AMUDARYo TUMANI ADLIYa BOʻLIMI KORRUPTsIYaGA QARShI KURAShDA YeTAKChI

Jamiyatimizning turli jabhalarida chuqur ildiz otgan korruptsiya illatiga qarshi kurashishda Adliya vazirligi va uning hududlardagi quyi tashkilotlar tomonidan ham samarali ishlar amalga oshirilmoqda. Vazirlik xodimlari ishtirokida oʻtkazilayotgan targʻibot tadbirlarida OAV bilan hamkorlik muhim ahamiyat kasb etmoqda. Amudaryo televideniyesi tahririyatining Oliy Majlis huzuridagi Jamoat fondining Qoraqalpogʻiston Respublikasi boʻlinmasi tomonidan moliyalashtirilgan “Korruptsiya — davlat va jamiyat taraqqiyotiga tahdid” nomli grant loyihasi doirasidagi hamkorlik ham buning yorqin isbotidir.

Adliya boʻlimi xodimlari tomonidan joriy yilning oʻtgan 9 oyi davomida boʻlim huquqshunoslari tomonidan jami 4 ming 237 marotaba targʻibot ishlari amalga oshirilgan. Qolaversa, 4000 nafardan ortiq fuqarolarning huquqiy muammolari ijobiy hal etilgan. Sudlarga jismoniy va yuridik shaxslarning manfaatini koʻzlab, 20 dan ortiq daʼvo arizalari kiritilgan va 400 million soʻmdan ortiq qarzdorlik undirib berilgan. Fuqarolarning murojaatlarini oʻrganish va monitoring qilish davomida 907 ta qonunbuzilish holatlari aniqlanib, ularni bartaraf etish choralari koʻrilgan.

Fuqarolik holati dalolatnomalarini yozish boʻlimi tomonidan esa oʻtgan 9 oy davomida 131 ta fuqarolik holati dalolatnomalariga oʻzgartirish, tuzatishlar kiritilib, takroriy guvohnomalar rasmiylashtirib berilgan. Shuningdek, oʻz vaqtida tugʻilishi qayd qilinmagan bolalarga hujjatlar toʻplanishida amaliy yordam koʻrsatish orqali tugʻilganligi qayd qilinib, guvohnomalar berilgan. 109 nafar fuqaroga Mustaqil davlatlar hamdoʻstligi davlatlaridan guvohnoma va maʼlumotnomalar olishda amaliy yordam koʻrsatilgan.

Davlat xizmatlari markazi va Yagona interaktiv davlat xizmatlari portali orqali joriy yilning 9 oyi davomida aholiga 61 ming 128 ta turli xil yoʻnalishlardagi davlat xizmatlari koʻrsatilgan. Tumanning olis hududlariga chiqqan holda sayyor davlat xizmatlarini koʻrsatish amaliyoti muntazam yoʻlga qoʻyilgan boʻlib, joriy yilning 9 oyi davomida sayyor tartibda 4 ming 171 ta davlat xizmatlari koʻrsatilgan.

Yuridik xizmat koʻrsatish markazi tomonidan esa 2025-yil boshidan beri kelib tushgan jami 68 ming 178 ta hujjat loyihalari oʻrganilib, ularning 67 ming 665 tasiga ijobiy, 14 tasiga salbiy xulosalar berilgan. 499 ta hujjat loyihalari esa qayta koʻrib chiqish uchun rad qilingan.

Tuman Adliya boʻlimi va unga qarashli tuzilmalarda amalga oshirilayotgan chora-tadbirlarning barchasi aholiga sifatli davlat xizmatlarini koʻrsatish, huquqiy maslahat va tavsiyalar berish, aholi ongida korruptsiya illatiga nisbatan murosasizlik tuygʻusini shakllantirishga qaratilgani bilan muhim ahamiyat kasb etmoqda.

Robiya YOʻLDOShEVA.