ДЎСТЛИК МАҲАЛЛАСИДА ҲУҚУҚШУНОСЛАР ИШТИРОКИДА ТАДБИР ЎТКАЗИЛДИ

Давлат ва жамият тараққиётининг илдизига болта урувчи энг ёқимсиз, хавфли иллат — коррупциядир. Шунинг учун ҳам бугунги кунда мамлакатимизда коррупцияга қарши курашиш ҳар бир виждонли кишининг зиммасидаги масъулиятли вазифага, умуммиллий ҳаракатга айланган. Шу боис, мамлакатимизда ҳар бир давлат идораси коррупцияга қарши курашишда масъул этиб белгиланиб, кенг аҳоли қатламлари орасида семинар-тренинглар, тарғибот-ташвиқот тадбирлари ташкиллаштирилмоқда.

Бу борада "Тараққиёт кўзгуси" газетаси таҳририятининг Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган "Биз коррупцияга қаршимиз!" грант лойиҳаси доирасида амалга оширилаётган тарғибот-ташвиқот тадбирлари ҳам ўзининг ижобий самарасини бермоқда.

Навбатдаги шу каби тарғибот учрашуви 9 октябрь куни Манғит шаҳридаги Дўстлик маҳалла фуқаролар йиғини маъмурий биносида ўтказилди.

Тадбирда Амударё туман Адлия бўлими юридик хизмат кўрсатиш бош юрисконсультлари Аброр Тожибоев, Мансур Матюсупов, Дўстлик маҳалласи масъуллари, маҳалла фаоллари ва лойиҳа координаторлари иштирок этдилар.

Тадбир аввалида Дўстлик маҳалла фуқаролар йиғини раиси Алишер Сабуров коррупция иллатига қарши кураш борасида маҳаллада амалга оширилаётган тарғибот-ташвиқот ишларининг самарадорлиги ҳақида сўз юритиб, бунда аҳоли онгида коррупцияга қарши муросасизлик кайфиятини уйғотишнинг аҳамияти муҳимлигини таъкидлади.

Шундан сўнг лойиҳа координатори Робия Йўлдошева мазкур лойиҳани амалга оширишдан кўзланган мақсад ва кутилаётган ижобий натижалар юзасидан маълумотлар бериб, жамиятда коррупцияга нисбатан ҳуқуқий иммунитетни шакллантириш биринчи навбатда тинч ва осойишта, адолатли ва фаровон ҳаёт кафолати, шу билан бирга шахснинг камолоти, Ватан ва оилаларнинг барқарор ривожланишидаги аҳамиятини алоҳида эътироф этди.

Тадбир давомида Амударё туман Адлия бўлими юридик хизмат кўрсатиш маркази бош юрисконсульти Аброр Тожибоев коррупцион ҳолатларнинг олдини олиш бўйича мамлакатимизда амалга оширилаётган ишлар хусусида сўз юритиб, порахўрлик, давлат идоралари раҳбарларининг манфаатлар тўқнашувига йўл қўйишлари, фирибгарлик, ёлғон маълумотлар, алдов йўли билан давлатнинг ва фуқароларнинг маблағлари ҳамда мол-мулкларини ўзлаштириб олиш билан боғлиқ жиноятларга жазо муқаррарлигини таъкидлади. Шунингдек, жамиятда ишонч ва адолат тамойилларини қарор топтиришда аҳолининг ҳуқуқий саводхонлигини ошириш зарурлигини билдирди.

Шунингдек, туман Адлия бўлими юридик хизмат кўрсатиш маркази бош юрисконсульти Мансур Матюсупов сўнгги пайтларда фуқароларнинг ижтимоий тармоқларда берилаётган турли мазмундаги реклама ва эълонлар таъсирига тушиб, алданиб қолишаётганлари, хакерлик ҳужумлари туфайли банк пластик карталаридан кўп миқдорда пул ечиб олиниши оқибатида “чув” тушиб қолаётганлари ҳақида ҳаётий мисоллар келтириб, аҳолини огоҳ бўлишга даъват этди.

Қизғин баҳс-мунозаралар, савол-жавоблар асосида ўтган тадбирда лойиҳа координаторлари томонидан коррупцияга қарши кураш бўйича қонунчиликдан кўчирмалар, буклетлар тарқатилиб, маҳалла маъмурий биносининг кўринарли жойига "Коррупцияга йўқ денг!" мавзусидаги чақириқлар жойлаштирилди.

Малакали ҳуқуқшунослар ва маҳалла фаоллари иштирокида ўтказилган очиқ ва ошкора мулоқот тарзидаги учрашув тадбири жамиятда коррупцияга қарши ҳуқуқий иммунитетни шакллантиришга қаратилгани билан муҳим аҳамият касб этди.