“Xavfsiz mahalla”: Amudaryoda jinoyatchilikdan holi hudud yaratish boʻyicha tizimli ishlar amalga oshirilmoqda

Bugungi kunda mamlakatimizda, jumladan, Qoraqalpogʻiston Respublikasida mahallalarda xavfsiz muhitni yaratish va fuqarolar osoyishtaligini taʼminlash davlat siyosatining eng ustuvor yoʻnalishlaridan biriga aylangan. Qoraqalpogʻiston Respublikasi Qoʻriqlash boshqarmasi xodimlari tomonidan bu borada tizimli amaliy ishlar olib borilmoqda.

Oʻzbekiston Respublikasi Prezidentining joriy yil boshidagi “2025-yilda Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisi”dagi 1-sonli qarori mazkur saʼy-harakatlarning huquqiy asosi boʻlib xizmat qilmoqda.

Qaror ijrosini taʼminlash hamda "Xavfsiz hudud", "Xavfsiz mahalla", "Sifat, ishonch va xavfsizlik" shiorlari ostida oʻtkazilayotgan tadbirlar doirasida Amudaryo tumanini jinoyatchilikdan holi hududga aylantirish boʻyicha keng qamrovli ishlar davom ettirilmoqda. Bu jarayonda faqat bir tashkilot emas, balki Amudaryo tumani qoʻriqlash boʻlimi, Ichki ishlar boʻlimi va “Mahalla yettiliklari” oʻrtasidagi yaqin hamkorlik mexanizmi yoʻlga qoʻyilgan.

Ushbu hamkorlik doirasida hududlarda xavfsizlik va osoyishtalikni taʼminlash, jinoyatchilikning oldini olishga qaratilgan “Yoʻl xaritasi”ning amaliy ijrosi doimiy ravishda muhokama qilib borilmoqda. Asosiy maqsad – zamonaviy qoʻriqlash vositalari orqali nazorat qilish tizimini joriy etish va aholining tinch hamda osuda hayotini taʼminlashga xizmat qilishdir.

Bu boradagi navbatdagi profilaktik targʻibot-tashviqot tadbirlari tumandagi Navoiy va Gulzor mahallalari hududlarida tashkil etildi. Ushbu mahallalarda tuman qoʻriqlash boʻlimi xodimlari aholi va tadbirkorlik subʼektlari vakillariga soʻnggi vaqtlarda hayotimizga tatbiq etilayotgan zamonaviy qoʻriqlash xizmati signalizatsiya uskunalaridan foydalanish tartibi haqida batafsil maʼlumot berdi. Shuningdek, “Tashvish” tugmasi bosilganda voqea joyiga bir necha daqiqa ichida yetib keluvchi tezkor harakatlanuvchi guruh xodimlarining xizmatlari va ularning imkoniyatlari amalda tanishtirib oʻtildi.

Oʻtkazilgan targʻibot tadbirlari mobaynida aholiga mahallalarda birinchi navbatda xavfsizlikni taʼminlash nafaqat davlat idoralari, balki har bir mulk egasining ham masʼuliyati ekanligi tushuntirildi. Mahallalarni jinoyatchilikdan holi hududga aylantirish maqsadida ushbu hududlarda joylashgan tadbirkorlik obʼektlari, xizmat koʻrsatish shoxobchalari va fuqarolarning yashash xonadonlarini ishonchli qoʻriqqa olish orqali fuqarolarning mol-mulklarini himoyalash qanchalik ahamiyatga ega ekanligi hayotiy misollar orqali koʻrsatib berildi.

Maʼlumot oʻrnida aytib oʻtish joizki, bugungi kunda Amudaryo tumani qoʻriqlash boʻlimi texnik qoʻriqlash markazi tomonidan jami 541 ta obʼekt hamda 381 ta fuqaro xonadonlari ishonchli qoʻriqlash xizmati bilan taʼminlangan.

Tushuntirish ishlari mobaynida koʻplab yangi obʼekt va xonadonlar ham qoʻriqqa olinib, ularga ishonchli qoʻriqlash xizmatini koʻrsatish yoʻlga qoʻyildi. “Xavfsiz koʻcha – xavfsiz yoʻlak” tamoyili asosida amalga oshirilayotgan bu kabi keng qamrovli ishlar tumanning boshqa mahallalarida ham izchil davom etmoqda. Bu, oʻz navbatida, Amudaryo tumanida jinoyatchilikning barvaqt oldini olish va aholining tinchligi hamda osoyishtaligini taʼminlashga xizmat qiladi.