7-SONLI DAVLAT MTTDA “XAYR, BOGʻChA – SALOM, MAKTAB!” TADBIRI OʻTKAZILDI

Mangʻit shahrining Doʻstlik mahallasi hududida joylashgan Amudaryo tumani Maktabgacha va maktab taʼlimi boʻlimi tasarrufidagi 7-sonli davlat maktabgacha taʼlim tashkiloti 2010-yilga qadar “Rohat” bolalar muassasasi maqomida faoliyat yuritib kelgan. Mazkur muassasa tuman hokimining 2010-yil 19-yanvardagi 22-sonli qarori asosida mukammal rekonstruktsiya qilinib, tuman 7-sonli maktabgacha taʼlim tashkiloti sifatida qayta tashkil etildi va zamon talablari darajasida jihozlandi. 70-oʻringa moʻljallangan ikki qavatli, zamonaviy, koʻrkam binoda kichkintoylarning taʼlim va tarbiya olishlari uchun barcha zarur sharoitlar yaratilgan.

Tevarak atrofi yam-yashil daraxtlar, anvoyi gullarga burkangan muassasa binosi bolajonlar har tong oshiqib keladigan soʻlim goʻshadir. Hududdagi obodonlashtirish, koʻkalamzorlashtirish ishlaridagi oʻziga xoslik, yozgi oʻyin maydonchalaridagi ozodalik koʻzlarni quvontiradi. Ichimlik suvi va tabiiy gaz tarmogʻiga ulangan muassasa binosi ichkarisida qishin-yozin moʻʼtadil muhit mavjudligi bolajonlarning yayrab oʻsishlari uchun qulay imkoniyat yaratadi.

Ayni paytda mazkur muassasada 5 ta asosiy guruhning har birida 30 nafardan jami 150 nafar, 2 ta majburiy guruhning har birida esa 25 nafar kichkintoylar taʼlim-tarbiya olishmoqda

Barno Xudoybergenova rahbarligidagi muassasada jami 35 nafar ishchi-xodimlar faoliyat olib borishadi. Ulardan 15 nafari tarbiyachi-pedagog xodimlar boʻlib, 6 nafari oliy, 3 nafari tugallanmagan oliy maʼlumotga ega tajribali, oʻz kasbining bilimdonlari boʻlgan mutaxassislardir. Yordamchi tarbiyachi sifatida faoliyat yurituvchi xodimlar esa oʻzlarining kasbiy malakalarini doimiy ravishda oshirib borishlari tufayli bolajonlarning samimiy mehriga sazovor “bogʻcha opalari”ga aylanishgan.

Kichkintoylarning oʻz iqtidorlarini amalda namoyon etishlari uchun yaratilgan sharoitlar ham alohida eʼtiborga munosib. Muassasada zamonaviy talablar darajasidagi musiqa va sport xonalari, nihoyatda shinam va ozoda oʻyin maydonchalari, ayvonchalar, tibbiy xizmat boʻlimi, oromxona va mashgʻulotlar xonalari har bir guruh boʻyicha bolajonlarning dunyoqarashlari va yoshlariga mutanosib ravishda jihozlangan.

Shuningdek, guruhlarda tashkil etilgan 5 ta rivojlantiruvchi markazlar, “Maʼnaviyat” va “Sport-sogʻlomlashtirish” burchaklarida bola psixologiyasi, aqliy va jismoniy rivojlanish tamoyillari oʻz aksini topgan.

Muassasada deyarli barcha guruhlarda inklyuziv taʼlim-tarbiya ham yoʻlga qoʻyilgan boʻlib, aqli va nutqiy rivojlanishda nuqsoni bor boʻlgan, eshitish qobiliyati zaif bolalarga sifatli taʼlim-tarbiya berishga alohida eʼtibor qaratiladi. Bu borada oliy maʼlumotli logoped-pedagog Aziza Artiqboyeva hamda defektologiya yoʻnalishi boʻyicha oliy maʼlumotli mutaxassis Madina Ibodullayevalar tomonidan olib borilayotgan mashgʻulotlar oʻzining ijobiy samarasini bermoqda.

Tarbiyachilar Qurbonoy Xolimbetova, Nilufar Atajanova, Sharofat Haytimbetovalar oʻtkazadigan har bir dars-mashgʻulotini bolajonlar intiqlik bilan kutishadi.

Joriy yilning 30-may sanasi muassasaning maktabga tayyorlov guruhi tarbiyalanuvchilari uchun hayajonli daqiqalarga boy unutilmas kun boʻlib qoldi. Chunki shu kuni muassasaning maktabga tayyorlov guruhining 46 nafar va qisqa muddatli tayyorlov guruhining 34 nafar tarbiyalanuvchilari oʻzlari uchun qadrdon boʻlib qolgan aziz maskan va sevimli “bogʻcha opalari” bilan xayrlashib, maktab taʼlimi sari ilk qadam qoʻydilar.

Muassasada boʻlib oʻtgan “Xayr, bogʻcha – salom, maktab!” mavzusidagi musiqiy tadbirda muassasa pedagog-xodimlari, ota-onalar va tarbiyalanuvchilar ishtirok etishdi.

Tadbirda bolajonlar oʻz qoʻllari bilan yasagan oʻyinchoqlar, chizgan rang-barang suratlar, turli koʻrik-tanlovlarda erishgan yutuqlari aks ettirilgan suratli albomlar namoyish etildi. Bolajonlar oʻzlari oʻrgangan kuy-qoʻshiqlarni ijro etishib, ona Vatan, doʻstlik va tinchlik, onajonlar, “bogʻcha opalar” haqida sheʼrlar aytib, raqslar ijro qilishdi.

Tadbir davomida bolajonlarga ota-onalari sovgʻalar berishib, farzandlarini aqlli va dono qilib tarbiyalagan tarbiyachi-pedagoglarga samimiy minnatdorchilik bildirdilar.

ROBIYa YOʻLDOShEVA.