DOʻSTLIK MAHALLASIDA HUQUQShUNOSLAR IShTIROKIDA TADBIR OʻTKAZILDI

Davlat va jamiyat taraqqiyotining ildiziga bolta uruvchi eng yoqimsiz, xavfli illat — korruptsiyadir. Shuning uchun ham bugungi kunda mamlakatimizda korruptsiyaga qarshi kurashish har bir vijdonli kishining zimmasidagi masʼuliyatli vazifaga, umummilliy harakatga aylangan. Shu bois, mamlakatimizda har bir davlat idorasi korruptsiyaga qarshi kurashishda masʼul etib belgilanib, keng aholi qatlamlari orasida seminar-treninglar, targʻibot-tashviqot tadbirlari tashkillashtirilmoqda.

Bu borada "Taraqqiyot koʻzgusi" gazetasi tahririyatining Oliy Majlis huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan "Biz korruptsiyaga qarshimiz!" grant loyihasi doirasida amalga oshirilayotgan targʻibot-tashviqot tadbirlari ham oʻzining ijobiy samarasini bermoqda.

Navbatdagi shu kabi targʻibot uchrashuvi 9-oktyabr kuni Mangʻit shahridagi Doʻstlik mahalla fuqarolar yigʻini maʼmuriy binosida oʻtkazildi.

Tadbirda Amudaryo tuman Adliya boʻlimi yuridik xizmat koʻrsatish bosh yuriskonsultlari Abror Tojiboyev, Mansur Matyusupov, Doʻstlik mahallasi masʼullari, mahalla faollari va loyiha koordinatorlari ishtirok etdilar.

Tadbir avvalida Doʻstlik mahalla fuqarolar yigʻini raisi Alisher Saburov korruptsiya illatiga qarshi kurash borasida mahallada amalga oshirilayotgan targʻibot-tashviqot ishlarining samaradorligi haqida soʻz yuritib, bunda aholi ongida korruptsiyaga qarshi murosasizlik kayfiyatini uygʻotishning ahamiyati muhimligini taʼkidladi.

Shundan soʻng loyiha koordinatori Robiya Yoʻldosheva mazkur loyihani amalga oshirishdan koʻzlangan maqsad va kutilayotgan ijobiy natijalar yuzasidan maʼlumotlar berib, jamiyatda korruptsiyaga nisbatan huquqiy immunitetni shakllantirish birinchi navbatda tinch va osoyishta, adolatli va farovon hayot kafolati, shu bilan birga shaxsning kamoloti, Vatan va oilalarning barqaror rivojlanishidagi ahamiyatini alohida eʼtirof etdi.

Tadbir davomida Amudaryo tuman Adliya boʻlimi yuridik xizmat koʻrsatish markazi bosh yuriskonsulti Abror Tojiboyev korruptsion holatlarning oldini olish boʻyicha mamlakatimizda amalga oshirilayotgan ishlar xususida soʻz yuritib, poraxoʻrlik, davlat idoralari rahbarlarining manfaatlar toʻqnashuviga yoʻl qoʻyishlari, firibgarlik, yolgʻon maʼlumotlar, aldov yoʻli bilan davlatning va fuqarolarning mablagʻlari hamda mol-mulklarini oʻzlashtirib olish bilan bogʻliq jinoyatlarga jazo muqarrarligini taʼkidladi. Shuningdek, jamiyatda ishonch va adolat tamoyillarini qaror toptirishda aholining huquqiy savodxonligini oshirish zarurligini bildirdi.

Shuningdek, tuman Adliya boʻlimi yuridik xizmat koʻrsatish markazi bosh yuriskonsulti Mansur Matyusupov soʻnggi paytlarda fuqarolarning ijtimoiy tarmoqlarda berilayotgan turli mazmundagi reklama va eʼlonlar taʼsiriga tushib, aldanib qolishayotganlari, xakerlik hujumlari tufayli bank plastik kartalaridan koʻp miqdorda pul yechib olinishi oqibatida “chuv” tushib qolayotganlari haqida hayotiy misollar keltirib, aholini ogoh boʻlishga daʼvat etdi.

Qizgʻin bahs-munozaralar, savol-javoblar asosida oʻtgan tadbirda loyiha koordinatorlari tomonidan korruptsiyaga qarshi kurash boʻyicha qonunchilikdan koʻchirmalar, bukletlar tarqatilib, mahalla maʼmuriy binosining koʻrinarli joyiga "Korruptsiyaga yoʻq deng!" mavzusidagi chaqiriqlar joylashtirildi.

Malakali huquqshunoslar va mahalla faollari ishtirokida oʻtkazilgan ochiq va oshkora muloqot tarzidagi uchrashuv tadbiri jamiyatda korruptsiyaga qarshi huquqiy immunitetni shakllantirishga qaratilgani bilan muhim ahamiyat kasb etdi.