Ahmadjon NAFASOV
2025-yil 21-iyul kuni taniqli shoir, ijodkor, pedagog va jamoat arbobi Ahmadjon Nafasov 71 yoshida olamdan oʻtdi.
Uning hayot yoʻli ilm va maʼrifatga, adabiyot va ijodiyotga boʻlgan cheksiz muhabbatning yorqin namunasidir.
Ahmadjon Nafasov 1954-yilda Amudaryo tumanining Qizilcholi qishlogʻida tavallud topgan. Maktabni tugatgach, 1971-1972-yillarda "Oʻzbekiston" xoʻjaligida ishchi boʻlib faoliyat yuritgan. 1973-1975-yillarda armiya safida xizmat qilgan. Otasi – tajribali oʻqituvchi Nafas Jamgʻurovga havas qilib bolaligidan kitob oʻqishga, adabiyotga mehr qoʻygan Ahmadjon Nafasov 1975-yilda Toshkent davlat universitetining filologiya fakultetiga oʻqishga kirdi. 1981-yilda ushbu oliygohni muvaffaqiyatli tamomladi.
1975-1981-yillarda yoshlar tashkilotida faoliyat olib borgan Ahmadjon Nafasov universitetni tugatgach, oʻz qishlogʻidagi 9-sonli maktabda oʻzbek tili va adabiyoti fanidan dars bera boshladi. Pensiyaga chiqquniga qadar ushbu taʼlim dargohida koʻplab shogirdlar tayyorlab, yoshlarning adabiyotga boʻlgan qiziqishini oshirishga, maʼnaviyatini yuksaltirishga munosib hissa qoʻshdi.
U 2009-yilda pensiyaga chiqqaniga qaramay, ijodiy faoliyatini toʻxtatmadi. Turli mavzularda goʻzal sheʼrlar, gʻazallar yaratdi, publitsistik asarlar ustida ishladi. Uning koʻplab sheʼrlari xonandalar ijrosida qoʻshiq boʻlib, har bir xonadonga kirib bordi. 2011-yilda ustozi Tursunboy Abdullayevning hayot va ijod yoʻliga bagʻishlangan "Salomchi – mening unvonim" nomli, 2018-yilda "Keldim dovonlar oshib" nomli kitoblari nashrdan chiqib, adabiyot, sanʼat va ijod ahlining yuksak eʼtirofiga sazovor boʻldi va kitobsevar xalqimizning maʼnaviy mulkiga aylandi.
2015-yildan boshlab "Jayxun ilhomlari" nodavlat notijorat tashkilotiga raislik qilib, yosh ijodkorlarni kashf etish, ularni qoʻllab-quvvatlash va kitoblarini nashr etish ishlariga bosh boʻldi. Uning saʼy-harakatlari bilan oʻnlab yoshlarning mualliflik kitoblari nashrga tayyorlandi va chop qilindi. Yosh avlodning maʼnaviy dunyosini boyitish va tafakkurini rivojlantirish maqsadida uning tashabbusi bilan "Jayxun ilhomlari" nodavlat notijorat tashkiloti qoshida kutubxona tashkil qilinib, tumanning olis hududlarida ham koʻchma kutubxonalar faoliyati yoʻlga qoʻyildi. Kitobsevar yoshlar safi oshib, kitobxonlik ommalashdi.
Keyinchalik tumanimizdagi 2-sonli maktabda ijodiy-madaniy masalalar boʻyicha targʻibotchi vazifasida ishlab, yosh avlodni maʼnan barkamol etib tarbiyalash, faol oʻquvchilarning ijodiy ishlarini keng jamoatchilikka yetkazish, mushoiralar, adabiy-badiiy tadbirlar, kitobxonlik va sheʼrxonlik kechalari tashkil etish kabi ishlarda faollik koʻrsatdi. Maktabda "Yosh ijodkorlar" toʻgaragi faoliyatini yoʻlga qoʻyib, yoshlarning iqtidorini rivojlantirishga munosib hissa qoʻshdi.
Ahmadjon Nafasov nuroniy sifatida mahalla va jamoatchilik ishlarida ham faol ishtirok etib, jamiyatda ijtimoiy-maʼnaviy muhitni barqarorlashtirish, mehr-oqibat va hamjihatlik tuygʻularini mustahkamlashda jonbozlik koʻrsatdi. Umr yoʻldoshi bilan 3 oʻgʻil va 2 qizni tarbiyalab, jamiyatga naf keltiradigan insonlar qilib voyaga yetkazdi.
Uning fidokorona mehnatlari munosib eʼtirof etilib, "Oʻzbekiston Xalq maorifi aʼlochisi" va "Oʻzbekiston mustaqilligining 25-yilligi" koʻkrak nishonlari bilan taqdirlandi.
Ahmadjon Nafasovning vafoti ijod ahli uchun ogʻir judolik boʻldi. Uning sermazmun umr yoʻli kelgusi avlodlarga ibrat boʻlib, goʻzal insoniy fazilatlari va porloq xotirasi qalblarimizda mangu yashaydi.
"Taraqqiyot koʻzgusi" gazetasi va "Amudaryo TV" telekanali tahririyatlari hamda
"Jayxun ilhomlari" NNT jamoasi, bir guruh ijodkor doʻstlari,
ustozlari va shogirdlari
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
