Нукус шаҳридаги маданият марказларига медиа тур ташкил этилди

Қорақалпоғистон Республикаси Маданият вазирлиги ташаббуси билан Нукус шаҳар Маданият бўлими ҳамда унга қарашли маданият марказларига медиа тур ташкил этилди. Тадбирда оммавий ахборот воситалари вакиллари, журналистлар, блогерлар ҳамда вазирлик масъул ходимлари иштирок этдилар. Учрашувни вазирнинг матбуот котиби, ахборот сиёсати бўйича маслаҳатчиси Гулмира Палванова олиб борди. Медиа тур давомида марказларнинг фаолияти ва эришилган натижалар ҳақида батафсил маълумотлар берилди.

Нукус шаҳрида аҳолига маданий хизмат кўрсатаётган 6 та маданият маркази фаолият юритмоқда. Ҳозирги кунда бу муассасаларда жами 86 нафар ходим ишламоқда. Ходимларнинг малакали таркиби марказлар фаолиятининг самарадорлигини таъминламоқда.

Ёшларнинг қизиқишларини ҳисобга олган ҳолда марказларда турли йўналишларда 17 та тўгарак ташкил этилган бўлиб, уларга 233 нафар ёшлар ва ўсмирлар қатнашмоқда. Шунингдек, 11 та ҳаваскор халқ жамоаси фаолият юритиб, 177 нафар иштирокчини ўз сафларига бирлаштирган. Жами 481 нафар ҳаваскор ёшлар бу тўгарак ва жамоаларга аъзо бўлган ҳолда, маданият ва санъат сирларини ўрганмоқда, ўз истеъдодларини намойиш этмоқда. Драма, миллий қўшиқ, эстрада, бичиш-тикиш, миллий ўйин, бахшичилик, созандалик ва рассомчилик каби йўналишлар ёшлар орасида катта қизиқиш уйғотмоқда.

Йил бошидан буён шаҳарнинг барча жойларида жами 288 та маданий тадбир ўтказилди. Халқ сайллари, байрам саналари, юбилей кечалари ва турли кўнгилочар томошалар орқали 55 мингдан ортиқ аҳолига маданий хизмат кўрсатилди. Бунинг ўзи марказларнинг жамоатчилик билан олиб бораётган фаол ишидан далолат беради. Шунингдек, 66 та пуллик маданий тадбирлар ташкил этилиб, салкам 40 миллион сўм маблағ бўлимнинг махсус ҳисоб рақамига ўтказилди.

Шаҳар марказидаги 1-сонли маданият маркази 2015 йилда таъмирланган. 250 ўринли томошабинлар залига эга бу марказда 2 та тўгарак ва 10 та махсус унвонларга эга жамоалар фаолият юритмоқда. Бу марказга 177 нафардан ортиқ иштирокчи жалб этилган.

2-сонли махсус маданият маркази эса 2022-2023 йилларда "Очиқ бюджет" лойиҳаси доирасида 1 миллиард 800 миллион сўм маблағ эвазига реконструкция қилинган. 250 ўринли томошабинлар залига эга бу марказда 3 та тўгарак фаолият юритмоқда ва 56 нафар иштирокчини ўз сафларига бирлаштирган. 3-сонли "Тамаша" маданият маркази 2020 йилда "Обод маҳалла" дастури доирасида жорий таъмирланган.

Марказлардан айримлари ўз биноларига эга эмаслиги сабабли бошқа муассасаларда жойлашган. Жумладан, 4-сонли "Амударё" маданият маркази кўзи ожизлар кутубхонасида, 5-сонли "Жайхун" маданият маркази эса 20-сонли умумтаълим мактабида фаолият юритмоқда. Бундан ташқари, 6-сонли "Дўстлик" маданият маркази 4-сонли кар ва заиф эшитувчи болалар мактаб-интернатида жойлашган бўлиб, имо-ишорали қўшиқчилар, моҳир қўллар ва тасвирий санъат тўгаракларига жами 64 нафар иштирокчилар қамраб олинган.

Бу марказларнинг барчасидаги ижодий ва техник жамоа ўз ҳудудидаги аҳолига маданий хизмат кўрсатиш, ёшларни ижодий фаолиятга жалб этиш ва миллий маданиятимизни сақлаш йўлида жонбозлик кўрсатиб, самарали меҳнат қилишмоқда. Маданият марказларида ташкил қилинган тўгаракларда эса ҳудуднинг минглаб ёшлари санъатга ошно бўлиб улғаймоқда. Энг муҳими, ушбу марказлар томонидан аҳолига кўрсатилаётган маданий хизматлар уларнинг бўш вақтларини мазмунли ўтказиш ва мароқли ҳордиқ чиқаришига имконият яратмоқда.