Asosiy fanlar olimpiadasining tuman bosqichi boshlandi

Amudaryo tumanida 2025-2026 oʻquv yilining eng nufuzli intellektual tadbirlaridan biri – asosiy fanlar olimpiadasining tuman bosqichi boshlandi.

14-oktyabr kuni 1-sonli maktabda olimpiada tuman bosqichining tantanali ochilish marosimi boʻlib oʻtdi. Marosimda Qoraqalpogʻiston Respublikasi Taʼlim markazi direktori Nargiza Matlatipova, Qoraqalpogʻiston Respublikasi  Maktabgacha va maktab taʼlimi vazirligi masʼul xodimi Fazilat Zaripova, tuman ixtisoslashtirilgan maktabidan masʼul xodim Muhayyo Tairova, tuman Maktabgacha va maktab taʼlimi boʻlimi boshligʻi Yalgʻashboy Shamuratov va boʻlim masʼullari ishtirok etishdi.

Tadbirda soʻzga chiqqan masʼullar olimpiadaning yoshlar hayotidagi ahamiyatini taʼkidlab, oʻquvchilarga mazkur bilimlar bellashuvida omad va muvaffaqiyat tiladilar va ishtirokchilarni halollik hamda adolat tamoyillariga qatʼiy rioya etishga chaqirdilar.

Olimpiada Oʻzbekiston Respublikasi Maktabgacha va maktab taʼlimi vazirligining 2025-yil 18-sentyabrdagi hamda Qoraqalpogʻiston Respublikasi maktabgacha va maktab taʼlimi vazirligining 2025-yil 23-sentyabrdagi buyruqlari asosida tashkil etilmoqda. Tuman Maktabgacha va maktab taʼlimi boʻlimi tasarrufidagi umumiy oʻrta taʼlim maktablari oʻquvchilari oʻrtasidagi bellashuvlar 14–23-oktyabr kunlari 1-sonli maktabda oʻtkazilishi belgilangan.

Bu yilgi olimpiadada tumandagi 86 ta umumiy oʻrta taʼlim maktablaridan jami 2774 nafar 9-10-11-sinf oʻquvchilari ishtirok etmoqda. Oʻquvchilar 15 ta fan yoʻnalishi boʻyicha oʻz bilimlarini sinovdan oʻtkazishadi.

Fanlar olimpiadasi shartli ravishda ikki guruhga ajratilgan. Yaʼni matematika, informatika, kimyo, biologiya va fizika fanlaridan ishtirok etayotgan oʻquvchilar I guruhga, tarix, geografiya, rus tili, huquq, ingliz tili, qoraqalpoq tili, ona tili va adabiyot, oʻzbek tili, qozoq tili va adabiyoti, qoraqalpoq tili va adabiyoti kabi fanlar boʻyicha ishtirokchilar esa II guruhga kiritilgan.

Joriy yilgi olimpiadaning asosiy yangiligi va afzalligi I guruh fanlari boʻyicha oʻtkaziladigan sinovlar bilan bogʻliqdir. Ushbu fanlar boʻyicha bellashuvlar 14–18-oktyabr kunlari onlayn shaklda oʻtkazilmoqda. Eng muhimi, oʻquvchilar olimpiada natijalarini sinov yakunida shu vaqtning oʻzidayoq bilib olish imkoniyatiga ega boʻldilar. Bu shaffoflikni oshirish va natijalarni tezkor eʼlon qilishga xizmat qiladi.

II guruh fanlari boʻyicha sinovlar esa anʼanaviy test koʻrinishida 20–23-oktyabr kunlari oʻtkazilishi rejalashtirilgan.

Olimpiadaning tuman bosqichi gʻoliblari keyingi – hududiy bosqichda Amudaryo tumani sharafini himoya qilish imkoniyatiga ega boʻladilar. Hududiy bosqich shaharlar va tumanlararo bellashuvlar gʻoliblari ishtirokida oʻtkaziladi. Bunday keng qamrovli bellashuvlar eng bilimli va iqtidorli oʻquvchilarni saralab olishga xizmat qiladi. Qolaversa, mazkur olimpiada oʻquvchilarning bilim va salohiyatini sinovdan oʻtkazish, iqtidorli yoshlarni aniqlash va ularni qoʻllab-quvvatlashda muhim vosita boʻlishi shubhasiz.

Fursatdan foydalanib, asosiy fanlar olimpiadasining tuman bosqichida ishtirok etayotgan barcha oʻquvchi-yoshlarga omad va zafarlar tilaymiz! Gʻoliblarning esa keyingi bosqichlarda ham muvaffaqiyatli ishtirok etib, tumanimiz sharafini munosib himoya qilishlariga tilakdoshmiz.