"DOLZARB 90 KUN" LOYIHASI DOIRASIDA QORAQALPOGʻISTON RESPUBLIKASI MIQYoSIDA KOʻRGAZMALI SEMINAR OʻTKAZILDI

Amudaryo tumanining Qipchoq shaharchasi markazida joylashgan 11-sonli umumtaʼlim maktabi pedagogika jamoasi tomonidan "Dolzarb 90 kun" loyihasi doirasida amalga oshirilayotgan rejaviy chora-tadbirlar bilan maktabning barcha sinflari oʻquvchilari qamrab olinmoqda.

Mazkur loyiha doirasida amalga oshirilayotgan ishlarni targʻib qilish maqsadida Qoraqalpogʻiston Respublikasi miqyosida koʻrgazmali seminar tashkil etildi. Seminarda Qoraqalpogʻiston Respublikasi Maktabgacha va maktab taʼlimi vazirining oʻrinbosari Qadirboy Ismailov, Respublika tuman va shaharlarining maktabgacha va maktab taʼlimi boʻlimlari shuʼba mudirlari, tuman Maktabgacha va maktab taʼlimi boʻlimi boshligʻi Yalgʻashboy Shamuratov, 11-sonli maktab pedagogika jamoasi hamda oʻquvchi-yoshlar, ularning ota-onalari ishtirok etdilar.

Koʻrgazmali seminarda soʻzga chiqqan vazirning oʻrinbosari Qadirboy Ismailov mamlakatimizda yosh avlod taʼlim-tarbiyasi uchun koʻrsatilayotgan yuksak eʼtibor va ragʻbat, sohada amalga oshirilayotgan izchil islohotlarning samarasi xususida batafsil toʻxtalib, joriy yildagi yozgi taʼtil har bir oʻquvchi-yoshning hayotiga maʼno-mazmun bagʻishlab, ularning iqtidor va salohiyatlarini yuzaga chiqarishlarida juda katta ahamiyat kasb etayotganini mamnuniyat bilan taʼkidladi.

Shundan soʻng tadbir mehmonlari maktab direktori Ulugʻbek Mamutov hamrohligida oʻquvchi-yoshlar tomonidan taʼtil davrida amalga oshirilayotgan taʼlimiy, milliy-maʼnaviy qadriyatlarni oʻzida mujassam etgan koʻrgazmalar bilan yaqindan tanishdilar.

Xususan, maktabning 4-"A", 4-"B", 3-"A" sinflar oʻquvchilari, shuningdek, sport maktabi shugʻullanuvchilari tomonidan namoyish etilgan turfa raqslar, badiiy gimnastika sporti boʻyicha koʻrgazmali chiqishlar tadbir mehmonlarida yorqin taassurotlar qoldirdi. Ayniqsa, "Barkamol avlod" bolalar maktabining "Shoʻx bolalar" badiiy havaskorlik jamoasi aʼzolari tomonidan jonli ijroda taqdim etilgan qoʻshiqlar barchaga xush kayfiyat bagʻishladi.

Koʻrgazmali seminar davomida 7- va 8-sinflar oʻquvchilari mazkur sinflar rahbarlari Muhabbat Abdukarimova, Shahnoza Toʻramurodova, Sevara Rajabovalar boshchiligida texnologiya fani oʻqituvchilari tomonidan tashkil etilgan "Osh tanlovi"da ishtirok etishib, oʻzlarining pazandalik mahoratlarini amalda koʻrsatib berdilar.

"Besh muhim tashabbus" toʻgaragi rahbarlari Erkinoy Yoqubova, Gulbahor Mirzayevalar tomonidan tashkillashtirilgan qandolatchilik mahsulotlari koʻrgazmasi esa mazkur toʻgarak aʼzolari qandolatchilik mahsulotlarini tayyorlash, dasturxon bezatish sanʼatini chuqur egallayotganlarining yorqin ifodasi boʻldi.

Seminar ishtirokchilari jismoniy tarbiya fani oʻqituvchilari Rahimjon Qoʻshayev, Jumamurod Jumaniyozov, Salomat Ismoilovlar tomonidan tashkillashtirilgan shaxmat-shashka, voleybol, mini futbol musobaqalari, ona tili va adabiyot fani oʻqituvchisi Guloyim Begjonova bilan maktab kutubxonachisi Mehribon Yoʻldoshevalar hamkorlikda tashkil etgan "Zukko kitobxon" tanlovi bilan ham yaqindan tanishdilar.

Gʻafurjon Muhammadkarimov boshchiligida oʻtkazilgan "Zakovat" turniri ham koʻrgazmali seminarga oʻziga xos maʼnaviy ruh bagʻishladi. Maktab pedagogika jamoasi va bilimdon oʻquvchilar ishtirokidagi turnirda taʼtil davrida maktabda tashkil etilgan toʻgaraklarda shugʻullanayotgan oʻquvchilarning bilim va intilishlari sinovdan oʻtkazildi.

Seminarda "Barkamol avlod" bolalar maktabi hamda 21-sonli bolalar musiqa va sanʼat maktabining qoʻl mehnati, rassomlik, robototexnika, dizaynerlik kabi yoʻnalishlar boʻyicha toʻgaraklarida shugʻullanuvchi oʻquvchilar tomonidan tashkil etilgan koʻrgazma ham namoyish etildi.

Koʻrgazmali seminarning yakuniy qismida ushbu tadbirni tashkil etgan 11-sonli maktabning maʼnaviy-maʼrifiy ishlar boʻyicha direktor oʻrinbosari Qunduzoy Xalmuratovaga seminar ishtirokchilari oʻz minnatdorchiliklarini izhor etib, maktab pedagogika jamoasining yosh avlod taʼlim-tarbiyasida oʻzaro hamjihat va hamkorlik asosida amalga oshirayotgan ezgu ishlarida muvaffaqiyatlar tiladilar.

ROBIYa YOʻLDOShEVA.