Suv taʼminoti boʻyicha kuz-qish mavsumiga tayyorgarlik ishlari qanday holatda?

Ijtimoiy va energetika obʼektlarining doimiy ravishda, uzluksiz ishlashi aholining hayot sifati va mamlakatning tizimli rivojlanishi uchun muhim ahamiyatga ega. Ayniqsa, sovuq kunlar kirib kelishi bilan energetika resurslari va kommunal xizmatlarga boʻlgan talabning ortishi, bu tizimlarning barqaror va ishonchli ishlashini taʼminlashni taqozo etadi. Uzluksiz elektr energiyasi, tabiiy gaz va toza ichimlik suvi taʼminoti – aholi salomatligi, ijtimoiy barqarorlik va iqtisodiy faollikning asosiy garovidir.

Shu maqsadda, 2025-yil 2-iyul kuni Oʻzbekiston Respublikasi Vazirlar Mahkamasining “Iqtisodiyot tarmoqlarini, ijtimoiy va energetika obʼektlari va koʻp kvartirali uy-joy fondidan 2025/2026-yillar kuz-qish mavsumida barqaror ishlashga tayyorlashni taʼminlash chora-tadbirlari toʻgʻrisida”gi 453-son qarori qabul qilindi. Mazkur qaror ijtimoiy soha obʼektlari, iqtisodiyot tarmoqlari va aholi xonadonlarini kuz-qish mavsumida kafolatlangan energiya resurslari va kommunal xizmatlar bilan taʼminlashga qaratilgan kompleks chora-tadbirlarni oʻz ichiga oladi. Unda ichimlik suvi, kanalizatsiya, issiqlik taʼminoti tizimlarini, elektr va gaz tarmoqlarini taʼmirlash, modernizatsiya qilish va ularning ishonchliligini oshirish boʻyicha aniq vazifalar belgilangan.

Ushbu qaror ijrosi doirasida Qoraqalpogʻiston Respublikasida ham keng koʻlamli ishlar amalga oshirilmoqda. Jumladan, jami 45,2 km ichimlik suvi tarmoqlarini hamda 95 ta nasos agregatlarini mukammal va joriy taʼmirlash belgilangan. Bu boradagi ishlarga Amudaryo tumanida ham alohida eʼtibor qaratilib, tumanda 250 metr uzunlikdagi ichimlik suvi tarmoqlari va 2 ta nasos agregatlarini mukammal taʼmirlash, qolaversa 5,8 km uzunlikdagi ichimlik suvi tarmoqlari va 4 ta nasos agregatlarini joriy taʼmirlash rejalashtirilgan.

Belgilangan vazifalar ijrosini nazorat qilish maqsadida Qoraqalpogʻiston Respublikasi Qurilish va uy-joy kommunal xoʻjaligi sohasida nazorat qilish hududiy inspektsiyasi hamda “Qoraqalpoq suv taʼminoti” aktsiyadorlik jamiyati tuman filiali xodimlari hamkorligida tumanning Boʻz yop ovuli joylashgan “Yarimchi” suv taqsimlash inshootida oʻrganish ishlari olib borildi.

Oʻrganishlar davomida ovul hududida 250 metr uzunlikdagi ichimlik suvi tarmoqlari mukammal taʼmirlangani, buning natijasida hududda istiqomat qiluvchi aholining ichimlik suv taʼminoti sezilarli darajada yaxshilangani va bu boradagi ishlar davom ettirilayotgani aniqlandi.

Mutaxassislar suv tarmoqlari va inshootlarining davlat standartlari va sanitariya-gigiyena normalariga muvofiqligini, suv bosimi barcha isteʼmolchilarga teng taqsimlanishini, tarmoqlarda suvning ifloslanishiga yoʻl qoʻymaslik boʻyicha koʻrilayotgan choralarni koʻzdan kechirdilar. Shuningdek, favqulodda vaziyatlarda tezkor chora koʻrish imkoniyatlari, energiya tejamkor va ekologik toza texnologiyalardan foydalanish holati, tizimning zaxira qismlari va jihozlari mavjudligiga alohida eʼtibor qaratildi.

Sababi, aholining toza ichimlik suvi bilan uzluksiz taʼminlanishi uning turmush sifati va salomatligiga bevosita taʼsir koʻrsatadi. Sifatli ichimlik suvi koʻplab yuqumli kasalliklarning oldini olishga, inson organizmining sogʻlom rivojlanishiga xizmat qiladi. Ayniqsa, bolalar salomatligi uchun toza ichimlik suvining ahamiyati beqiyos. Shuningdek, uzluksiz suv taʼminoti aholining maishiy sharoitlarini yaxshilab, ularning vaqtini tejashga va turmush madaniyatini yuksaltirishga imkon beradi.

Amudaryo tumanida ichimlik suv taʼminoti tizimini yaxshilash borasida amalga oshirilayotgan bu kabi ishlar davlatimizning aholi salomatligi va farovonligini taʼminlashga qaratayotgan yuksak eʼtiborining amaldagi ifodasidir.