Сув таъминоти бўйича куз-қиш мавсумига тайёргарлик ишлари қандай ҳолатда?

Ижтимоий ва энергетика объектларининг доимий равишда, узлуксиз ишлаши аҳолининг ҳаёт сифати ва мамлакатнинг тизимли ривожланиши учун муҳим аҳамиятга эга. Айниқса, совуқ кунлар кириб келиши билан энергетика ресурслари ва коммунал хизматларга бўлган талабнинг ортиши, бу тизимларнинг барқарор ва ишончли ишлашини таъминлашни тақозо этади. Узлуксиз электр энергияси, табиий газ ва тоза ичимлик суви таъминоти – аҳоли саломатлиги, ижтимоий барқарорлик ва иқтисодий фаолликнинг асосий гаровидир.

Шу мақсадда, 2025 йил 2 июль куни Ўзбекистон Республикаси Вазирлар Маҳкамасининг “Иқтисодиёт тармоқларини, ижтимоий ва энергетика объектлари ва кўп квартирали уй-жой фондидан 2025/2026 йиллар куз-қиш мавсумида барқарор ишлашга тайёрлашни таъминлаш чора-тадбирлари тўғрисида”ги 453-сон қарори қабул қилинди. Мазкур қарор ижтимоий соҳа объектлари, иқтисодиёт тармоқлари ва аҳоли хонадонларини куз-қиш мавсумида кафолатланган энергия ресурслари ва коммунал хизматлар билан таъминлашга қаратилган комплекс чора-тадбирларни ўз ичига олади. Унда ичимлик суви, канализация, иссиқлик таъминоти тизимларини, электр ва газ тармоқларини таъмирлаш, модернизация қилиш ва уларнинг ишончлилигини ошириш бўйича аниқ вазифалар белгиланган.

Ушбу қарор ижроси доирасида Қорақалпоғистон Республикасида ҳам кенг кўламли ишлар амалга оширилмоқда. Жумладан, жами 45,2 км ичимлик суви тармоқларини ҳамда 95 та насос агрегатларини мукаммал ва жорий таъмирлаш белгиланган. Бу борадаги ишларга Амударё туманида ҳам алоҳида эътибор қаратилиб, туманда 250 метр узунликдаги ичимлик суви тармоқлари ва 2 та насос агрегатларини мукаммал таъмирлаш, қолаверса 5,8 км узунликдаги ичимлик суви тармоқлари ва 4 та насос агрегатларини жорий таъмирлаш режалаштирилган.

Белгиланган вазифалар ижросини назорат қилиш мақсадида Қорақалпоғистон Республикаси Қурилиш ва уй-жой коммунал хўжалиги соҳасида назорат қилиш ҳудудий инспекцияси ҳамда “Қорақалпоқ сув таъминоти” акциядорлик жамияти туман филиали ходимлари ҳамкорлигида туманнинг Бўз ёп овули жойлашган “Яримчи” сув тақсимлаш иншоотида ўрганиш ишлари олиб борилди.

Ўрганишлар давомида овул ҳудудида 250 метр узунликдаги ичимлик суви тармоқлари мукаммал таъмирлангани, бунинг натижасида ҳудудда истиқомат қилувчи аҳолининг ичимлик сув таъминоти сезиларли даражада яхшилангани ва бу борадаги ишлар давом эттирилаётгани аниқланди.

Мутахассислар сув тармоқлари ва иншоотларининг давлат стандартлари ва санитария-гигиена нормаларига мувофиқлигини, сув босими барча истеъмолчиларга тенг тақсимланишини, тармоқларда сувнинг ифлосланишига йўл қўймаслик бўйича кўрилаётган чораларни кўздан кечирдилар. Шунингдек, фавқулодда вазиятларда тезкор чора кўриш имкониятлари, энергия тежамкор ва экологик тоза технологиялардан фойдаланиш ҳолати, тизимнинг захира қисмлари ва жиҳозлари мавжудлигига алоҳида эътибор қаратилди.

Сабаби, аҳолининг тоза ичимлик суви билан узлуксиз таъминланиши унинг турмуш сифати ва саломатлигига бевосита таъсир кўрсатади. Сифатли ичимлик суви кўплаб юқумли касалликларнинг олдини олишга, инсон организмининг соғлом ривожланишига хизмат қилади. Айниқса, болалар саломатлиги учун тоза ичимлик сувининг аҳамияти беқиёс. Шунингдек, узлуксиз сув таъминоти аҳолининг маиший шароитларини яхшилаб, уларнинг вақтини тежашга ва турмуш маданиятини юксалтиришга имкон беради.

Амударё туманида ичимлик сув таъминоти тизимини яхшилаш борасида амалга оширилаётган бу каби ишлар давлатимизнинг аҳоли саломатлиги ва фаровонлигини таъминлашга қаратаётган юксак эътиборининг амалдаги ифодасидир.