Choykoʻl ovul fuqarolar yigʻini raisi saylovi oʻtkazildi

Mamlakatimizning barcha hududlarida boʻlgani kabi, Amudaryo tumanida ham fuqarolar yigʻini raisligiga saylov jarayonlari uyushqoqlik va oshkoralik asosida oʻtkazilmoqda. Umumiy hisobda mamlakat boʻyicha 9500dan ortiq fuqarolar yigʻini raisi saylanadi. Amudaryo tumani boʻyicha esa jami 49 ta fuqarolar yigʻinlarida saylovlar oʻtkazilmoqda. Ushbu saylovlarni oʻtkazish maqsadida fuqarolar yigʻini raisi saylovini tashkil etishga koʻmaklashuvchi tuman komissiya tuzilgan. Komissiya tarkibiga idora va tashkilotlar rahbarlari, deputatlar va jamoatchilik vakillari jalb etildi. Komissiya qaroriga asosan, saylovchilarning kamida 12 foizini qamrab olgan vakillar saylovlarda ishtirok etishi belgilangan. Xalq deputatlari tuman Kengashi qaroriga asosan saylovni tashkil etish va oʻtkazish boʻyicha maxsus tadbirlar rejasi tasdiqlangan.

Yaqinda Choykoʻl ovulida ham fuqarolar yigʻini raisi saylovi boʻlib oʻtdi. Hududdagi madaniyat markazi binosida oʻtkazilgan saylovda saylovchilar vakillarining 80 foizdan ortigʻi ishtirok etdi. Saylov jarayoni oshkoralik, tenglik va shaffoflik tamoyillari asosida yuqori saviyada tashkil etildi.

Mahalla raisi lavozimiga qoʻyilgan asosiy talablarga koʻra, nomzod Oʻzbekiston fuqarosi boʻlishi, oliy maʼlumotga ega boʻlishi, saylovgacha kamida 5-yil tegishli hududda doimiy yashagan, tashkilotchilik qobiliyatiga, davlat organlari, nodavlat notijorat tashkilotlari, tadbirkorlik yoki boshqa xoʻjalik faoliyati sohasida ish va hayotiy tajribaga hamda aholi orasida obroʻ-eʼtiborga ega shaxs boʻlishi shart.

Joylarda fuqarolar yigʻinlari qarori bilan saylovni oʻtkazish boʻyicha ishchi guruhlar tuzilgan boʻlib, ularning tarkibiga tegishli hududda joylashgan mahalla, nodavlat notijorat va boshqa tashkilotlarning vakillari, shuningdek tuman kengashi deputatlari kiritilgan. Ishchi guruhlar tegishli hududda doimiy yashovchi fuqarolarning fikrini inobatga olgan holda qonunda belgilangan muddatda rais lavozimiga nomzodlarni koʻrsatdilar.

Keyingi bosqichda esa tuman hokimi fuqarolar yigʻini raisi lavozimiga taqdim etilgan nomzodlarning hujjatlarini koʻrib chiqib, ishchi guruhlarga topshirish uchun ushbu nomzodlar boʻyicha oʻzining asoslantirilgan xulosalarini tegishli komissiyalarga yubordi.

Qayd etish joizki, Oʻzbekiston Respublikasi Konstitutsiyasida fuqarolarning oʻzini oʻzi boshqarish organlari davlat hokimiyati organlari tizimiga kirmasdan, mahalliy ahamiyatga molik masalalarni qonunga muvofiq ravishda mustaqil hal etishi belgilangan. Davlat esa mazkur organlar faoliyati uchun zarur shart-sharoitlarni yaratadi va ularga qonun bilan berilgan vakolatlarni amalga oshirishda koʻmaklashadi.

Fuqarolar yigʻini raisi saylovi “Fuqarolar yigʻini raisi saylovi toʻgʻrisida”gi Qonun asosida tartibga solinadi. Keyingi yillarda mazkur qonunga mahalla raislari saylovi tizimini takomillashtirishga qaratilgan bir qator oʻzgartish va qoʻshimchalar kiritilgan. Jumladan, qonunga kiritilgan oʻzgartishlarga asosan, fuqarolar yigʻini raisining vakolat muddati 3-yildan 5-yilga uzaytirildi. Shuningdek, boʻshab qolgan lavozim oʻrinlariga ham fuqarolar yigʻini raislari besh yil muddatga saylanishi belgilandi.

Choykoʻl ovul fuqarolar yigʻinidagi saylovda ishtirok etgan nomzodlar saylovchilarni oʻz dasturlari bilan tanishtirdi. Saylov jarayoni Oʻzbekiston Respublikasining “Fuqarolar yigʻini raisi saylovi toʻgʻrisida”gi Qonunining tegishli moddalariga muvofiq yashirin ovoz berish orqali oʻtkazildi.

Ovoz berish yakunlariga koʻra shu kungacha mazkur lavozimda ishlab kelayotgan Bekzod Aytekov saylovchilarning 91 foiz ovozini toʻplagan holda Choykoʻl ovul fuqarolar yigʻini raisi etib saylandi.

Ayni paytda tumanimizning boshqa ovul va mahalla fuqarolar yigʻinlarida ham fuqarolar yigʻini raisi saylovlari davom etmoqda.

Shohzod Qurbonboyev tayyorladi.