Qoraqalpogʻiston qishloq xoʻjaligi va agrotexnologiyalar institutida xalqaro ilmiy-amaliy konferentsiya oʻtkazildi

Bugungi kunda global iqlim oʻzgarishlari, suv resurslarining taqchilligi va oziq-ovqat xavfsizligini taʼminlash masalalari dunyo hamjamiyati oldida turgan eng dolzarb vazifalardan biriga aylangan. Ayniqsa, ekologik vaziyati oʻziga xos va murakkab boʻlgan Orolboʻyi mintaqasida qishloq xoʻjaligini faqatgina ilm-fan yutuqlariga va raqamli texnologiyalarga asoslangan holda rivojlantirish hayotiy zarurat hisoblanadi. Ana shunday strategik maqsadlarni koʻzlagan holda, Qoraqalpogʻiston qishloq xoʻjaligi va agrotexnologiyalar institutida “Qishloq xoʻjaligining dolzarb masalalari va innovatsion yechimlar” mavzusida nufuzli xalqaro ilmiy-amaliy konferentsiya boʻlib oʻtdi.

Mazkur anjuman nafaqat mintaqa olimlarini, balki jahonning yetakchi agrar mutaxassislarini yagona ilmiy platformada birlashtirgani bilan ahamiyatli boʻldi. Tadbirda Yaponiya, Qozogʻiston, Turkiya kabi agrar sohasi rivojlangan davlatlardan tashrif buyurgan yetakchi professorlar, xalqaro ekspertlar hamda Oʻzbekistonning turli hududlaridan kelgan taniqli olimlar ishtirok etdilar.

Konferentsiyada Qoraqalpogʻiston Respublikasi Joʻqorgʻi Kengesi, Vazirlar Kengashi, Oliy taʼlim, fan va innovatsiyalar vazirligi hamda Veterinariya va chorvachilikni rivojlantirish qoʻmitasi masʼul rahbarlari va vakillari ham qatnashib, sohadagi davlat siyosatining ustuvor yoʻnalishlari haqida fikr bildirdilar.

Anjumanni Qoraqalpogʻiston qishloq xoʻjaligi va agrotexnologiyalar instituti rektori Berdiyar Jollibekov kirish soʻzi bilan ochib berdi. Rektor oʻz nutqida bugungi kunda institutda olib borilayotgan keng koʻlamli islohotlar, taʼlim, fan va ishlab chiqarish integratsiyasining kuchaytirilayotgani haqida toʻxtaldi. Xususan, institutning ilmiy salohiyati, amalga oshirilayotgan ilmiy-tadqiqot ishlari va soʻnggi yillarda olimlar tomonidan yaratilgan yangi navlar hamda texnologiyalar borasida erishilgan natijalar ishtirokchilar eʼtiboriga havola etildi.

Konferentsiya oʻz ishini beshta asosiy shoʻʼbaga boʻlingan holda davom ettirdi. Bu esa sohadagi muammolarni chuqur va atroflicha tahlil qilish imkonini berdi. Birinchi shoʻʼbada qishloq xoʻjaligi sohasida erishilgan umumiy ilmiy yutuqlar, mavjud tizimli muammolar va istiqbol rejalari muhokama qilindi. Ikkinchi shoʻʼba ishtirokchilari Veterinariya va chorvachilikni rivojlantirish qoʻmitasi vakillari bilan hamkorlikda chorvachilik sohasidagi muammolar va ularning yechimlariga urgʻu berdilar. Naslchilikni yaxshilash va ozuqa bazasini mustahkamlash masalalari diqqat markazida boʻldi.

Uchinchi shoʻʼbada qishloq xoʻjaligining drayver yoʻnalishlaridan boʻlgan ipakchilik va akvakultura sohasidagi masalalar va ularni rivojlantirish tamoyillari koʻrib chiqilgan boʻlsa, toʻrtinchi shoʻʼba mintaqa uchun eng ogʻriqli mavzu – ekologiya va atrof-muhitni muhofaza qilish sohasidagi masalalarni yechishda zamonaviy gʻoyalar va innovatsion yechimlarga bagʻishlandi. Beshinchi shoʻʼbada esa qishloq xoʻjaligi masalalarini yechishda axborot texnologiyalari, aniq va tabiiy fanlarning ahamiyati, “aqlli qishloq xoʻjaligi” tizimini joriy etish masalalari tahlil qilindi.

Tadbir davomida qishloq xoʻjaligida suv tejovchi zamonaviy texnologiyalarni joriy etish masalasi qizigʻin munozaralarga sabab boʻldi. Xalqaro olimlar tomonidan tomchilatib sugʻorish, resurslardan samarali foydalanish va ularning iqtisodiy samaradorligi boʻyicha taqdimotlar oʻtkazildi. Xususan, Yaponiya va Turkiya tajribasi misolida shoʻrlangan yerlarda dehqonchilik qilishning yangi usullari koʻrsatib berildi.

Institutning zooinjeneriya fakulteti tomonidan tashkillashtirilgan mazkur konferentsiya yakunida qishloq xoʻjaligi tizimini modernizatsiya qilish, innovatsion texnologiyalarni keng joriy etish va bu borada xalqaro hamda mahalliy ilmiy muassasalar oʻrtasidagi oʻzaro hamkorlikni kengaytirish zarurligi taʼkidlandi.

Tadbir soʻngida faol ishtirokchilarga institut maʼmuriyati tomonidan esdalik sovgʻalari va maxsus sertifikatlar topshirildi. Ushbu anjuman Orolboʻyi mintaqasida agrar sohani ilm-fan asosida rivojlantirish yoʻlidagi muhim qadam boʻldi.