«VATAN UChUN, MILLAT UChUN, XALQ UChUN!»

Bu yil mamlakatimiz mustaqilligining 34 yilligi yurtimizning har bir muassasasida koʻtarinki kayfiyatda keng nishonlanmoqda. Zero, mustaqillik bizga milliy oʻziga xosligimizni, or-nomus va gʻururimizni, milliy qadriyatlar va anʼanalarimiz bilan faxrlanish hissini qaytargan bayram sifatida abadiy qolgan va jonajon Vatanimiz yilnomasiga oltin harflar bilan yozilgan. Shu bilan birga, mustaqilligimiz sharofati bilan biz nafaqat tilimiz, dinimiz, balki davlat ramzlarimizga ham ega boʻldik.

Barcha taʼlim maskanlarida oʻtkazilayotgan tadbirlar qatorida tumanimizning 1-sonli umumiy oʻrta taʼlim maktabida ham "Vatan uchun, millat uchun, xalq uchun!" shiori ostida tadbir oʻtkazilib, "Birinchi qoʻngʻiroq" sadolari yangradi.

Bayram tadbirini maktab direktori Dilrabo opa Sherboyeva ochiq deb eʼlon qilgandan soʻng, maktab deb atalmish muqaddas dargohga ilk qadamini qoʻyayotgan jajji bolajonlarning kuy va raqslari barchaning dilini xushnud etdi. Bayramga tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova tashrif buyurib, bayram ishtirokchilariga samimiy tilaklarini yoʻlladi. Ustoz va murabbiylarga ham mashaqqatli, ham sharafli kasblarida sabr, matonat va muvaffaqiyatlar tiladi.

Tadbir davomida 1-“A” sinf oʻquvchi qizlari ijrosidagi “Yayra, Oʻzbekiston!” deb atalgan ajoyib raqslar bilan davom etdi. 2-“A” sinf oʻquvchisi Oʻrinboyev Umidjon ijrosidagi “Oʻzbekiston” taronasi tadbirga yanada koʻtarinki ruh bagʻishladi. 10-“B” sinf oʻquvchisi Bozorboyeva Mohinur va 11-“A” sinf oʻquvchisi Madrahimova Feruza Vatan haqidagi sheʼrlarni ifodali oʻqidi.

Jajji bolajonlarning ota-onalari ham tashrif buyurib, oʻqituvchi va ustozlarni bayram munosabati bilan muborakbod etdi. Tadbir soʻngida maktab rahbari 1-sinf bolajonlariga Prezident sovgʻalarini taqdim etdi.

Bayram yakunida 1-“A” sinf oʻquvchilari Rustamova Kumushoy va Rahimov Sultonbeklar yangi oʻquv yilidagi birinchi qoʻngʻiroqni chalishdi.

Inobat Odilboyeva, 1-sonli maktabning ona tili va adabiyot fani oʻqituvchisi.