Меҳнат мигрантлари учун янги имкониятлар
Мамлакатимизда меҳнат миграцияси жараёнларини самарали бошқариш, хорижда меҳнат фаолиятини амалга оширган фуқароларни жамиятга қайта интеграция қилиш, уларни расмий бандликка жалб этиш, касбий салоҳиятини юксалтириш ва тадбиркорлик фаолиятига кенгроқ қамраб олиш борасида кенг кўламли ишлар амалга оширилмоқда.
Жумладан, 2024 йил 4 апрелда қабул қилинган Ўзбекистон Республикаси Президентининг ПФ–59-сонли Фармони мазкур йўналишдаги ишларга мустаҳкам ҳуқуқий асос бўлиб хизмат қилмоқда. Унга кўра, меҳнат миграциясидан қайтган шахсларни ишга қабул қилган иш берувчиларга давлат томонидан субсидия тўланиши белгиланди.
Хусусан, Бандликка кўмаклашиш давлат жамғармаси маблағлари ҳисобидан — бюджет ташкилотлари, давлат корхоналари ҳамда устав капиталида давлат улуши 50 фоиз ва ундан ортиқ бўлган юридик шахслардан ташқари — меҳнат миграциясидан қайтган ҳар бир фуқарони ишга қабул қилган иш берувчига 12 ой давомида ҳар ой 500 минг сўмдан субсидия ажратилади. Ушбу тартиб 2024 йил 1 июндан 2026 йил 1 январга қадар ишга қабул қилинган шахсларга нисбатан қўлланилади.
Субсидия тўлаш учун асосий ҳужжат — Ягона миллий меҳнат тизимида расмийлаштирилган меҳнат шартномаси ҳисобланади. Меҳнат миграциясидан қайтган шахс сифатида эса хорижда камида уч ой давомида меҳнат фаолияти билан шуғулланган ва яшаш манзилига қайтиб келганига бир йилдан ошмаган фуқаролар эътироф этилади.
Реинтеграция жараёнларини самарали ташкил этиш мақсадида Маҳаллабай ишлаш ва тадбиркорликни ривожлантириш агентлиги ҳузуридаги «Онлайн маҳалла» электрон платформасига «Реинтеграция» модули жорий этилди. Унга асосан, ҳар бир маҳаллада “маҳалла еттилиги” аъзолари томонидан меҳнат миграциясидан қайтган шахслар аниқланиб, улар ҳақидаги маълумотлар мазкур модулга киритиб борилмоқда.
Шунингдек, реинтеграция жараёнида шахсларга кўрсатиладиган ёрдам ҳамда уларни расмий иш билан таъминлаш кўрсаткичи — ҳоким ёрдамчилари фаолияти самарадорлигининг муҳим мезонларидан бири, яъни KPI сифатида белгиланган. Бу эса маҳаллий даражада масъулиятни ошириш, ишлар самарадорлигини янада юксалтиришга хизмат қилмоқда.
Юқоридаги чора-тадбирлар мамлакатимизда меҳнат миграцияси жараёнларини тизимли йўлга қўйиш, хориждан қайтган фуқароларни жамиятга тўлиқ интеграция қилиш, уларни муносиб иш ўринлари билан таъминлаш ва иқтисодий фаол аҳоли сафида фаол иштирокини таъминлашга қаратилгани билан муҳим аҳамият касб этади.
Шоҳзод Қурбонбоев тайёрлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
