Amudaryo tumanida Yoshlar kuni munosib nishonlandi

Yurtimizda 30-iyun – Yoshlar kuni har yili oʻziga xos shukuhda, yuksak koʻtarinkilik va quvonch bilan nishonlanadi. Amudaryo tumanida ham sana munosabati bilan katta bayram tadbiri  tashkil qilindi.

Doʻstlik mahallasi Vaxum aholi punktida joylashgan bolalar oʻyingohida tashkil etilgan tantanali tadbirda yoshlar, ota-onalar, nuroniylar hamda mehmonlar ishtirok etdi.

Bayramni kirish soʻzi bilan ochib bergan tuman hokimi Sobir Xoʻjametov barchani Yoshlar kuni bilan samimiy muborakbod etdi. U oʻz nutqida yoshlar – davlat eʼtiborining markazida ekanini, bugun ularning bilim olishi, kasb-hunar egallashi, ijodiy salohiyatini roʻyobga chiqarishlari uchun barcha sharoitlar yaratilayotganini alohida qayd etdi.

Darhaqiqat, muhtaram Prezidentimizning gʻamxoʻrligi, eʼtibori tufayli mamlakatimizda yoshlarga oid davlat siyosati yangi bosqichiga koʻtarildi. Bundan sakkiz yil muqaddam – 2017-yilda davlatimiz rahbarining tashabbuslari bilan 30-iyun kuni “Yoshlar kuni” bayrami sifatida belgilangani nafaqat yoshlarimiz, balki butun xalqimiz hayotida tarixiy voqea boʻlgan edi.

Ushbu bayram eʼlon qilinganidan hozirgi kunga qadar amalga oshirilgan jami bunyodkorliklar, barcha sohalardagi tub islohotlar, kundalik turmushimizdagi shiddatli oʻzgarishlar, avvalo, yoshlarimiz kelajagi uchun, ularning ozod va obod vatanda, hech kimdan kam boʻlmay, baxtli hayot kechirishi uchun qilinayotgan saʼy-harakatlar natijasi, desak, aslo mubolagʻa boʻlmaydi.

Bayram tadbirida turli sohalarda faolligi, oʻz kasbi va hunari, ilm-fan sohasidagi yutuqlari bilan ajralib turgan bir guruh namunali yoshlarga tuman hokimining tashakkurnomalari tantanali ravishda topshirildi. Ular orasida davlat tashkilotlarida, “Mahalla yettiliklari” safida samarali faoliyat olib borayotgan yoshlarning mehnatlari alohida eʼtirof etildi. Bu esa ularning harakatlariga ragʻbat, kelajakdagi ishlariga ishonch bagʻishladi.

Shundan keyin tadbirning eng hayajonli va kutilgan daqiqalari – kontsert dasturi boshlandi. Bayram sahnasida respublika miqyosida tanilgan estrada xonandalari bilan birga Amudaryo tumanining umidli yosh ijodkorlari oʻzlarining yorqin chiqishlari bilan tomoshabinlarga shodlik ulandi. Quvnoq kuy-qoʻshiqlar, raqslar, jonli ijrolar tadbirga oʻzgacha fayz va zavq bagʻishladi.

Taʼkidlash joizki, bugun yoshlar zamonaviy sharoitlardan foydalangan holda chuqur bilim olib, raqobatbardosh kasblarni egallab, yurt ravnaqi yoʻlida fidokorona xizmat qilmoqdalar. Mamlakatimizdagi har bir islohot, har bir yangilik yoshlarning ishtiroki, kuch-gʻayrati bilan amalga oshmoqda.

Keyingi paytlarda kelajagimiz egalari boʻlgan oʻgʻil-qizlarimiz bilan ishlashning mutlaqo yangi tizimi – “Yoshlar daftari” va “Yoshlar dasturi” hayotga keng tatbiq etilmoqda. Tumanda olib borilgan amaliy ishlar natijasida oʻtgan 6 oy mobaynida “Yoshlar daftari”ga kirgan 213 nafar yigit-qizlarning muammolarini hal etish uchun “Yoshlar jamgʻarmasi”da 624 mln soʻm mablagʻ shakllantirilgan. Ushbu mablagʻlar hisobidan “Yoshlar daftari”ga kiritilgan professional va oliy taʼlim tashkilotlari oʻquvchi-talabalarining 136 nafariga toʻlov-shartnoma summasining bir qismi qoplab berildi. 3 nafar yoshlarning davlat va nodavlat taʼlim tashkilotlaridagi avtomototransport vositalari haydovchilarini tayyorlash oʻquv kursi xarajatlari uchun subsidiya ajratildi. Shuningdek, 8 nafar yoshlarning safarbarlik chaqiruvi rezervidagi xizmatni oʻtash badali toʻliq miqdorda qoplab berildi.

Yoshlar bandligini taʼminlash borasida amalga oshirilgan ishlar natijasida joriy yil boshidan shu kunga qadar 1 ming 319 nafar yoshlar ish oʻrinlariga ega boʻldilar. Amudaryolik yoshlar bu kabi eʼtibor va imkoniyatlardan unumli foydalangan holda ilm-fan, madaniyat va sport, tadbirkorlik hamda biznes, qoʻyingki, barcha sohalarda yuksak natijalarga erishmoqdalar.  

Tadbir yakunida osmon turfa rangli chiroqlar bilan charogʻon boʻldi. Namoyish etilgan mushakbozlik shousi barchaga bayramona kayfiyat ulashdi, yoshlar va mehmonlarning yuzida porlagan quvonch, hayrat va olqishlar kechaning ajoyib yakuniga aylandi. Bu goʻzal daqiqalar qalblarda unutilmas taassurot qoldirdi va yana bir bor yoshlar eʼtibor va gʻamxoʻrlik markazida ekanini amalda isbotladi.

Charos Arslonova, tuman hokimlining Axborot xizmati rahbari.