ENDOKRINOLOGIK KASALLIKLAR VA UNING OLDINI OLIShGA BAGʻIShLANGAN SEMINAR-TRENING OʻTKAZILDI
Mamlakatimizda aholiga endokrinologik yordam koʻrsatishni takomillashtirishga qaratilgan milliy dasturga muvofiq, maxsus endokrinologik yordam koʻrsatish tizimini jahon andozalari darajasida takomillashtirish, shuningdek, aholi oʻrtasida qandli diabet kasalligi tarqalishining oldini olishga doir chora-tadbirlarni kuchaytirish maqsadida Sogʻliqni saqlash vazirligi tomonidan qator yoʻnalishlar boʻyicha tizimli ishlar olib borilmoqda.
Xususan, endokrinologik kasalliklar profilaktikasi va ularni erta bosqichda aniqlashga oid chora-tadbirlarni takomillashtirish, shuningdek, bunday kasalliklarni erta bosqichda aniqlash uchun hududlarda skrining dasturlari joriy etilib, soha mutaxassislari tomonidan sayyor seminar-treninglar, malaka oshirish mashgʻulotlari olib borilmoqda.
Bugungi kunda tibbiyot sohasining boshqa yoʻnalishlaridan farqli oʻlaroq endokrinologik kasalliklarning jadal rivojlanib borayotgani tufayli mazkur kasallikning oldini olish, bemorni oʻz vaqtida davolash, aholining tibbiy madaniyatini oshirish, kasallikka chalingan bemorlarga yaqindan yordam berish, soha mutaxassislarining bilim va malakalarini izchil oshirib borishni taqoza etmoqda. Bu borada "Umid" xayriya jamoatchilik birlashmasining Qoraqalpogʻiston Respublikasi hududiy boʻlimi tomonidan Qoraqalpogʻiston Respublikasi Sogʻliqni saqlash vazirligi bilan hamkorlikda amalga oshirilayotgan profilaktik targʻibot-tashviqot tadbirlari oʻzining ijobiy samarasini bermoqda.
Joriy yilning 24-oktyabr sanasida Amudaryo tuman Tibbiyot birlashmasining endokrinologiya yoʻnalishi boʻyicha mutaxassis shifokorlari, tor doiradagi shifokorlar, tibbiy hamshiralar ishtirokida "Qoraqalpogʻiston Respublikasining Orolboʻyi hududida yashovchi 1-tur qandli diabet kasalligiga chalingan bolalar va oʻsmirlarning salomatligini yaxshilash" dasturi doirasida seminar-trening tashkillashtirildi.
Seminar-treningda endokrinologiya sohasidagi yangiliklar, kasallikning oldini olish va bemorlarni davolash boʻyicha sohaga joriy etilayotgan innovatsion gʻoyalar xususida tajribali mutaxassislar tomonidan batafsil maʼlumotlar berildi. Shuningdek, seminar-treningda aholining zamonaviy, yuqori samarali diagnostika va davolash usullaridan foydalanish imkonini yaxshilash, kasallikni davolashda yuqori samaradorlikka erishish, shifoxonalar endokrinologiya boʻlimlarining zarur dori vositalari va reagentlar bilan taʼminlanish darajasini yaxshilash hamda aholi oʻrtasida qandli diabet kasalligi profilaktikasi yuzasidan ogohlantiruvchi tadbirlar oʻtkazishning ahamiyati boʻyicha zarur tushuncha va tavsiyalar taqdim etildi.
Seminar-trening davomida Qoraqalpogʻiston Respublikasi Sogʻliqni saqlash vazirligi mutaxassislari tomonidan endokrinolog-shifokorlar va mazkur yoʻnalish boʻyicha faoliyat olib boruvchi tibbiy hamshiralarga 1-turdagi qandli diabet kasalligiga chalingan bolalar va oʻsmirlarni muqobil insulinlar, insulindan foydalanish qurilmalari hamda oʻzini-oʻzi nazorat qilish vositalari bilan taʼminlash, ovqatlanish madaniyatiga rioya qilishga odatlanishlariga koʻmaklashish boʻyicha zarur tavsiyalar berildi.
Mazkur seminar-trening orqali endokrinolog-shifokorlar hamda mazkur yoʻnalish boʻyicha faoliyat olib boruvchi tibbiy hamshiralar oʻz bilim va malakalarini oshirish imkoniga ega boʻldilar. Shu bilan birga qandli diabet kasalligining 1-turi bilan kasallangan bolalar va oʻsmirlarning ota-onalariga kasallik profilaktikasi hamda bemor bolalarni davolashda yuqori samaradorlikka erishishda kerakli tavsiyalar berildi.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
