ПРОФИЛАКТИКА КУНИ: ПРОКУРАТУРА, ИИБ ВА МАҲАЛЛА ҲАМКОРЛИГИДА ХАВФСИЗ МУҲИТ ЯРАТИЛМОҚДА

Юрт тинчлиги ва барқарор ривожи, аввало, аҳоли ўртасида ҳуқуқбузарлик ва жиноят содир этилишининг олдини олишга қаратилган тизимли ишлар самарасига боғлиқ. Мамлакатимизда жиноятчиликнинг барвақт олдини олиш, жазо муддатини ўтаб қайтган шахсларни жамиятга мослаштириш ва уларни қайта жиноят содир этишдан сақлашга алоҳида эътибор қаратилмоқда.

Айниқса, ҳафтанинг ҳар пайшанба куни профилактика куни сифатида белгиланиб, шу куни турли тарғибот ва тушунтириш тадбирлари амалга оширилмоқда. Профилактика куни доирасида маҳаллаларда фуқаролар билан очиқ мулоқотлар, ҳуқуқий саводхонликни оширишга қаратилган семинарлар, турли профилактик назорат тадбирлари ва янги иш ўринларини яратишга доир амалий учрашувлар ўтказилиб келинмоқда.

Ана шундай тадбирлардан бири Амударё тумани Ички ишлар бўлими томонидан ҳам ташкиллаштирилди. Очиқ мулоқот тарзида ўтказилган мазкур тадбирда туман ҳокими ўринбосари, Оила ва хотин-қизлар бўлими бошлиғи Гўзал Сабурова, туман прокурори, адлия маслаҳатчиси Баҳром Машарипов, туман ИИБ бошлиғи, подполковник Муҳаммедали Хожамуратов, ИИБ бошлиғи ўринбосарлари, шунингдек, ИИБ Пробация гуруҳи ҳисобида жазо муддатини ўтаётган ҳамда жазони ижро этиш масканларида жазо муддатини ўтаб қайтган фуқаролар иштирок этдилар.

Юзма-юз очиқ мулоқот тарзида ўтказилган тадбирда ташкилотчилар ва масъуллар томонидан Ўзбекистон Республикаси Президентининг 2025 йил 3 январь кунидаги “2025 йилда Республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори мазмун-моҳияти юзасидан батафсил тушунчалар берилди.

Шунингдек, мазкур қарорда белгиланган вазифалар, хусусан, маҳаллаларда криминоген вазиятни бартараф этиш, пробация ҳисобида жазо муддатини ўтаётган шахсларни тўғри йўлга йўналтириш, уларнинг ижтимоий фаоллигини ошириш учун зарур шарт-шароитлар яратиш ва ҳар томонлама, айниқса, ҳуқуқий йўналишда қўллаб-қувватлаш масалалари атрофлича муҳокама этилди.

Тадбир давомида ўзаро фикр алмашувлар ҳам бўлди. Унга кўра, туман прокурори, адлия маслаҳатчиси Баҳром Машарипов, ИИБ бошлиғи, подполковник Муҳаммедали Хожамуратовлар маҳалла фаоллари, психологлар ва профилактика инспекторлари ўртасида ҳамкорликни мустаҳкамлаш орқали ҳар бир фуқаронинг ҳолати индивидуал ўрганилиши лозимлигини таъкидладилар. Шу тарздаги ҳамкорлик натижасида амалга оширилган самарали ишлар бўйича мисоллар, маҳаллалар тажрибалари ва уларнинг аҳамияти хусусида сўз юритдилар.

Чиндан ҳам, бугунги кунда пробация ҳисобида турган шахсларга ҳаётини янгидан бошлаш, қилган хатоларидан хулоса чиқарган ҳолда меҳнат фаолияти билан банд бўлиш, таълим олиш ва тадбиркорлик билан шуғулланишлари учун давлат томонидан кенг имкониятлар яратиб берилмоқда. Бу эса уларнинг ҳаётда ўз ўрнини топишларига замин яратади.

Туман Ички ишлар бўлимининг Пробация гуруҳи аъзолари пробация ҳисобида жазо муддатларини ўтаётган шахслар билан мунтазам равишда учрашиб, уларнинг муаммоларини тинглаб, ҳал қилиш чораларини кўриб келмоқда. Жумладан, ишга жойлаштириш, касб-ҳунар ўргатиш, ижтимоий ёрдам ажратиш бўйича мурожаатлар мутасаддилар томонидан ўрганилиб, уларни ижобий ҳал этиш чоралари кўрилмоқда.

Инсон шаъни ва қадр-қиммати ҳамма нарсадан юксак тутиладиган мамлакатимизда амалга оширилаётган ислоҳотлар жараёнида инсон — давлат — жамият тамойили амалда ўз ифодасини топмоқда. Прокуратура, ИИБ ва Маҳалла ҳамкорлигида ўтказилаётган профилактик тадбирларнинг тизимли ва таъсирчан ташкил этилиши эса фуқаролар манфаатларини таъминлашда муҳим аҳамият касб этмоқда.

РОБИЯ ЙЎЛДОШЕВА.