MANGʻIT ShAHRI MAHALLALARIDA NAZORAT TADBIRLARI OʻTKAZILDI
Maʼlumki, aholi yashash manzillaridan oqava suvlarini belgilangan muddatlarda chiqarib yubormaslik koʻpdan-koʻp noxush holatlarning yuzaga kelishiga sabab boʻladi. Ayniqsa, oqava suvlarining aholi yashash manzillarida uzoq vaqt turib qolishi natijasida yerning meliorativ holati yomonlashadi, shoʻrlanish darajasi ortib, aholi tomorqa yerlarida parvarishlanayotgan ekinlar, mevazor bogʻlarning hosildorligi keskin kamayib ketadi.
Oʻzbekiston Respublikasining 2022-yil 22-iyuldagi “Ichimlik suvi taʼminoti va oqava suvlarni chiqarib yuborish toʻgʻrisida”gi Qonunida fuqarolarning oʻzini-oʻzi boshqarish organlari, nodavlat notijorat tashkilotlarining hamda fuqarolik jamiyati boshqa institutlarining, shuningdek, mazkur sohadagi tadbirlarda ishtirok etishi belgilangan.
Ushbu Qonunda belgilangan vazifalarning amaliy ijrosini taʼminlash maqsadida 2024-yilning 19-aprel sanasida Oʻzbekiston Mahallalari uyushmasi bilan Qurilish va uy-joy kommunal xoʻjaligi sohasida nazorat qilish inspektsiyasi oʻrtasida oʻzaro hamkorlik Memorandumi imzolangan edi. Mazkur Memorandumda taraflar respublika aholisini ichimlik suvi taʼminoti va oqava suvlarni chiqarib yuborish xizmatlari bilan taʼminlash borasida oʻzaro hamkorlik qilishi belgilangan.
Ushbu hujjat doirasida Qoraqalpogʻiston Respublikasi Mahallalari uyushmasi, Qurilish va uy-joy kommunal xoʻjaligi sohasini nazorat qilish Inspektsiyasi va “Qoraqalpoq suv taʼminoti” aktsiyadorlik jamiyatining Amudaryo tumani filiali masʼul xodimlari hamkorlikda nazorat va targʻibot tadbirlarini amalga oshirib kelmoqdalar.
Hamkorlikdagi ana shunday nazorat tadbirlaridan biri joriy yilning 18-iyun sanasida ham oʻtkazilib, mazkur tadbirda Doʻstlik, Yangiobod va Farovon mahalla fuqarolar yigʻinlari masʼullari va aholi vakillari ham ishtirok etdilar.
Oʻrganishlar jarayonida mahallalar aholisi tomonidan ayrim eʼtirozlar ham bildirildi. Tegishli soha masʼullariga tarmoqdagi avariya holatlari oʻz vaqtida bartaraf etilishi, ichimlik suvining yetarli bosimda va belgilangan vaqtda yetkazilishi boʻyicha aniq koʻrsatmalar berildi. Oʻz navbatida aholi tomonidan ichimlik suvining sifati belgilangan meʼyoriy talablarga muvofiqligi va boshqa kamchiliklar mavjud emasligi ham bildirildi.
Bundan tashqari, mazkur mahalla fuqarolar yigʻinlarida isteʼmolchilarning “Ichimlik suvi taʼminoti va oqava suvlarini chiqarib yuborish toʻgʻrisida”gi Oʻzbekiston Respublikasi Qonuni talablariga qay darajada amal qilishini aniqlash maqsadida nazorat tadbirlari ham olib borildi. Isteʼmolchilarga ichimlik suvidan oqilona va tejamkorlik bilan foydalanish, suv taʼminoti tashkiloti bilan tuzilgan shartnoma shartlariga va unda belgilangan talablarga rioya qilish yuzasidan zarur tavsiyalar berilib, kommunal toʻlovlarni, ayniqsa ichimlik suvi taʼminoti va oqava suvlarni chiqarib yuborish xizmatlaridan foydalanganlik boʻyicha toʻlovlarni oʻz vaqtida amalga oshirish boʻyicha tushuntirishlar ham olib borildi.
Qoraqalpogʻiston Mahallalari uyushmasi bilan Qurilish va uy-joy kommunal xoʻjaligi sohasini nazorat qilish Inspektsiyasi hamda “Qoraqalpoq suv taʼminoti” aktsiyadorlik jamiyati Amudaryo tuman filiali masʼullari hamkorligida tashkillashtirilgan mazkur nazorat tadbiri jarayonida ichimlik suvi taʼminoti va oqava suvlarini chiqarib yuborish borasidagi Doʻstlik, Yangiobod va Farovon mahallalari aholisini qiynab kelayotgan boshqa muammolar ham atroflicha oʻrganilib, joyida hal etildi.
Robiya Yoʻldosheva
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
