"Ijtimoiy himoyaga muhtoj aholi qatlamlariga huquqiy koʻmak" aktsiyasi oʻtkazildi

Oʻzbekistonda ijtimoiy davlat tamoyillarini amalga oshirish, aholining ijtimoiy himoyaga muhtoj qatlamiga har tomonlama yordam koʻrsatish borasida keng koʻlamli ishlar amalga oshirilmoqda. Bugungi kunda davlat siyosatining ustuvor yoʻnalishlaridan biri aholining ehtiyojmand qatlamlarini qoʻllab-quvvatlash, ularning turmush sharoitini yaxshilash va jamiyatda adolat tamoyillarini mustahkamlashga qaratilgan. Bu borada nafaqat moddiy yordam, balki huquqiy koʻmak ham muhim ahamiyat kasb etadi. Chunki koʻpincha bunday fuqarolar oʻz huquqlarini bilmasligi yoki ularni himoya qilish uchun yetarli imkoniyatlarga ega boʻlmasligi sababli turli muammolarga duch kelishadi. Huquqiy koʻmak esa ularga oʻz muammolarini qonuniy yoʻl bilan hal etishda va davlat tomonidan berilgan imtiyozlardan samarali foydalanishda katta yordam beradi.

Adliya vazirining 2025-yil 8-sentyabrdagi “Ijtimoiy himoyaga muhtoj aholi qatlamlariga huquqiy koʻmak” aktsiyasini oʻtkazish toʻgʻrisida”gi buyrugʻi ijrosini taʼminlash maqsadida Amudaryo tumanining Gulzor mahalla fuqarolar yigʻini binosida hamkor tashkilotlar, jumladan tuman Prokuraturasi, Adliya boʻlimi, Yuridik xizmat koʻrsatish markazi va “Inson” ijtimoiy xizmatlar markazi tuman boʻlimi tomonidan keng qamrovli huquqiy aktsiya oʻtkazildi.

Tadbirda ijtimoiy himoyaga muhtoj aholi vakillari ishtirok etib, ularga qonunchilik hujjatlarida belgilangan inson huquqlari kafolatlari va imtiyozlar yuzasidan huquqiy tushuntirish berildi. Ularning huquqiy savodxonligini oshirish maqsadida 100 dan ortiq huquqiy targʻibot materiallari tarqatildi.

Aktsiya davomida fuqarolardan tushgan murojaatlarning deyarli barchasi joyida hal etildi. Jumladan, aksariyat fuqarolarga qonunchilik hujjatlarida belgilangan huquqlar, kafolatlar va imtiyozlar yuzasidan huquqiy tushuntirish berildi. Bir nafar fuqaroning murojaatiga asosan uning xonadoni tuman Sanitariya-epidemiologik osoyishtalik va jamoat salomatligi boʻlimi xodimlari tomonidan dezinfektsiya qilib berildi.

Tadbir doirasida 30 nafar fuqarolar bepul tibbiy koʻrikdan oʻtkazildi. 20 nafar fuqarolarga bepul dori-darmonlar tarqatildi. 3 nafar fuqarolar ultratovush diagnostikasi tekshiruvidan, 2 nafar fuqaro esa elektrokardiogramma koʻrigidan oʻtkazilib, laboratoriya tekshiruvidan oʻtkazilgan 5 nafar fuqarolarga tegishli tartibda shifoxonalarga yoʻllanmalar berildi. Bunday amaliy yordamlar aholining salomatligini mustahkamlashga va ularning ijtimoiy himoyasini taʼminlashga qaratilgan muhim qadamdir.

Xulosa qilib aytganda, Amudaryo tumanida oʻtkazilgan “Ijtimoiy himoyaga muhtoj aholi qatlamlariga huquqiy koʻmak” aktsiyasi davlatning aholiga gʻamxoʻrligining yana bir yorqin namunasi boʻldi. Bu kabi tadbirlar fuqarolarning huquqiy ongi va madaniyatini oshirishga, ularning muammolarini joyida hal etishga va ijtimoiy adolatni qaror toptirishga xizmat qiladi.

Hamkor tashkilotlarning birgalikdagi saʼy-harakatlari tufayli koʻplab ehtiyojmand fuqarolar oʻz huquqlarini himoya qilish va hayotiy muammolarini hal etishda amaliy yordam oldilar. Bu esa jamiyatda oʻzaro ishonch va hamjihatlikni mustahkamlashga xizmat qiladi. Bunday tadbirlarni muntazam ravishda tashkil qilish aholining huquqiy ongini oshirishda va ularni oʻz huquqlaridan xabardor qilishda muhim ahamiyat kasb etishi shubhasiz.