GRANT LOYIHASI DOIRASIDA TARGʻIBOT MATERIALLARI TARQATILDI
Korruptsiya oʻz-oʻzidan paydo boʻlmaydi, bu illat qaysi sohada ildiz otishidan qatʼiy nazar, albatta inson omili ishtirokida sodir boʻladi. Xususan, iqtisodiy faoliyatga oʻrnatilgan turli xildagi cheklovlar, ayniqsa, amaldorlarning keng, fuqarolik nazoratidan xoli, qoʻl ostidagi xodimlariga nisbatan cheklanmagan ruxsat berish yoki taqiqlash vakolatlari poraxoʻrlikka zamin yaratadi. Shu bilan birga yirik mablagʻlarga ega boʻlgan ishbilarmonlar daromadlarini yanada koʻpaytirish maqsadida hamda raqobat maydonida alohida imtiyozlarga ega boʻlish uchun katta miqdordagi pora evaziga amaldorlarni oʻz ixtiyorlariga boʻysundirib olishga intilishlari oqibatida davlat va jamiyat uchun jiddiy zarar keltiruvchi iqtisodiy jinoyatlarni — uyushgan korruptsiyaviy holatlar sodir boʻladi.
Bunday salbiy holatlarning oldini olishda va korruptsiyaga qarshi kurashishda eng faol targʻibotchi sifatida jahon miqyosida, shu jumladan mamlakatimizda ham ommaviy axborot vositalarining roli oshib bormoqda. Ommaviy axborot vositalari vakillari doimiy ravishda xalq orasiga kirib borib, fuqarolar ongida korruptsiya illatiga qarshi murosasizlik tuygʻusini uygʻotish bilan birga jamiyatdagi ijtimoiy kayfiyatni faollik bilan yoritib bormoqda.
Amudaryo televideniyesi tahririyatining Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi Qoraqalpogʻiston Respublikasi boʻlinmasi tomonidan moliyalashtirilgan "Korruptsiya — davlat va jamiyat taraqqiyotiga tahdid" nomli grant loyihasi doirasida aholi keng qatlamlari ishtirokida amalga oshirilayotgan uchrashuv va davra suhbatlari, ochiq va oshkora muloqot tarzidagi malakali huquqshunoslarni jalb qilgan holda tashkillashtirilayotgan savol-javob tadbirlari korruptsiyaga qarshi kurash borasidagi aholining huquqiy madaniyatini hamda ularning ijtimoiy faolligini oshirish imkonini bermoqda.
Loyiha koordinatorlari tomonidan navbatdagi korruptsiyaga qarshi kurash boʻyicha targʻibot-tashviqot tadbiri Amudaryo tumanining Doʻstlik mahallasi hududida oʻtkazildi. Loyiha ish rejasiga asosan mahalla hududida joylashgan tuman Ichki ishlar boʻlimi, Soliq inspektsiyasi, Doʻstlik mahalla fuqarolar yigʻinida faoliyat olib boruvchi davlat xizmatchilari hamda davlat xizmatlaridan foydalanuvchi fuqarolarga korruptsiyaga qarshi kurashish boʻyicha tarqatma vositalar, bukletlar va plakatlar tarqatish orqali aholi ongida korruptsiyaga nisbatan murosasizlik tuygʻusini shakllantirishga hissa qoʻshildi.
Tadbir jarayonida davlat xizmatchilari va davlat xizmatlaridan foydalanuvchilar "Korruptsiya — davlat va jamiyat taraqqiyotiga tahdid" nomli grant loyihasi koordinatorlari tomonidan taqdim etilgan targʻibot-tashviqot vositalari bilan tanishib, korruptsiya illatiga qarshi kurash boʻyicha oʻz fikrlarini bildirdilar. Shu bilan birga, mamlakatimizning korruptsiyadan xoli, yuksak taraqqiy etgan davlat sifatida dunyo miqyosida yuqori nufuzga ega boʻlishi uchun korruptsiyaga qarshi kurashishda keng jamoatchilik nazorati va hamjihatlikdagi saʼy-harakatlari muhim ahamiyatga egaligini taʼkidladilar.
Tahririyat tomonidan amalga oshirilayotgan bu kabi chora-tadbirlar haqiqatan ham aholi ongida korruptsiyaga nisbatan murosasizlik tuygʻusini shakllantirib, korruptsiyaning oldini olishga, jamiyatda hamjihatlik va uyushqoqlik muhitini mustahkamlashga xizmat qiladi.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
