"ДОЛЗАРБ 90 КУН" ЛОЙИҲАСИ ДОИРАСИДА ҚОРАҚАЛПОҒИСТОН РЕСПУБЛИКАСИ МИҚЁСИДА КЎРГАЗМАЛИ СЕМИНАР ЎТКАЗИЛДИ

Амударё туманининг Қипчоқ шаҳарчаси марказида жойлашган 11-сонли умумтаълим мактаби педагогика жамоаси томонидан "Долзарб 90 кун" лойиҳаси доирасида амалга оширилаётган режавий чора-тадбирлар билан мактабнинг барча синфлари ўқувчилари қамраб олинмоқда.

Мазкур лойиҳа доирасида амалга оширилаётган ишларни тарғиб қилиш мақсадида Қорақалпоғистон Республикаси миқёсида кўргазмали семинар ташкил этилди. Семинарда Қорақалпоғистон Республикаси Мактабгача ва мактаб таълими вазирининг ўринбосари Қадирбой Исмаилов, Республика туман ва шаҳарларининг мактабгача ва мактаб таълими бўлимлари шуъба мудирлари, туман Мактабгача ва мактаб таълими бўлими бошлиғи Ялғашбой Шамуратов, 11-сонли мактаб педагогика жамоаси ҳамда ўқувчи-ёшлар, уларнинг ота-оналари иштирок этдилар.

Кўргазмали семинарда сўзга чиққан вазирнинг ўринбосари Қадирбой Исмаилов мамлакатимизда ёш авлод таълим-тарбияси учун кўрсатилаётган юксак эътибор ва рағбат, соҳада амалга оширилаётган изчил ислоҳотларнинг самараси хусусида батафсил тўхталиб, жорий йилдаги ёзги таътил ҳар бир ўқувчи-ёшнинг ҳаётига маъно-мазмун бағишлаб, уларнинг иқтидор ва салоҳиятларини юзага чиқаришларида жуда катта аҳамият касб этаётганини мамнуният билан таъкидлади.

Шундан сўнг тадбир меҳмонлари мактаб директори Улуғбек Мамутов ҳамроҳлигида ўқувчи-ёшлар томонидан таътил даврида амалга оширилаётган таълимий, миллий-маънавий қадриятларни ўзида мужассам этган кўргазмалар билан яқиндан танишдилар.

Хусусан, мактабнинг 4-"А", 4-"Б", 3-"А" синфлар ўқувчилари, шунингдек, спорт мактаби шуғулланувчилари томонидан намойиш этилган турфа рақслар, бадиий гимнастика спорти бўйича кўргазмали чиқишлар тадбир меҳмонларида ёрқин таассуротлар қолдирди. Айниқса, "Баркамол авлод" болалар мактабининг "Шўх болалар" бадиий ҳаваскорлик жамоаси аъзолари томонидан жонли ижрода тақдим этилган қўшиқлар барчага хуш кайфият бағишлади.

Кўргазмали семинар давомида 7- ва 8-синфлар ўқувчилари мазкур синфлар раҳбарлари Муҳаббат Абдукаримова, Шаҳноза Тўрамуродова, Севара Ражабовалар бошчилигида технология фани ўқитувчилари томонидан ташкил этилган "Ош танлови"да иштирок этишиб, ўзларининг пазандалик маҳоратларини амалда кўрсатиб бердилар.

"Беш муҳим ташаббус" тўгараги раҳбарлари Эркиной Ёқубова, Гулбаҳор Мирзаевалар томонидан ташкиллаштирилган қандолатчилик маҳсулотлари кўргазмаси эса мазкур тўгарак аъзолари қандолатчилик маҳсулотларини тайёрлаш, дастурхон безатиш санъатини чуқур эгаллаётганларининг ёрқин ифодаси бўлди.

Семинар иштирокчилари жисмоний тарбия фани ўқитувчилари Раҳимжон Қўшаев, Жумамурод Жуманиёзов, Саломат Исмоиловлар томонидан ташкиллаштирилган шахмат-шашка, волейбол, мини футбол мусобақалари, она тили ва адабиёт фани ўқитувчиси Гулойим Бегжонова билан мактаб кутубхоначиси Меҳрибон Йўлдошевалар ҳамкорликда ташкил этган "Зукко китобхон" танлови билан ҳам яқиндан танишдилар.

Ғафуржон Муҳаммадкаримов бошчилигида ўтказилган "Заковат" турнири ҳам кўргазмали семинарга ўзига хос маънавий руҳ бағишлади. Мактаб педагогика жамоаси ва билимдон ўқувчилар иштирокидаги турнирда таътил даврида мактабда ташкил этилган тўгаракларда шуғулланаётган ўқувчиларнинг билим ва интилишлари синовдан ўтказилди.

Семинарда "Баркамол авлод" болалар мактаби ҳамда 21-сонли болалар мусиқа ва санъат мактабининг қўл меҳнати, рассомлик, робототехника, дизайнерлик каби йўналишлар бўйича тўгаракларида шуғулланувчи ўқувчилар томонидан ташкил этилган кўргазма ҳам намойиш этилди.

Кўргазмали семинарнинг якуний қисмида ушбу тадбирни ташкил этган 11-сонли мактабнинг маънавий-маърифий ишлар бўйича директор ўринбосари Қундузой Халмуратовага семинар иштирокчилари ўз миннатдорчиликларини изҳор этиб, мактаб педагогика жамоасининг ёш авлод таълим-тарбиясида ўзаро ҳамжиҳат ва ҳамкорлик асосида амалга ошираётган эзгу ишларида муваффақиятлар тиладилар.

РОБИЯ ЙЎЛДОШЕВА.