Aholiga yetkazib berilayotgan ichimlik suvining sifati hamda undan oqilona foydalanish holati oʻrganildi

Oʻzbekiston Respublikasi Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspektsiyasining Qoraqalpogʻiston Respublikasi hududiy nazorat qilish inspektsiyasi tomonidan tizimda qonuniylik va shaffoflikni taʼminlash, isteʼmolchilar oʻrtasida tejamkorlik madaniyatini targʻib qilish borasida keng koʻlamli ishlar amalga oshirilmoqda. Inspektsiya faoliyatining asosiy yoʻnalishi – ichimlik suvi va oqova suv tarmoqlaridan oqilona va qonuniy foydalanishni nazorat qilish hamda suv isrofgarchiligiga qarshi kurashishdan iborat.

Inspektsiya mutaxassislari tomonidan muntazam ravishda Respublikaning turli hududlarida ichimlik suvi va oqova suv tarmoqlariga oʻzboshimchalik bilan ulanish va ichimlik suvini behuda isrof qilish holatlarini aniqlash maqsadida oʻrganishlar olib borilmoqda. Jumladan, joriy yil boshidan buyon jami 254 ta byudjet tashkilotida ana shunday oʻrganishlar oʻtkazildi. Natijada 26 ta tashkilotda jiddiy kamchiliklar aniqlanib, tashkilot rahbarlariga kamchiliklarni zudlik bilan bartaraf etish boʻyicha belgilangan tartibda koʻrsatmalar berildi. Qonunbuzarlikka yoʻl qoʻygan 7 nafar masʼul shaxslarga esa Oʻzbekiston Respublikasi Maʼmuriy javobgarlik toʻgʻrisidagi Kodeksining tegishli moddalariga asosan jarimalar solindi. Bu kabi choralar byudjet tashkilotlarida suv resurslaridan foydalanishda masʼuliyatni oshirishga xizmat qilishi shubhasiz.

Aholi salomatligini himoya qilish maqsadida Inspektsiya xodimlari Qoraqalpogʻiston Respublikasi Sanitariya-epidemiologik osoyishtalik va jamoat salomatligi boshqarmasi mutaxassislari bilan yaqin hamkorlikni yoʻlga qoʻygan. 2025-yil boshidan buyon ichimlik suvi tarmoqlaridan kimyoviy hamda biologik koʻrsatkichlarni tekshirish uchun jami 1742 ta sinamalar olinib, laboratoriyalarga yuborildi. Olingan sinamalar asosida ichimlik suvining sifati boʻyicha tegishli xulosalar chiqariladi va aholiga yetkazib berilayotgan suvning xavfsizligi doimiy nazoratga olingan.

Sohadagi tartib-intizomni mustahkamlash borasidagi ishlar ham qatʼiy davom ettirilmoqda. Yil boshidan buyon ichimlik suvi taʼminoti va oqova suv tarmoqlariga oʻzboshimchalik bilan hamda qonunga zid ravishda ulanish, ushbu tarmoqlardan noqonuniy foydalanish boʻyicha jami 402 ta holat aniqlandi. Bu kabi noqonuniy xatti-harakatlar tizimga zarar yetkazish bilan birga, boshqa fuqarolarning suv taʼminotiga ham salbiy taʼsir koʻrsatadi. Aniqlangan holatlar boʻyicha aybdorlarga Maʼmuriy javobgarlik toʻgʻrisidagi Kodeksning tegishli moddalariga muvofiq umumiy qiymati 1 milliard 224 million soʻmlik jarimalar solindi. Bu choralar suvdan noqonuniy foydalanishning oldini olishda muhim ahamiyat kasb etadi.

Inspektsiya xodimlari yaqinda Amudaryo tumanining Namuna mahallasi Tutzor koʻchasidagi xonadonlarda boʻlib oʻrganish ishlarini olib bordilar. Oʻrganishlar davomida aholiga yetkazib berilayotgan ichimlik suvidan namunalar olinib, laboratoriya xodimlari tomonidan tekshirildi hamda olingan namunalardagi ichimlik suvining sifat koʻrsatkichlari amaldagi davlat standartlari talablariga muvofiqligi tasdiqlandi.

Nazorat va jazo choralari bilan bir qatorda, ichimlik suvidan tejamkorlik bilan foydalanish borasidagi targʻibot-tashviqot ishlari ham uzluksiz ravishda amalga oshirilib kelinmoqda. Shu maqsadda Inspektsiya va Respublika Mahallalar uyushmasi oʻrtasida tuzilgan memorandum asosida mahallalarda, shuningdek, ijtimoiy obʼektlarda doimiy oʻrganish va tushuntirish ishlari olib borilmoqda. Yil boshidan buyon joylarda 170 dan ortiq targʻibot-tashviqot tadbirlari oʻtkazilib, ular telekanallarda va ijtimoiy tarmoqlarda keng yoritildi.

Oʻtkazilayotgan targʻibot-tashviqot ishlaridan asosiy maqsad – isteʼmolchilarga ichimlik suvidan oqilona foydalanish, uni tejash va qadrlash madaniyatini singdirish hisoblanadi. Chunki suv resurslarining cheklanganligini hisobga olib, har bir tomchi suvni qadrlash bugungi kunning dolzarb talabidir. Inspektsiyaning bu yoʻnalishdagi nazorat va targʻibot ishlari kelgusida ham tizimli ravishda davom ettiriladi.