Қорақалпоғистон қишлоқ хўжалиги ва агротехнологиялар институтида халқаро илмий-амалий конференция ўтказилди
Бугунги кунда глобал иқлим ўзгаришлари, сув ресурсларининг тақчиллиги ва озиқ-овқат хавфсизлигини таъминлаш масалалари дунё ҳамжамияти олдида турган энг долзарб вазифалардан бирига айланган. Айниқса, экологик вазияти ўзига хос ва мураккаб бўлган Оролбўйи минтақасида қишлоқ хўжалигини фақатгина илм-фан ютуқларига ва рақамли технологияларга асосланган ҳолда ривожлантириш ҳаётий зарурат ҳисобланади. Ана шундай стратегик мақсадларни кўзлаган ҳолда, Қорақалпоғистон қишлоқ хўжалиги ва агротехнологиялар институтида “Қишлоқ хўжалигининг долзарб масалалари ва инновацион ечимлар” мавзусида нуфузли халқаро илмий-амалий конференция бўлиб ўтди.
Мазкур анжуман нафақат минтақа олимларини, балки жаҳоннинг етакчи аграр мутахассисларини ягона илмий платформада бирлаштиргани билан аҳамиятли бўлди. Тадбирда Япония, Қозоғистон, Туркия каби аграр соҳаси ривожланган давлатлардан ташриф буюрган етакчи профессорлар, халқаро экспертлар ҳамда Ўзбекистоннинг турли ҳудудларидан келган таниқли олимлар иштирок этдилар.
Конференцияда Қорақалпоғистон Республикаси Жўқорғи Кенгеси, Вазирлар Кенгаши, Олий таълим, фан ва инновациялар вазирлиги ҳамда Ветеринария ва чорвачиликни ривожлантириш қўмитаси масъул раҳбарлари ва вакиллари ҳам қатнашиб, соҳадаги давлат сиёсатининг устувор йўналишлари ҳақида фикр билдирдилар.
Анжуманни Қорақалпоғистон қишлоқ хўжалиги ва агротехнологиялар институти ректори Бердияр Жоллибеков кириш сўзи билан очиб берди. Ректор ўз нутқида бугунги кунда институтда олиб борилаётган кенг кўламли ислоҳотлар, таълим, фан ва ишлаб чиқариш интеграциясининг кучайтирилаётгани ҳақида тўхталди. Хусусан, институтнинг илмий салоҳияти, амалга оширилаётган илмий-тадқиқот ишлари ва сўнгги йилларда олимлар томонидан яратилган янги навлар ҳамда технологиялар борасида эришилган натижалар иштирокчилар эътиборига ҳавола этилди.
Конференция ўз ишини бешта асосий шўъбага бўлинган ҳолда давом эттирди. Бу эса соҳадаги муаммоларни чуқур ва атрофлича таҳлил қилиш имконини берди. Биринчи шўъбада қишлоқ хўжалиги соҳасида эришилган умумий илмий ютуқлар, мавжуд тизимли муаммолар ва истиқбол режалари муҳокама қилинди. Иккинчи шўъба иштирокчилари Ветеринария ва чорвачиликни ривожлантириш қўмитаси вакиллари билан ҳамкорликда чорвачилик соҳасидаги муаммолар ва уларнинг ечимларига урғу бердилар. Наслчиликни яхшилаш ва озуқа базасини мустаҳкамлаш масалалари диққат марказида бўлди.
Учинчи шўъбада қишлоқ хўжалигининг драйвер йўналишларидан бўлган ипакчилик ва аквакултура соҳасидаги масалалар ва уларни ривожлантириш тамойиллари кўриб чиқилган бўлса, тўртинчи шўъба минтақа учун энг оғриқли мавзу – экология ва атроф-муҳитни муҳофаза қилиш соҳасидаги масалаларни ечишда замонавий ғоялар ва инновацион ечимларга бағишланди. Бешинчи шўъбада эса қишлоқ хўжалиги масалаларини ечишда ахборот технологиялари, аниқ ва табиий фанларнинг аҳамияти, “ақлли қишлоқ хўжалиги” тизимини жорий этиш масалалари таҳлил қилинди.
Тадбир давомида қишлоқ хўжалигида сув тежовчи замонавий технологияларни жорий этиш масаласи қизиғин мунозараларга сабаб бўлди. Халқаро олимлар томонидан томчилатиб суғориш, ресурслардан самарали фойдаланиш ва уларнинг иқтисодий самарадорлиги бўйича тақдимотлар ўтказилди. Хусусан, Япония ва Туркия тажрибаси мисолида шўрланган ерларда деҳқончилик қилишнинг янги усуллари кўрсатиб берилди.
Институтнинг зооинженерия факультети томонидан ташкиллаштирилган мазкур конференция якунида қишлоқ хўжалиги тизимини модернизация қилиш, инновацион технологияларни кенг жорий этиш ва бу борада халқаро ҳамда маҳаллий илмий муассасалар ўртасидаги ўзаро ҳамкорликни кенгайтириш зарурлиги таъкидланди.
Тадбир сўнгида фаол иштирокчиларга институт маъмурияти томонидан эсдалик совғалари ва махсус сертификатлар топширилди. Ушбу анжуман Оролбўйи минтақасида аграр соҳани илм-фан асосида ривожлантириш йўлидаги муҳим қадам бўлди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
