига муҳтож ёлғиз кексалар ва ногиронлиги бор бўлган шахслар тоифаси бўйича 4 нафар фуқарога маҳаллий тадбиркор кўмаги билан ассистент бириктирилиб, уларга намунали ижтимоий хизматлар кўрсатиш чоралари кўрилди.

Ногиронлиги бўлган шахслар, оғир касалликка чалинганлар ва узоқ вақт даволанишга муҳтож болалар тоифаси бўйича 112 нафар шахслар ижтимоий ёрдам билан қамраб олинди. Ўтган давр мобайнида 13 нафар ногиронлиги бўлган шахсларга протез-ортопедия мосламалари ва реабилитация техник воситалари олиб берилди.

6 нафар ногиронлиги бўлган фуқаролар Баҳром Юлдашевнинг кўмаги билан барқарор даромадли ишларга жойлаштирилди. 8 нафар ногиронлиги бор шахсга эса “Саховат ва кўмак” жамғармаси ҳисобидан ўз саломатликларини тиклашлари учун моддий ёрдам кўрсатилди.

Маҳалладаги 76 та оила кам таъминланган оилалар рўйхатига киритилиб, болалар нафақаси ва моддий ёрдамлар олиб келмоқда. Камбағаллик реестрига киритилган 57 та оила эса ижтимоий ходим ва ҳоким ёрдамчиси томонидан индивидуал ёндашув асосида ижтимоий хизмат турлари билан қамраб олинган.

Ўзбекистон Республикаси Президентининг 2025 йил 2 апрелдаги Қарорига мувофиқ 198 та оиланинг иқтисодий таъминланганлик даражаси пухта ўрганилиб, куз-қиш мавсуми учун бир марталик моддий ёрдам ажратилишига кўмаклашилди. 9 та кам таъминланган оилаларнинг фарзандлари имтиёзли равишда мактабгача таълим ташкилотларига жойлаштирилиб, бу борадаги муаммолари ижобий ҳал қилинди.

Тазйиқ ва зўравонликка учраган аёл-қизларни ижтимоий-маънавий қўллаб-қувватлаш чоралари кўрилиб, улардан 4 нафарига ҳимоя ордерлари расмийлаштирилди ва уларга психологик ҳамда ҳуқуқий ёрдамлар кўрсатиш чоралари кўрилди.

Васийлик ва ҳомийликка олинган 1 нафар етим бола ҳамда ота-онаси чет давлатларда меҳнат муҳожирлигида бўлган 3 нафар боланинг ҳаёти, таълим-тарбияси бўйича мунтазам равишда мониторинг олиб борилмоқда. Шу билан бирга, маҳалладаги ота-она қарамоғидан маҳрум бўлган 1 нафар болага "Инсон" ижтимоий хизматлар марказининг Амударё тумани бўлими томонидан уй-жой билан таъминланишига яқиндан ёрдам берилди.

Қумёп маҳалласида аҳолига комплекс ижтимоий хизмат кўрсатиш йўналишида амалга оширилаётган бу каби чора-тадбирлар ижтимоий ҳимояга муҳтож аҳоли қатламининг жамиятга фаол интеграциялашувини таъминлаб, уларнинг ҳаёт сифатини яхшилаш имконини бермоқда.

РОБИЯ ЙЎЛДОШЕВА.