PROFILAKTIKA KUNI: PROKURATURA, IIB VA MAHALLA HAMKORLIGIDA XAVFSIZ MUHIT YaRATILMOQDA

Yurt tinchligi va barqaror rivoji, avvalo, aholi oʻrtasida huquqbuzarlik va jinoyat sodir etilishining oldini olishga qaratilgan tizimli ishlar samarasiga bogʻliq. Mamlakatimizda jinoyatchilikning barvaqt oldini olish, jazo muddatini oʻtab qaytgan shaxslarni jamiyatga moslashtirish va ularni qayta jinoyat sodir etishdan saqlashga alohida eʼtibor qaratilmoqda.

Ayniqsa, haftaning har payshanba kuni profilaktika kuni sifatida belgilanib, shu kuni turli targʻibot va tushuntirish tadbirlari amalga oshirilmoqda. Profilaktika kuni doirasida mahallalarda fuqarolar bilan ochiq muloqotlar, huquqiy savodxonlikni oshirishga qaratilgan seminarlar, turli profilaktik nazorat tadbirlari va yangi ish oʻrinlarini yaratishga doir amaliy uchrashuvlar oʻtkazilib kelinmoqda.

Ana shunday tadbirlardan biri Amudaryo tumani Ichki ishlar boʻlimi tomonidan ham tashkillashtirildi. Ochiq muloqot tarzida oʻtkazilgan mazkur tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova, tuman prokurori, adliya maslahatchisi Bahrom Masharipov, tuman IIB boshligʻi, podpolkovnik Muhammedali Xojamuratov, IIB boshligʻi oʻrinbosarlari, shuningdek, IIB Probatsiya guruhi hisobida jazo muddatini oʻtayotgan hamda jazoni ijro etish maskanlarida jazo muddatini oʻtab qaytgan fuqarolar ishtirok etdilar.

Yuzma-yuz ochiq muloqot tarzida oʻtkazilgan tadbirda tashkilotchilar va masʼullar tomonidan Oʻzbekiston Respublikasi Prezidentining 2025-yil 3-yanvar kunidagi “2025-yilda Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori mazmun-mohiyati yuzasidan batafsil tushunchalar berildi.

Shuningdek, mazkur qarorda belgilangan vazifalar, xususan, mahallalarda kriminogen vaziyatni bartaraf etish, probatsiya hisobida jazo muddatini oʻtayotgan shaxslarni toʻgʻri yoʻlga yoʻnaltirish, ularning ijtimoiy faolligini oshirish uchun zarur shart-sharoitlar yaratish va har tomonlama, ayniqsa, huquqiy yoʻnalishda qoʻllab-quvvatlash masalalari atroflicha muhokama etildi.

Tadbir davomida oʻzaro fikr almashuvlar ham boʻldi. Unga koʻra, tuman prokurori, adliya maslahatchisi Bahrom Masharipov, IIB boshligʻi, podpolkovnik Muhammedali Xojamuratovlar mahalla faollari, psixologlar va profilaktika inspektorlari oʻrtasida hamkorlikni mustahkamlash orqali har bir fuqaroning holati individual oʻrganilishi lozimligini taʼkidladilar. Shu tarzdagi hamkorlik natijasida amalga oshirilgan samarali ishlar boʻyicha misollar, mahallalar tajribalari va ularning ahamiyati xususida soʻz yuritdilar.

Chindan ham, bugungi kunda probatsiya hisobida turgan shaxslarga hayotini yangidan boshlash, qilgan xatolaridan xulosa chiqargan holda mehnat faoliyati bilan band boʻlish, taʼlim olish va tadbirkorlik bilan shugʻullanishlari uchun davlat tomonidan keng imkoniyatlar yaratib berilmoqda. Bu esa ularning hayotda oʻz oʻrnini topishlariga zamin yaratadi.

Tuman Ichki ishlar boʻlimining Probatsiya guruhi aʼzolari probatsiya hisobida jazo muddatlarini oʻtayotgan shaxslar bilan muntazam ravishda uchrashib, ularning muammolarini tinglab, hal qilish choralarini koʻrib kelmoqda. Jumladan, ishga joylashtirish, kasb-hunar oʻrgatish, ijtimoiy yordam ajratish boʻyicha murojaatlar mutasaddilar tomonidan oʻrganilib, ularni ijobiy hal etish choralari koʻrilmoqda.

Inson shaʼni va qadr-qimmati hamma narsadan yuksak tutiladigan mamlakatimizda amalga oshirilayotgan islohotlar jarayonida inson — davlat — jamiyat tamoyili amalda oʻz ifodasini topmoqda. Prokuratura, IIB va Mahalla hamkorligida oʻtkazilayotgan profilaktik tadbirlarning tizimli va taʼsirchan tashkil etilishi esa fuqarolar manfaatlarini taʼminlashda muhim ahamiyat kasb etmoqda.

ROBIYa YOʻLDOShEVA.