“Хавфсиз маҳалла”: Амударёда жиноятчиликдан ҳоли ҳудуд яратиш бўйича тизимли ишлар амалга оширилмоқда

Бугунги кунда мамлакатимизда, жумладан, Қорақалпоғистон Республикасида маҳаллаларда хавфсиз муҳитни яратиш ва фуқаролар осойишталигини таъминлаш давлат сиёсатининг энг устувор йўналишларидан бирига айланган. Қорақалпоғистон Республикаси Қўриқлаш бошқармаси ходимлари томонидан бу борада тизимли амалий ишлар олиб борилмоқда.

Ўзбекистон Республикаси Президентининг жорий йил бошидаги “2025 йилда Республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғриси”даги 1-сонли қарори мазкур саъй-ҳаракатларнинг ҳуқуқий асоси бўлиб хизмат қилмоқда.

Қарор ижросини таъминлаш ҳамда "Хавфсиз ҳудуд", "Хавфсиз маҳалла", "Сифат, ишонч ва хавфсизлик" шиорлари остида ўтказилаётган тадбирлар доирасида Амударё туманини жиноятчиликдан ҳоли ҳудудга айлантириш бўйича кенг қамровли ишлар давом эттирилмоқда. Бу жараёнда фақат бир ташкилот эмас, балки Амударё тумани қўриқлаш бўлими, Ички ишлар бўлими ва “Маҳалла еттиликлари” ўртасидаги яқин ҳамкорлик механизми йўлга қўйилган.

Ушбу ҳамкорлик доирасида ҳудудларда хавфсизлик ва осойишталикни таъминлаш, жиноятчиликнинг олдини олишга қаратилган “Йўл харитаси”нинг амалий ижроси доимий равишда муҳокама қилиб борилмоқда. Асосий мақсад – замонавий қўриқлаш воситалари орқали назорат қилиш тизимини жорий этиш ва аҳолининг тинч ҳамда осуда ҳаётини таъминлашга хизмат қилишдир.

Бу борадаги навбатдаги профилактик тарғибот-ташвиқот тадбирлари тумандаги Навоий ва Гулзор маҳаллалари ҳудудларида ташкил этилди. Ушбу маҳаллаларда туман қўриқлаш бўлими ходимлари аҳоли ва тадбиркорлик субъектлари вакилларига сўнгги вақтларда ҳаётимизга татбиқ этилаётган замонавий қўриқлаш хизмати сигнализация ускуналаридан фойдаланиш тартиби ҳақида батафсил маълумот берди. Шунингдек, “Ташвиш” тугмаси босилганда воқеа жойига бир неча дақиқа ичида етиб келувчи тезкор ҳаракатланувчи гуруҳ ходимларининг хизматлари ва уларнинг имкониятлари амалда таништириб ўтилди.

Ўтказилган тарғибот тадбирлари мобайнида аҳолига маҳаллаларда биринчи навбатда хавфсизликни таъминлаш нафақат давлат идоралари, балки ҳар бир мулк эгасининг ҳам масъулияти эканлиги тушунтирилди. Маҳаллаларни жиноятчиликдан ҳоли ҳудудга айлантириш мақсадида ушбу ҳудудларда жойлашган тадбиркорлик объектлари, хизмат кўрсатиш шохобчалари ва фуқароларнинг яшаш хонадонларини ишончли қўриққа олиш орқали фуқароларнинг мол-мулкларини ҳимоялаш қанчалик аҳамиятга эга эканлиги ҳаётий мисоллар орқали кўрсатиб берилди.

Маълумот ўрнида айтиб ўтиш жоизки, бугунги кунда Амударё тумани қўриқлаш бўлими техник қўриқлаш маркази томонидан жами 541 та объект ҳамда 381 та фуқаро хонадонлари ишончли қўриқлаш хизмати билан таъминланган.

Тушунтириш ишлари мобайнида кўплаб янги объект ва хонадонлар ҳам қўриққа олиниб, уларга ишончли қўриқлаш хизматини кўрсатиш йўлга қўйилди. “Хавфсиз кўча – хавфсиз йўлак” тамойили асосида амалга оширилаётган бу каби кенг қамровли ишлар туманнинг бошқа маҳаллаларида ҳам изчил давом этмоқда. Бу, ўз навбатида, Амударё туманида жиноятчиликнинг барвақт олдини олиш ва аҳолининг тинчлиги ҳамда осойишталигини таъминлашга хизмат қилади.