YaNGI OʻQUV YILINING ILK QOʻNGʻIROQ SADOLARI YaNGRADI

Bugun, 2-sentyabr kuni yurtimizdagi barcha umumtaʼlim maktablarida hayajonli va unutilmas sanalardan biri — “Bilimlar kuni” bayrami keng nishonlanib, yangi oʻquv yilidagi "Birinchi qoʻngʻiroq" sadolari yangradi. Bu sana nafaqat oʻquvchilar va ularning ota-onalari, balki butun xalqimiz uchun ham chinakam bayram, desak, mubolagʻa boʻlmaydi. Zero, bilimga qoʻyilgan har bir qadam — kelajak sari tashlangan ishonchli odimdir.

Amudaryo tumanidagi 22-sonli umumtaʼlim maktabida ham ushbu ulugʻ kun tantanali tarzda, katta quvonch va hayajon bilan nishonlandi. Maktab hovlisi bayramona bezatilib, oʻquvchilarning begʻubor quvonchi, ota-onalarning faxrli nigohlari va ustozlarning samimiy tabassumlari bir-biriga uygʻunlashib, bayram kayfiyatini yanada oshirdi.

Tadbirda Amudaryo tuman hokimi Sobir Xoʻjametov, tuman Maktabgacha va maktab taʼlimi boʻlimi boshligʻi Yalgʻash Shomuratov ishtirok etib, bolajonlarni yangi oʻquv yilining boshlanishi hamda “Bilimlar kuni” bilan qizgʻin tabrikladilar. Tuman hokimi oʻz nutqida maktab ostonasiga qadam qoʻygan kichkintoylarga hamda barcha oʻquvchilarga samimiy tilaklarini izhor qildi.

Bayram tadbirida boshlangʻich sinf oʻquvchilari tomonidan Vatan madhi tarannum qilingan kuy-qoʻshiqlar yangradi, sahnada rang-barang raqslar ijro etilib, yigʻilganlarga bayramona kayfiyat ulashildi. Ularning begʻubor ovozlari va joʻshqin raqslari barchaning qalbiga quvonch bagʻishladi.

Birinchi sinf ostonasiga ilk bor qadam bosayotgan kichkintoylarga muhtaram Prezidentimizning esdalik sovgʻalari topshirilishi bolajonlar uchun bir olam quvonch bagʻishladi. Kichkintoylarning yuzida paydo boʻlgan begʻubor tabassumlar — bu ezgu eʼtibor va gʻamxoʻrlikning yorqin ifodasi boʻldi.

Shundan soʻng, yangi oʻquv yilining ilk qoʻngʻirogʻi jarangladi. Qoʻngʻiroq sadosi ilmga chanqoq oʻquvchilar qalbiga quvonch bagʻishlab, ularni yangi marralar sari chorladi. Shu tariqa sinfxonalarda dars mashgʻulotlari boshlandi, bilim olish sari ilk qadamlar qoʻyildi.

Shu kuni tumanimiz boʻylab barcha 86 ta umumtaʼlim maktablarida “Bilimlar kuni” keng nishonlandi. Sana munosabati bilan tuman hokimi Sobir Xoʻjametov boshchiligidagi rahbarlar tumanning eng chekka hududi boʻlgan Nazarxon ovulidagi 3-sonli hamda 58-sonli maktablarga tashrif buyurib, bolajonlarni yangi oʻquv yili bilan samimiy tabrikladilar.

Tashrif chogʻida tuman hokimi maktab maʼmuriyati va ota-onalar bilan yaqindan suhbat qurib, oʻquvchilarning yaxshi oʻqib, bilim olishlari uchun yaratilgan sharoitlarni oʻrgandi. Tuman hokimi oʻz tabrik soʻzida yurtimizda taʼlim-tarbiya rivoji yoʻlida amalga oshirilayotgan keng koʻlamli islohotlar va ularning amaldagi ijrosi, erishilayotgan yutuqlar xususida soʻz yuritdi. Oʻquvchilarga imkoniyatlardan samarali foydalanib, chuqur bilim olib, yuksak maqsadlarga intilib, kelgusida Vatanimiz ravnaqiga munosib hissa qoʻshadigan barkamol insonlar boʻlib voyaga yetishlariga toʻla ishonishini bildirdi.

Darhaqiqat, bugun yurtimizda taʼlim-tarbiya tizimini tubdan yangilash, uni xalqaro talablarga mos darajaga olib chiqish davlat siyosatining eng ustuvor yoʻnalishlaridan biriga aylangan. Maktabgacha taʼlimdan tortib oliy taʼlimgacha boʻlgan barcha bosqichlarda izchil islohotlar olib borilmoqda.

Zamonaviy maktablar, bolalar bogʻchalari va oliy taʼlim muassasalari binolari qurilmoqda, mavjudlari esa kapital taʼmirlanib, oʻquvchilar uchun barcha sharoitlar yaratilmoqda.

Birgina joriy yilning oʻzida Amudaryo tumanida investitsiya dasturiga asosan Choykoʻl ovulidagi 59-sonli maktabda umumiy qiymati 4 milliard 687 million soʻmlik qurilish ishlari olib borilmoqda. Ushbu loyiha doirasida 180 oʻquvchi oʻrinli 2 qavatli oʻquv binosi va 12x24 metr oʻlchamli sport zali bunyod etilmoqda.

Shuningdek, 2025-yilgi investitsiya dasturi asosida Boʻzyop ovulidagi 68-sonli maktabga qiymati 5 milliard 950 million soʻmlik yangi binolar qurilmoqda. Loyihaga koʻra, 330 oʻquvchi oʻrinli 3 qavatli oʻquv binosi va 12x24 metr oʻlchamli sport zali qurilishi jarayonlari yuqori surʼatlarda davom etmoqda.

Barcha umumiy oʻrta taʼlim maktablari binolari 2025-2026 oʻquv yiliga oʻquvchilarni qabul qilishga tayyor holatga keltirilib, mahalliy byudjet va homiylik mablagʻlari hisobidan barcha maktablarning sinf xonalari toʻliq kosmetik taʼmirlangani oʻquvchilar uchun qulayliklar yaratmoqda.

Sohadagi bu islohotlarning barchasi yosh avlodni barkamol, yuksak bilimli, keng dunyoqarashli qilib tarbiyalashga, ularda Vatanga sadoqat hissini va milliy gʻururni kuchaytirishga xizmat qilmoqda. Zero, bugungi oʻquvchi — ertangi yetuk mutaxassis, ilm-fan egasi, xalqimizning yorqin kelajagini bunyod etuvchi insondir.

2-sentyabr sanasi bu faqat yangi oʻquv yilining boshlanishi emas, ezgu orzular, ulkan maqsadlar sari yoʻl ochuvchi, qalblarda umid va ishonch uygʻotuvchi bayramdir.

Charos Arslonova, tuman hokimligining Axborot xizmati rahbari.