TUMAN PROKURORI B. MAShARIPOV QORAMON MAHALLASIDAGI IJTIMOIY HIMOYaGA MUHTOJ AHOLIGA BAYRAMONA KAYFIYaT ULAShDI

Yurtimizda hamisha oʻzaro mehr-oqibat, saxovat, muruvvat kabi azaliy qadriyatlarimiz, xalqimizga xos ezgu fazilatlar ulugʻlab kelingan. Ehtiyojmand kishilar, nogironligi boʻlgan shaxslarni hamda ogʻir ahvolga tushib qolgan aholini har tomonlama qoʻllab-quvvatlash, oila va mahallalarda mehr-oqibat muhitini mustahkamlash, yoshi ulugʻ insonlarga gʻamxoʻrlik koʻrsatishga alohida eʼtibor qaratilgan.

Bugungi kunda ham bu kabi ezgu ishlar davom etmoqda va aholi bilan doimiy muloqot qilish, ularni qiynayotgan muammolarni hal etishning yangi mexanizm va samarali usullarini joriy etish olib borilayotgan islohotlarning ustuvor yoʻnalishiga aylandi.

Soʻnggi yillarda aholining ijtimoiy himoyasini kuchaytirish, davlat tomonidan fuqarolarga ijtimoiy xizmat va yordamlar koʻrsatish koʻlami hamda turlarini kengaytirish boʻyicha tizimli ishlar amalga oshirilmoqda. Bugungi kunda aholiga ijtimoiy yordam koʻrsatish boʻyicha ezgu harakatlar eng chekka hududlargacha yetib borayotganidan ayonki, “Hamma narsa inson qadri uchun!” tamoyili asosida amalga oshirilayotgan barcha ezgu ishlar har bir insonning hayotdan rozi yashashini taʼminlashga qaratilgan.

Oʻzbekiston Respublikasi Mustaqilligining 34-yilligi munosabati bilan Amudaryo tuman prokurori Bahrom Masharipov Qoramon mahallasidagi ogʻir ijtimoiy vaziyatga tushib qolgan, nogironligi boʻlgan fuqarolar istiqomat qiluvchi xonadonlarga, shuningdek, kam taʼminlangan, boquvchisini yoʻqotgan oilalarga tashrif buyurib, ularning turmush sharoitlari bilan yaqindan tanishdi. Har bir xonadon va oila hayotiga doir muammolarni oʻrganib, fuqarolarning taklif va istaklarini eshitdi. Oʻzgalar parvarishiga muhtoj, kam taʼminlangan va nogironligi boʻlgan fuqarolarga quvonchli kayfiyat ulashib, ularning bayram dasturxonlari uchun sarxil oziq-ovqat mahsulotlarini berdi.

Shuningdek, tuman prokurori mahallada faoliyat olib boruvchi kompleks ijtimoiy xizmat koʻrsatish xodimi tomonidan amalga oshirilayotgan ishlar bilan ham yaqindan tanishdi.

Amudaryo tumani markazidan 34 chaqirim masofa uzoqlikdagi Qoramon mahallasida aholining ijtimoiy himoyaga muhtoj qatlamiga kompleks ijtimoiy xizmat koʻrsatish yoʻnalishida tizimli ishlar yoʻlga qoʻyilgan. Ayni paytda mahalla hududidagi xonadonlarda 4456 nafar aholi istiqomat qiladi. Joriy yil boshida “Mahalla yettiligi” aʼzolari bilan hamkorlikda “Inson” ijtimoiy xizmat koʻrsatish markazi Amudaryo tuman boʻlimining mahalladagi kompleks xizmat koʻrsatuvchi ijtimoiy xodimi Sevara Ismoilova tomonidan uyma-uy kirib borib oʻtkazilgan xatlov natijalariga koʻra, 139 ta oila kam taʼminlangan, kambagʻal oilalar roʻyxatiga kiritildi. Shuningdek, 144 nafar oʻzgalar parvarishiga muhtoj, nogironligi bor boʻlgan fuqarolar roʻyxati shakllantirildi.

Prezidentimiz tashabbusi bilan mahallalarda kompleks xizmat koʻrsatuvchi ijtimoiy xodim lavozimi joriy etilib, ijtimoiy xizmatlar mahalla darajasigacha tushirilgani oʻzgalar parvarishiga muhtoj, nogironligi boʻlgan fuqarolar hayot tarzini ijobiy va yaxshi tomonga oʻzgartirish imkonini yaratdi.

Ushbu tizim faoliyatini samarali yoʻlga qoʻyish maqsadida Qoramon mahallasidagi ijtimoiy himoyaga muhtoj aholining toʻliq bazasini shakllantirish boʻyicha tizimli ishlar amalga oshirildi. Unga koʻra, aholi xonadonlarida yashovchi 12 toifadagi fuqarolar alohida roʻyxatga olindi va ularning turmush tarzi individual tarzda oʻrganilib, ijtimoiy xizmatlar koʻrsatish choralari koʻrildi. Chunki oddiy insonlar bilan yuzma-yuz uchrashib, ularning turmushida uchrayotgan chigal masalalarini hal etib berish, koʻmak koʻrsatish, ayniqsa, insonlarning dard-u tashvishlariga yelkadosh boʻlib, muammolariga yechim qidirish – oliy qadriyat hisoblanadi.

Ushbu yoʻnalishda joriy yilning bugungi kunigacha ijtimoiy himoyaga muhtoj, ishsiz va nogironligi boʻlgan shaxslarning ota-onalarining bandligini taʼminlash maqsadida ulardan 12 nafariga 80 yoshga toʻlgan keksalarga hamda 1-guruh nogironligi boʻlgan shaxslarga qarab turish haqiqiy holatlarini tekshirish dalolatnomalari rasmiylashtirildi. Shuningdek, 3 nafar nogironligi boʻlgan fuqarolarga protez-ortopediya moslamalari yetkazib berildi. Bu tarzda aholiga koʻrsatilayotgan ijtimoiy xizmatlar va yordamlar natijasida ogʻir ahvoldagi shaxslarning ijtimoiylashuviga erishilmoqda.

Tuman prokurori Bahrom Masharipov shu kuni mahalladagi kam taʼminlangan, ijtimoiy himoyaga, oʻzgalar parvarishiga muhtoj insonlarning oilalarida boʻlib, ular bilan samimiy, dildan suhbatlashdi, Mustaqilligimizning 34-yilligi bayrami bilan tabriklab, bayramona kayfiyat ulashdi.

RAVShAN BAHROMOV.