MEHNAT YaRMARKASI — AHOLI BANDLIGINI TAʼMINLAShDA IJOBIY YeChIM

Joriy yilning 27-avgust kuni Amudaryo tumani Kambagʻallikni qisqartirish va bandlikka koʻmaklashish boʻlimi tomonidan tuman hokimligi va tuman Prokuraturasi bilan hamkorlikda boʻsh ish oʻrinlari mehnat yarmarkasi hamda oliy taʼlim bitiruvchilari uchun “Karera kuni” tadbiri oʻtkazildi.

Yarmarka ishida Amudaryo tumani hokimi oʻrinbosari, investitsiya va tashqi savdo boʻlimi boshligʻi Hamza Haytimbetov, Amudaryo tumani prokurori, adliya maslahatchisi Bahram Masharipov, tuman prokurori yordamchisi Sanjar Abdullayev, Oʻzbekiston Respublikasi Bosh prokuraturasi huzuridagi Majburiy ijro byurosi Amudaryo tumani boʻlimi boshligʻi, 2-darajali huquqshunos Medetbay Ismetullayev, Berdaq nomidagi Qoraqalpoq davlat universiteti filologiya fakulteti dekani Mahsud Qurbaniyazov, Amudaryo tumani IIB huzuridagi Probatsiya boʻlimi boshligʻi Azamat Ortiqov, IIB xotin-qizlar bilan ishlash boʻyicha inspektori Inobat Oʻrazmatova hamda Ajiniyoz nomidagi Nukus davlat pedagogika instituti vakillari, Amudaryo tumanidagi 1- va 2-sonli politexnikumlar oʻqituvchilari hamda boshqa hamkor tashkilotlar va tijorat banklari vakillari qatnashdilar.

Shuningdek, mehnat yarmarkasida 48 nafar ishsiz fuqarolar, probatsiya hisobida turgan fuqarolar, aliment toʻlovchilar, nogironligi boʻlgan shaxslar, maktab, oliy oʻquv yurtlari va texnikumlar bitiruvchi yoshlar uchun tumandagi 50 ta korxona va tashkilotlar tomonidan 190 ta boʻsh ish oʻrinlari taqdim etildi.

TADBIRNING ASOSIY MAQSADLARI

Yarmarkani Amudaryo tumani Kambagʻallikni qisqartirish va bandlikka koʻmaklashish boʻlimi boshligʻi vazifasini vaqtincha bajaruvchi Rahmonjon Shomuratov ochdi. U aholi bandligini taʼminlash maqsadida boʻlim mutaxassislari tomonidan olib borilayotgan ishlar, davlatimizning beqiyos gʻamxoʻrligi, yaratilayotgan imkoniyatlar, imtiyozli kreditlar, subsidiyalar hamda ssudalar toʻgʻrisida batafsil maʼlumot berdi.

Tadbir davomida tuman prokurori, adliya maslahatchisi B. Masharipov yarmarka ishtirokchilariga yurtimizda amalga oshirilayotgan demokratik islohotlar mazmun-mohiyatiga koʻra, butunlay yangi bosqichga koʻtarilganligini, oʻtgan davrda inson qadrini ulugʻlash, fuqarolarning mehnat qilish va tadbirkorlik faoliyatini amalga oshirishi uchun yaratilayotgan sharoitlar, berilayotgan imtiyozlar bugun yuqori natija berayotganini alohida eʼtirof etdi. Ayniqsa, yaqin vaqtlargacha aholining ehtiyojmand qatlamiga, aynan ularni ish bilan taʼminlash masalasiga yetarlicha eʼtibor berilmaganligi toʻgʻrisida soʻz yuritdi. Aholi, ayniqsa, yoshlar va xotin-qizlarda zamonaviy kasb va tadbirkorlik koʻnikmalarini shakllantirishda hamda kasblarga oʻqitish tizimida tub oʻzgarishlar amalga oshirilayotganini mamnuniyat bilan taʼkidladi. Jumladan, Kambagʻallikni qisqartirish va bandlik vazirligi tasarrufida koʻplab kasb-hunarga oʻqitish markazlari, kasb-hunarga oʻqitish maskani, “Ishga marhamat” monomarkazi faoliyati yoʻlga qoʻyilganligi aholi uchun qulaylik yaratayotgani haqida keng toʻxtaldi.

