Nukus shahridagi madaniyat markazlariga media tur tashkil etildi

Qoraqalpogʻiston Respublikasi Madaniyat vazirligi tashabbusi bilan Nukus shahar Madaniyat boʻlimi hamda unga qarashli madaniyat markazlariga media tur tashkil etildi. Tadbirda ommaviy axborot vositalari vakillari, jurnalistlar, blogerlar hamda vazirlik masʼul xodimlari ishtirok etdilar. Uchrashuvni vazirning matbuot kotibi, axborot siyosati boʻyicha maslahatchisi Gulmira Palvanova olib bordi. Media tur davomida markazlarning faoliyati va erishilgan natijalar haqida batafsil maʼlumotlar berildi.

Nukus shahrida aholiga madaniy xizmat koʻrsatayotgan 6 ta madaniyat markazi faoliyat yuritmoqda. Hozirgi kunda bu muassasalarda jami 86 nafar xodim ishlamoqda. Xodimlarning malakali tarkibi markazlar faoliyatining samaradorligini taʼminlamoqda.

Yoshlarning qiziqishlarini hisobga olgan holda markazlarda turli yoʻnalishlarda 17 ta toʻgarak tashkil etilgan boʻlib, ularga 233 nafar yoshlar va oʻsmirlar qatnashmoqda. Shuningdek, 11 ta havaskor xalq jamoasi faoliyat yuritib, 177 nafar ishtirokchini oʻz saflariga birlashtirgan. Jami 481 nafar havaskor yoshlar bu toʻgarak va jamoalarga aʼzo boʻlgan holda, madaniyat va sanʼat sirlarini oʻrganmoqda, oʻz isteʼdodlarini namoyish etmoqda. Drama, milliy qoʻshiq, estrada, bichish-tikish, milliy oʻyin, baxshichilik, sozandalik va rassomchilik kabi yoʻnalishlar yoshlar orasida katta qiziqish uygʻotmoqda.

Yil boshidan buyon shaharning barcha joylarida jami 288 ta madaniy tadbir oʻtkazildi. Xalq sayllari, bayram sanalari, yubiley kechalari va turli koʻngilochar tomoshalar orqali 55 mingdan ortiq aholiga madaniy xizmat koʻrsatildi. Buning oʻzi markazlarning jamoatchilik bilan olib borayotgan faol ishidan dalolat beradi. Shuningdek, 66 ta pullik madaniy tadbirlar tashkil etilib, salkam 40 million soʻm mablagʻ boʻlimning maxsus hisob raqamiga oʻtkazildi.

Shahar markazidagi 1-sonli madaniyat markazi 2015-yilda taʼmirlangan. 250-oʻrinli tomoshabinlar zaliga ega bu markazda 2 ta toʻgarak va 10 ta maxsus unvonlarga ega jamoalar faoliyat yuritmoqda. Bu markazga 177 nafardan ortiq ishtirokchi jalb etilgan.

2-sonli maxsus madaniyat markazi esa 2022-2023-yillarda "Ochiq byudjet" loyihasi doirasida 1 milliard 800 million soʻm mablagʻ evaziga rekonstruktsiya qilingan. 250-oʻrinli tomoshabinlar zaliga ega bu markazda 3 ta toʻgarak faoliyat yuritmoqda va 56 nafar ishtirokchini oʻz saflariga birlashtirgan. 3-sonli "Tamasha" madaniyat markazi 2020-yilda "Obod mahalla" dasturi doirasida joriy taʼmirlangan.

Markazlardan ayrimlari oʻz binolariga ega emasligi sababli boshqa muassasalarda joylashgan. Jumladan, 4-sonli "Amudaryo" madaniyat markazi koʻzi ojizlar kutubxonasida, 5-sonli "Jayxun" madaniyat markazi esa 20-sonli umumtaʼlim maktabida faoliyat yuritmoqda. Bundan tashqari, 6-sonli "Doʻstlik" madaniyat markazi 4-sonli kar va zaif eshituvchi bolalar maktab-internatida joylashgan boʻlib, imo-ishorali qoʻshiqchilar, mohir qoʻllar va tasviriy sanʼat toʻgaraklariga jami 64 nafar ishtirokchilar qamrab olingan.

Bu markazlarning barchasidagi ijodiy va texnik jamoa oʻz hududidagi aholiga madaniy xizmat koʻrsatish, yoshlarni ijodiy faoliyatga jalb etish va milliy madaniyatimizni saqlash yoʻlida jonbozlik koʻrsatib, samarali mehnat qilishmoqda. Madaniyat markazlarida tashkil qilingan toʻgaraklarda esa hududning minglab yoshlari sanʼatga oshno boʻlib ulgʻaymoqda. Eng muhimi, ushbu markazlar tomonidan aholiga koʻrsatilayotgan madaniy xizmatlar ularning boʻsh vaqtlarini mazmunli oʻtkazish va maroqli hordiq chiqarishiga imkoniyat yaratmoqda.