"Jadidlar izidan" tanlovining tuman bosqichi oʻtkazildi

Mamlakatimizda yosh avlod oʻrtasida buyuk allomalar, adiblar va mutafakkirlarning boy maʼnaviy merosini keng targʻib qilish, ularning maʼnaviy dunyosini boyitish maqsadida tizimli ishlar olib borilmoqda. Maktabgacha va maktab taʼlimi vazirligi tomonidan umumtaʼlim maktablari va nodavlat taʼlim muassasalari oʻquvchilari oʻrtasida oʻtkazib kelinayotgan "Jadidlar izidan" Respublika tanlovi ham ana shunday ezgu maqsadlarga xizmat qilmoqda.

Mazkur tanlovning yangi mavsumi 2025-yilning oktyabr-dekabr oylarida, 6–8- va 9–10-sinf oʻquvchilari oʻrtasida boʻlib oʻtishi belgilangan.

Tanlov jadidlarizidan.uz saytidan roʻyxatdan oʻtgan oʻquvchilar oʻrtasida dastlab maktab bosqichi, soʻngra tuman bosqichi tarzida tashkil etildi. Har bir maktabdan 6–8-sinflar orasidan 1 nafar va 9–10-sinflar orasidan 1 nafar gʻoliblar saralab olinib, tanlovning tuman bosqichida ishtirok etish huquqini qoʻlga kiritdi. Tanlovning Amudaryo tumani bosqichi joriy yilning 17-oktyabr kuni yuqori saviyada oʻtkazildi. Unda maktab saralash bosqichidan oʻtgan jami 172 nafar oʻquvchi yoshlar qatnashdi.

Ochilish marosimida tuman Maktabgacha va maktab taʼlimi boʻlimi bosh mutaxassisi Zafar Abdullayev oʻquvchi yoshlarni tanlov shartlari bilan tanishtirdi. Tanlov Nizomiga koʻra ishtirokchilar bilimlari 100 ballik tizimda baholandi. Saralash jarayoni Gʻulom Zafariy, Munavvar Qori Abdurashidxonov, Abdulla Qodiriy, Abdurauf Fitrat, Ishoqxon Toʻra Ibrat, Abdulla Avloniy, Abdulhamid Choʻlpon, Mahmudxoʻja Behbudiy singari buyuk jadidlar hayoti va ijodiga oid ikkita shart asosida amalga oshirildi.

1-shart test savollaridan ibora boʻlib, har bir ishtirokchi jadidlarning hayoti va ijodiga oid 25 ta test savoliga 25 daqiqa ichida javob berdi. Eng yuqori ball toʻplaganlar keyingi shartga oʻtish huquqini qoʻlga kiritdi. 2-shart esa jadidlar hayoti va ijodiga bagʻishlanib, ishtirokchilar jadidlar hayoti va ijodiga oid savollarga 5 daqiqa davomida oʻz fikr-mulohazalarini bayon etdilar.

Tanlov soʻngida hakamlar hayʼati tomonidan gʻoliblar aniqlandi. 6–8-sinflar oʻrtasida 1-oʻrin 39-sonli maktabning 8-sinf oʻquvchisi Dilchehra Eshboyevaga nasib qildi. 2-oʻrin 65-maktabning 6-sinf oʻquvchisi Ozoda Sultanovaga, 3-oʻrin esa 17-sonli maktab oʻquvchisi Charosxon Yangiboyeva hamda 82-sonli maktab oʻquvchisi Dilrabo Hayitboyevalarga nasib qildi.

9–10-sinflar oʻquvchilari oʻrtasida oʻtkazilgan tanlov gʻolibligi 13-sonli maktabning 9-sinf oʻquvchisi Sevinchoy Yoʻldashevaga nasib qildi. 2-oʻrinni 63-sonli maktabning 9-sinf oʻquvchisi Maʼrifat Gulmirzayeva hamda 3-oʻrinni 76-sonli maktabning 9-sinf oʻquvchisi Madina Maqsudovalar egallashdi. Har bir sinf toifasi boʻyicha eng yuqori ball toʻplagan 1 nafardan, jami 2 nafar ishtirokchi tanlovning hududiy, yaʼni Qoraqalpogʻiston Respublikasi bosqichida ishtirok etish huquqini qoʻlga kiritdi.

Aytish joizki, jadidlar — xalqimiz maʼnaviyati, maʼrifatparvarlik ruhi va milliy uygʻonish tarixida beqiyos oʻrin tutgan ziyolilardir. Ular ilmu maʼrifat, erkin fikr va zamonaviy taʼlim orqali millatni taraqqiyot sari yetaklashni maqsad qilgan edilar. Bugungi kunda jadidlar hayoti va ijodini yoshlarga oʻrgatish orqali ularda Vatanga muhabbat, milliy gʻurur va maʼnaviy bagʻrikenglik tuygʻulari shakllanadi. Qolaversa, jadidlarning jasorati va fidoyiligi yoshlarga ibrat boʻlib, ularni bilimli, faol va vatanparvar avlod boʻlib yetishishga ilhomlantiradi.

Jadidlar taʼlim va madaniyat orqali xalqni taraqqiyot yoʻliga olib chiqishga harakat qilgan boʻlsalar, bugungi yoshlar ularning orzu va gʻoyalarini davom ettirishlari zarur. Shu bois jadidlar merosini chuqur oʻrganish — bu nafaqat tarixiy burch, balki kelajak uchun maʼnaviy sarmoyadir.

Tanlovning har bir sinf toifasi boʻyicha birinchi oʻrinni egallagan gʻoliblari endilikda tuman sharafini respublika miqyosidagi navbatdagi bosqichda himoya qiladilar. Gʻoliblarga keyingi bosqichda omad va zafarlar tilaymiz.