Tuman Prokuraturasi masʼullari soha faxriylarining xonadonlariga borib, ularni bayram bilan tabrikladi

Har bir jamiyatda ustozlarga boʻlgan hurmat va ehtirom yuksak qadriyat hisoblanadi. Ular bizga nafaqat bilim va hunar oʻrgatadi, balki hayotda toʻgʻri yoʻlni topishga, komil inson boʻlib kamolga yetishimizga yordam beradi. Bu muhim anʼana prokuratura tizimida ham izchil davom ettirib kelinmoqda. Mustaqillik bayrami arafasida Amudaryo tumani prokuraturasi xodimlari tizim faxriylarini bayram bilan muborakbod etish maqsadida ularning xonadonlariga tashrif buyurishdi.

Tuman prokurori Bahrom Masharipov boshchiligida masʼullar dastlab prokuratura tizimida turli lavozimlarda ishlagan faxriy Gulchehra Saparbayevaning xonadoniga tashrif buyurib, uning holidan xabar olishdi.

Nafaqadagi faxriy oʻz shogirdlari va izdoshlarining tashrifidan mamnun boʻlib, bugungi kunda huquqni muhofaza qilish organlari, xususan, prokuratura tizimida amalga oshirilayotgan islohotlardan faxrlanishini bildirdi. U oʻz kasbiy faoliyati davomida toʻplagan boy tajribasi bilan oʻrtoqlashar ekan, izdoshlariga qonun ustuvorligini taʼminlashda doimo adolat va halollikni birinchi oʻringa qoʻyish zarurligini taʼkidladi. Samimiy suhbat davomida faxriy oʻzining uzoq yillik mehnatlari eʼtibordan chetda qolmaganidan mamnunligini, bunday tashriflar unga kuch-gʻayrat bagʻishlashini aytib, yoshlarga oʻz maslahatlarini berdi.

Shundan soʻng, umr boʻyi prokuratura sohasida fidoiy mehnat qilgan, koʻp yillar davomida tuman prokurori lavozimida ishlagan Gulora Bobojonovaning xonadoniga ham tashrif buyurildi.

Uchrashuv davomida Gulora Bobojonova prokuratura tizimidagi koʻp yillik faoliyatini, oʻsha davrdagi qiyinchiliklar va erishilgan yutuqlarni eslab, bugungi kunda sohada erishilayotgan yutuqlar, yaratilgan sharoitlardan mamnunligini izhor qildi. U yosh hamkasblariga murojaat qilib, xalqning ishonchini oqlash, har bir murojaat ortida inson taqdiri turganini unutmaslik kerakligini alohida taʼkidladi. Uning fidoyiligi va kasbiga sodiqligi tashrif buyurganlar uchun chinakam ibrat namunasi boʻldi.

Undan keyin esa masʼullar prokuratura tizimining yana bir faxriysi Jumamurat Xaytbayevning xonadoniga bordilar. Jumamurat Xaytbayev ham oʻz navbatida prokuratura xodimlarining tashrifidan gʻoyatda xursand boʻlganini yashirmadi. U oʻzining sermazmun hayot yoʻli, prokuratura tizimida adolatni qaror toptirish yoʻlidagi mashaqqatli mehnatlari haqida soʻzlab berdi. Faxriyning har bir soʻzida oʻz kasbiga boʻlgan cheksiz muhabbat va masʼuliyat hissi mujassam edi. U yoshlarga oq fotiha berib, ularning kelgusi ishlariga muvaffaqiyatlar tiladi. Bunday samimiy va dildan qilingan suhbatlar yosh xodimlar qalbida unutilmas iz qoldirdi.

Tashrif davomida barcha faxriylarga Oʻzbekiston Respublikasi prokuratura organlari faxriylarini ijtimoiy qoʻllab-quvvatlash jamoatchilik markazining bayram tabriklari oʻqib eshittirilib, qimmatbaho sovgʻalar topshirildi.

Bunday eʼtibor va eʼtirof fidoyi va kamtarin insonlar, oʻz sohasining yetuk bilimdonlari, prokuratura organlarida uzoq yillar samarali ishlagan faxriylarning mehnati qadrlanayotganini koʻrsatadi. Bu tashabbus mamlakatimizda inson omiliga berilayotgan eʼtiborning yorqin namunasidir.

Ushbu tashrif prokuratura organlarida ham ustoz-shogird anʼanalari davom etayotganining amaliy isboti boʻldi. Bu yerda tajribali kadrlar yosh mutaxassislarga bilim va tajriba ulashib, faxriylarning hayot yoʻli yoshlar uchun ibrat maktabi sifatida qadrlanmoqda. Bu kabi ezgu amallar jamiyatda oʻzaro hurmat va hamjihatlikni mustahkamlashda, adolatni qaror toptirishda va inson huquqlarini izchil himoya qilishda muhim vosita boʻlishi shubhasiz.