Mehnat migrantlari uchun yangi imkoniyatlar

Mamlakatimizda mehnat migratsiyasi jarayonlarini samarali boshqarish, xorijda mehnat faoliyatini amalga oshirgan fuqarolarni jamiyatga qayta integratsiya qilish, ularni rasmiy bandlikka jalb etish, kasbiy salohiyatini yuksaltirish va tadbirkorlik faoliyatiga kengroq qamrab olish borasida keng koʻlamli ishlar amalga oshirilmoqda.

Jumladan, 2024-yil 4-aprelda qabul qilingan Oʻzbekiston Respublikasi Prezidentining PF–59-sonli Farmoni mazkur yoʻnalishdagi ishlarga mustahkam huquqiy asos boʻlib xizmat qilmoqda. Unga koʻra, mehnat migratsiyasidan qaytgan shaxslarni ishga qabul qilgan ish beruvchilarga davlat tomonidan subsidiya toʻlanishi belgilandi.

Xususan, Bandlikka koʻmaklashish davlat jamgʻarmasi mablagʻlari hisobidan — byudjet tashkilotlari, davlat korxonalari hamda ustav kapitalida davlat ulushi 50 foiz va undan ortiq boʻlgan yuridik shaxslardan tashqari — mehnat migratsiyasidan qaytgan har bir fuqaroni ishga qabul qilgan ish beruvchiga 12 oy davomida har oy 500 ming soʻmdan subsidiya ajratiladi. Ushbu tartib 2024-yil 1-iyundan 2026-yil 1-yanvarga qadar ishga qabul qilingan shaxslarga nisbatan qoʻllaniladi.

Subsidiya toʻlash uchun asosiy hujjat — Yagona milliy mehnat tizimida rasmiylashtirilgan mehnat shartnomasi hisoblanadi. Mehnat migratsiyasidan qaytgan shaxs sifatida esa xorijda kamida uch oy davomida mehnat faoliyati bilan shugʻullangan va yashash manziliga qaytib kelganiga bir yildan oshmagan fuqarolar eʼtirof etiladi.

Reintegratsiya jarayonlarini samarali tashkil etish maqsadida Mahallabay ishlash va tadbirkorlikni rivojlantirish agentligi huzuridagi «Onlayn mahalla» elektron platformasiga «Reintegratsiya» moduli joriy etildi. Unga asosan, har bir mahallada “mahalla yettiligi” aʼzolari tomonidan mehnat migratsiyasidan qaytgan shaxslar aniqlanib, ular haqidagi maʼlumotlar mazkur modulga kiritib borilmoqda.

Shuningdek, reintegratsiya jarayonida shaxslarga koʻrsatiladigan yordam hamda ularni rasmiy ish bilan taʼminlash koʻrsatkichi — hokim yordamchilari faoliyati samaradorligining muhim mezonlaridan biri, yaʼni KPI sifatida belgilangan. Bu esa mahalliy darajada masʼuliyatni oshirish, ishlar samaradorligini yanada yuksaltirishga xizmat qilmoqda.

Yuqoridagi chora-tadbirlar mamlakatimizda mehnat migratsiyasi jarayonlarini tizimli yoʻlga qoʻyish, xorijdan qaytgan fuqarolarni jamiyatga toʻliq integratsiya qilish, ularni munosib ish oʻrinlari bilan taʼminlash va iqtisodiy faol aholi safida faol ishtirokini taʼminlashga qaratilgani bilan muhim ahamiyat kasb etadi.

Shohzod Qurbonboyev tayyorladi.