Shundan soʻng yarmarka ishtirokchilariga Kambagʻallikni qisqartirish va bandlikka koʻmaklashish boʻlimi xodimlari tomonidan boʻsh ish oʻrinlari va ularga aholini ishga joylashtirish, ishsiz aholini kasb-hunarga oʻqitish, oʻz xohish-istaklariga koʻra, xorijiy davlatlarga ishga joylashtirish, ularning mehnat huquqlari va mehnat muhofazasini taʼminlash masalalari boʻyicha huquqiy maslahat va maʼlumotlar olishlari uchun barcha sharoitlar, jumladan, videoroliklar, bannerlar, broshyuralar, bukletlar tashkil qilindi.

YaRMARKA NATIJALARI

Yarmarkada 28 nafar fuqaro doimiy ishga joylashtirildi. Ulardan 1 nafari mehnat muhojiri, 17 nafari oliy taʼlim bitiruvchilari, 1 nafar fuqaro jazoni ijro etish muassasasidan ozod qilingan shaxs, 9 nafari ishsiz fuqarolar boʻlib, barchasining ishonchli tarzda bandligi taʼminlandi.

Bundan tashqari, 20 nafar fuqarolarga mehnat qonunchiligiga oid hamda vacancy.argos.uz saytlarida eʼlon qilingan boʻsh ish oʻrinlariga oʻtkaziladigan tanlovlar boʻyicha huquqiy maslahat va yordamlar berildi.

Yarmarka davomida boʻlim xodimlari tomonidan boʻsh ish oʻrinlari, ularga aholini ishga joylashtirish boʻyicha 18 nafar fuqaroga, ishsiz aholini kasb-hunar va tadbirkorlikka oʻqitish boʻyicha 11 fuqaroga, aholini xorijiy davlatlarda ishga joylashtirish boʻyicha 12 fuqaroga, aholining mehnat huquqlari va mehnat muhofazasini taʼminlash boʻyicha 6 fuqaroga huquqiy maslahatlar, kerakli maʼlumot va tavsiyalar taqdim etildi.

Aholining ijtimoiy faolligini oshirish, oʻzlari uchun maʼqul boʻlgan kasb-korlarni egallab, oʻzi va oilasining doimiy daromadga ega boʻlishlarini taʼminlash borasidagi intilishlarini qoʻllab-quvvatlash, pirovardida ularning hayotdan rozi yashashlariga koʻmaklashish borasidagi bu kabi xayrli ishlar Amudaryo tuman Kambagʻallikni qisqartirish va bandlikka koʻmaklashish boʻlimi tomonidan 2025-yil davomida tizimli ravishda amalga oshirilishi rejalashtirilgan.

Bundan tashqari, shu kuni aholini qiynab kelayotgan huquqiy muammolarga yechim topish maqsadida Kambagʻallikni qisqartirish va bandlikka koʻmaklashish boʻlimi boshligʻi vazifasini vaqtincha bajaruvchi Rahmonjon Shomuratov tomonidan tuman Kambagʻallikni qisqartirish va bandlikka koʻmaklashish boʻlimi binosida sayyor qabul ham oʻtkazildi.

Sayyor qabulda fuqarolarning mehnat nizolari, bandlik, kredit, subsidiya va ssuda masalalari boʻyicha murojaatlari qabul qilinib, barcha murojaatlarga huquqiy yechim topish choralari koʻrildi.

RAVShAN BAHROMOV.