Fuqarolik jamiyati haftaligi boshlanishi munosabati bilan bayram tadbiri tashkil etildi

18-noyabr kuni Nukus shahrida mamlakatimiz ijtimoiy-siyosiy hayotidagi muhim voqelik – "Fuqarolik jamiyati haftaligi"ning boshlanishi munosabati bilan tantanali bayram tadbiri tashkil etildi. Ushbu yirik anjuman davlat va jamiyat oʻrtasidagi muloqotni yangi bosqichga olib chiqish, nodavlat notijorat tashkilotlarining mamlakat taraqqiyotidagi oʻrnini mustahkamlash maqsadida tashkil etilmoqda. Tadbirda fuqarolik jamiyati institutlari, mahalla faollari, davlat tashkilotlari mutasaddilari, ommaviy axborot vositalari va keng jamoatchilik vakillari ishtirok etib, oʻzaro hamkorlikning yangi qirralarini muhokama qildilar.

Tadbir nogironligi boʻlgan shaxslar tomonidan mehr va mahorat bilan tayyorlangan mahsulotlar yarmarkasi, davlat granti mablagʻlari hisobiga amalga oshirilgan ijtimoiy ahamiyatga molik loyihalar taqdimoti hamda hududdagi milliy madaniyat markazlarining rang-barang chiqishlaridan iborat koʻrgazma bilan boshlandi. Ushbu koʻrgazma nafaqat yutuqlar namoyishi, balki inklyuziv jamiyat va millatlarlaro totuvlikning yorqin ifodasiga aylandi.

Tantanali marosimda Qoraqalpogʻiston Respublikasi Joʻqorgʻi Kengesining Ijtimoiy-madaniy rivojlanish, yoshlar siyosati va jamoat birlashmalari masalalari qoʻmitasi raisi Murat Atamuratov soʻzga chiqib, barcha yigʻilganlarni "Fuqarolik jamiyati haftaligi"ning boshlanishi bilan samimiy qutladi. U oʻz nutqida Oʻzbekiston Respublikasi Prezidentining 2024-yil 26-avgustdagi "Fuqarolik jamiyati institutlarini davlat tomonidan qoʻllab-quvvatlash tizimini yanada takomillashtirish chora-tadbirlari toʻgʻrisida"gi 124-sonli Farmoni soha rivojida yangi davrni boshlab berganini alohida taʼkidladi.

Mazkur hujjatga muvofiq, endilikda har yili dekabr oyining birinchi haftasi "Fuqarolik jamiyati haftaligi" sifatida keng nishonlanishi belgilangan. Bu yilgi tadbirlar respublikamiz hududlaridan boshlanib, 1-5-dekabr kunlari Toshkent shahrida yakuniy bosqich bilan davom etishi rejalashtirilgan. Haftalikning aynan Qoraqalpogʻistondan start olishi ham bejiz emas, chunki bugungi kunda ushbu hududda fuqarolik jamiyati institutlari faol va samarali ish olib bormoqda.

Tadbir davomida Oliy Majlis huzuridagi Jamoat fondining boʻlim boshligʻi Zuhra Ibragimova soʻzga chiqib, sohani moliyaviy qoʻllab-quvvatlash borasidagi raqamlarga toʻxtaldi. Taʼkidlanishicha, birgina joriy yilning oʻzida mamlakat miqyosida fuqarolik jamiyati institutlarini qoʻllab-quvvatlashga rekord darajada – 1 trillion 200 milliard soʻm mablagʻ yoʻnaltirilgan. Xususan, Qoraqalpogʻiston Respublikasida davlat ijtimoiy buyurtmasi shaklida 2 ta va davlat granti shaklida 19 ta loyiha jami 3 milliard 724 million soʻm miqdorida moliyalashtirilgan boʻlib, hozirgi vaqtda ulardan 14 tasi muvaffaqiyatli yakunlangan. Bu raqamlar davlatning uchinchi sektor rivojiga boʻlgan jiddiy eʼtiboridan dalolat beradi.

Marosimning davomida jamiyat hayotida faol ishtirok etayotgan, dolzarb muammolar yechimida tashabbus koʻrsatayotgan bir guruh nodavlat notijorat tashkilotlari va ommaviy axborot vositalari vakillariga tashakkurnomalar hamda esdalik sovgʻalari topshirildi. Shundan soʻng, Qoraqalpogʻiston Respublikasi Madaniyat vazirligi tomonidan tayyorlangan kontsert dasturi namoyish etildi. Yangragan kuy-qoʻshiqlarda doʻstlik, tinchlik va hamjihatlik gʻoyalari tarannum etilib, ishtirokchilarga koʻtarinki kayfiyat ulashildi.

Haftalik dasturiga muvofiq Adliya vazirligida ochiq muloqot, Nodavlat notijorat tashkilotlari milliy forumi, turli mavzulardagi konferentsiyalar oʻtkazilishi koʻzda tutilgan. Shuningdek, imkoniyati cheklangan shaxslarning qoʻl mehnati mahsulotlari yarmarkasi, sport musobaqalari va xayriya aktsiyalari tashkil etiladi.

Ushbu haftalik davlat organlari va fuqarolik jamiyati institutlari oʻrtasida samarali muloqot mexanizmini yoʻlga qoʻyish, mavjud muammolarni tizimli tahlil qilish hamda mamlakat taraqqiyoti uchun xizmat qiladigan istiqbolli gʻoyalarni hayotga tatbiq etishda muhim platforma vazifasini oʻtaydi.