Chordara mahallasi: farovon hayot sari dadil qadamlar

Amudaryo tumani Chordara mahallasida bugun har bir xonadon, har bir oila oʻz mehnati, tirishqoqligi va hayotga boʻlgan intilishi natijasida farovon yashamoqda. Bu yerda “Mahalla yettiligi” masʼullarining aholi farovonligini oshirish, bandlikni taʼminlash, xotin-qizlar va yoshlar bilan tizimli ishlash hamda ijtimoiy himoyaga muhtoj oilalarni qoʻllab-quvvatlash borasidagi amaliy saʼy-harakatlari samarali natija bermoqda.

Tuman hokimligining Axborot xizmati hamda “Amudaryo TV” telekanali jamoasi mahallada amalga oshirilayotgan ishlar bilan yaqindan tanishib, aholining bugungi turmush tarzini oʻrgandi.

3650 nafardan ortiq aholi istiqomat qiladigan mazkur hududda 666 ta xonadon tarkibida 1013 ta oila mavjud. Mahallaning iqtisodiy harakatlantiruvchi kuchi – xizmat koʻrsatish sohasi, tomorqa, parrandachilik va chorvachilikdir. Koʻplab oilalar aynan shu yoʻnalishlarda mehnat qilib, barqaror daromad manbaiga ega boʻlishgan.

Xususan, Rustam Oʻrazimbetov yillar davomida parrandachilik va chorvachilik bilan shugʻullanishni kasbga aylantirgan. Bu yil u inkubator yordamida 80 dona joʻjani parvarishlab, ularni bozorga chiqarib, moʻmay daromad oldi. Ayni damda xorijiy zotdor qoramollarni parvarishlash va koʻpaytirish ishlarini kengaytirib, oilasi daromadini mustahkamlamoqda.

Shuningdek, II guruh nogironi Baxtiyor Yusupov ham mehnati bilan mahalla faxriga aylangan. Ilgʻor tomorqachi 4 sotix tomorqasida kartoshka, sabzi, qovoq va boshqa mahsulotlar yetishtirib, ehtiyojdan ortganini ichki bozorda sotmoqda. U parrandachilik va baliqchilikni ham yoʻlga qoʻyib, nafaqat oʻzini, balki oila aʼzolarini ham band qilgan. “Nafaqaga qarab emas, mehnatga tayanib yashash kerak”, — deydi hamyurtimiz.

Chordara mahallasining eng taʼsirli hayotiy hikoyalaridan biri Nilufar Xoʻjaniyazovaga tegishli desak, aslo mubolagʻa boʻlmaydi. U II guruh nogironi. Ammo uning matonati, sabr-toqati va hayotga boʻlgan ishonchi har qanday insonni qoyil qoldiradi.

2018-yilda ogʻir xastalik natijasida u bir qoʻli va bir oyogʻidan ayrildi. Kunlari toʻshakda oʻtar, tayanadigan hassasi boʻlmasa bir qadam tashlash qiyin edi. Ammo Nilufar opa taslim boʻlmadi. Toʻquvchilik — bolalikdagi qiziqishi unga ruh, kuch va maʼnan madad boʻldi. Dastlab kichik mashgʻulot sifatida boshlangan bu hunar bugun uning hayot tarziga, daromad manbaiga aylanib ulgurdi.

Bugun Nilufar Xoʻjaniyazova tayyorlayotgan oyoq kiyimlar, bosh kiyimlar, sharflar, yumshoq oʻyinchoqlar koʻplab xaridorlar eʼtiboriga tushgan. Eng quvonarlisi — mehnat unga nafaqat daromad, balki sogʻlik, mustaqil harakat, hayotga qaytish imkonini berdi. U hozirda qoʻltiqtayoqsiz yuradi, mustaqil harakatlanadi. Nilufar opaning hayoti — inson uchun eng katta kuch manbai uning oʻzi ekaniga yorqin isbot. “Mehnat va hunar meni qayta oyoqqa turgʻazdi, hayotga qaytardi”, — deydi u faxr bilan.

Mahallaning yana bir mehnatkash oilasi — Bozorboy Raimovlar xonadoni. Ular xorijiy zotdor qoramolchilik bilan shugʻullanib, sifatli sut mahsulotlari yetishtirishmoqda. Bugun ushbu oilaning uch avlodi — oʻzi, farzandlari va nevaralari — oilaviy chorvachilikdan mustahkam daromad topmoqda.

Bozorboy Raimov parrandachilikda ham oʻziga xos uslub ishlab chiqqan. Yaqinda 150 dan ortiq parrandani ichki bozorda sotib, hozir 60 dan ortiq parrandani parvarishlamoqda. “Goʻsht, sut, tuxum mahsulotlariga xaridor hech qachon kamaymaydi”, — deydi u ishonch bilan.

Chordara mahallasida bugun har bir oila oʻz mehnatiga yarasha rizq topmoqda. Aholining faol, oʻziga ishongan, mehnatsevar boʻlishi — mahalla taraqqiyotining eng asosiy omili. Parrandachilik, chorvachilik, tomorqadan unumli foydalanish, hunarmandchilikni rivojlantirish orqali koʻplab oilalar barqaror daromad manbaiga ega boʻlmoqda. “Mahalla yettiligi” aʼzolari esa kam taʼminlangan, ijtimoiy himoyaga muhtoj qatlamni qoʻllab-quvvatlash, yoshlar va xotin-qizlar bandligini taʼminlash borasida tizimli ishlarni amalga oshirmoqdalar. Natijada chordaraliklar bugun farovon hayot sari mustahkam va ishonchli qadamlar bilan odimlamoqda.

Charos Arslonova, tuman hokimligining Axborot xizmati rahbari.