Iqtisodiyot rivoji statistik koʻrsatkichlarda aks etmoqda

Mamlakatimizda tadbirkorlikni qoʻllab-quvvatlash, xorijiy investorlarni jalb qilgan holda yirik loyihalarni amalga oshirish, savdo, xizmat koʻrsatish va servis, ishlab chiqarish sohalarini barqaror rivojlantirishga qaratilayotgan eʼtibor tufayli iqtisodiyot yil sayin oʻsib, aholi turmush farovonligi yaxshilanib bormoqda. Barcha hududlar singari Amudaryo tumanida ham iqtisodiy oʻsish koʻrsatkichlari yil sayin yuqorilab borayotgani Milliy statistika qoʻmitasining hisobotlarida qayd qilinmoqda.

Tuman statistika boʻlimi xodimlari joylarga chiqqan holda tadbirkorlar bilan uchrashib, real holatni statistik hisobotlarda aks ettirishga harakat qilmoqdalar. Boʻlimning maʼlum qilishicha, 2025-yilning birinchi yarmi yakunlariga koʻra tumanda barcha sohalarda iqtisodiy oʻsish surʼatlari qayd qilindi. Birgina qishloq xoʻjaligi sohasidagi barqaror oʻsish darajasi fermerlar, tomorqachilar va qishloq xoʻjaligi ishlab chiqaruvchilarining yil sayin tajriba orttirib, yangi marralarga erishayotganini amalda tasdiqlaydi.

Dastlabki maʼlumotlarga koʻra, 2025-yilning birinchi yarmi yakunlariga koʻra tumanda qishloq, oʻrmon va baliqchilik xoʻjaligi mahsulotlari va xizmatlarining umumiy hajmi 917,8 milliard soʻmni tashkil etdi. Bu koʻrsatkich oʻtgan yilning shu davriga nisbatan 4,9 foizga oʻsgan. Shuningdek, mazkur sohada tumanning Qoraqalpogʻiston Respublikasidagi ulushi 16,8 foizni tashkil etgani eʼtiborga molik.

Xususan, chorvachilik mahsulotlari hajmi 513,4 milliard soʻmga teng boʻlib, umumiy qishloq xoʻjaligi mahsulotlari ichidagi ulushi 62,2 foizni tashkil etdi. Joriy yilning birinchi yarmi davomida tuman boʻyicha 5,8 ming tonna goʻsht, 20,9 ming tonna sut, 32,9 million dona tuxum ishlab chiqarildi.

2025-yil 1-iyul holatiga koʻra, tumanda yirik shoxli qoramollar – 174,3 ming bosh boʻlib, shundan 48 ming boshini sigirlar tashkil qiladi. Qoʻy va echkilar – 113,6 ming bosh, parrandalar esa 1,17 million boshga yetgan.

Tumandagi yirik xoʻjaliklardan biri — "Erlapas" fermer xoʻjaligida 229 bosh yirik shoxli qoramol, shundan 62 bosh sigirlar, 150 bosh qoʻy va echki va 8 bosh otlar mavjud. Joriy yilning oʻtgan davrida xoʻjalik tomonidan 152 tsentner goʻsht, 748 tsentner sut, 2 ming 220 dona tuxum va 3 tsentner jun olindi.

Meva-sabzavot, poliz ekinlari yetishtirish hajmi ham yil sayin ortib bormoqda. Bu borada issiqxonalarning oʻrni alohida. Birgina “Mangit Invest Plys” MChJga qarashli issiqxonada shu yilning fevral-mart oylarida 12 tonna bodring yetishtirib, toʻliq ichki bozorga yetkazib berdi. Hozirda esa pomidor yetishtirish jarayoni boshlangan boʻlib, yaqin oylarda 30-40 tonna hosil olish va uning bir qismini xorijga eksport qilish rejalashtirmoqda.

Ilgʻor fermer xoʻjaliklari va tomorqachilarning samarali saʼy-harakatlari bois yilning birinchi yarmida tuman boʻyicha dehqonchilik mahsulotlari hajmi 311,4 milliard soʻmga yetdi. Bu 2024-yilga nisbatan 5,5 foiz oʻsish demakdir. Asosiy ekin turlaridan don yetishtirish 24 ming tonna, sabzavotlar 16 ming tonna, poliz mahsulotlari 2,1 ming tonna, mevalar va rezavorlar 3,1 ming tonna, uzum 186,4 tonnani tashkil qildi. Ayniqsa, meva va rezavorlar hosili 25,7 foizga, uzum yetishtirish hajmi esa 24,9 foizga oʻsishi sohadagi samarali mehnatlarning natijasidir.

Bir soʻz bilan aytganda, Amudaryo tumanida boshqa sohalar qatori qishloq xoʻjaligi sohasida ham 2025-yilning birinchi yarmida barqaror oʻsish surʼatlari taʼminlandi. Dehqonchilikda hosildorlikning ortishi, chorvachilik, baliqchilik va asalarichilikda mahsulot hajmining koʻpayishi, shuningdek, issiqxona xoʻjaligining kengayishi tumanda agrar salohiyatning tobora mustahkamlanayotganidan dalolat beradi. Bu jarayonda aholi tomorqalaridan tortib, kichik va oʻrta, qolaversa, yirik xoʻjaliklarning faol ishtiroki esa umumiy iqtisodiy oʻsishning muhim omili boʻlmoqda.