Ichimlik suvidan qonuniy va samarali foydalanish yuzasidan tumanda nazorat tadbirlari oʻtkazilyapti

Ichimlik suvi inson uchun eng zarur resurslaridan biri sanaladi. Bugungi kunda suv zaxiralarining kamayishi va talabning ortishi tufayli jahon hamjamiyati mazkur muammoga jiddiy eʼtibor qaratayotgani sir emas. Global iqlim oʻzgarishi, resurslardan samarasiz foydalanish, suv taqchilligi hamda noqonuniy ulanishlar ichimlik suvi bilan bogʻliq muammolarni yanada kuchaytirmoqda. Shu sababli mahalliy darajada ham suv resurslaridan oqilona va unumli foydalanish, shuningdek, hisob-kitob intizomini taʼminlash dolzarb vazifaga aylanmoqda.

Amudaryo tumanida aholini toza ichimlik suvi bilan barqaror va uzluksiz taʼminlash, mavjud infratuzilmani zamonaviylashtirish hamda suv yoʻqotilishini kamaytirishga qaratilgan keng qamrovli ishlar amalga oshirilmoqda. Ushbu yoʻnalishda xizmat sifati va masʼuliyatni oshirish, isteʼmolchilarda suvdan foydalanish madaniyatini shakllantirish ustuvor ahamiyat kasb etmoqda.

Tumandagi mavjud holat chuqur tahlil qilinib, tegishli idoralar tomonidan bir qator amaliy chora-tadbirlar belgilangan. Xususan, Qoraqalpogʻiston Respublikasi qurilish va uy-joy kommunal xoʻjaligi sohasida nazorat qilish hududiy inspektsiyasining ichimlik suvidan oqilona foydalanish va sotishni muvofiqlashtirish hamda oqova suv xizmatlaridan foydalanish boʻlimi mutaxassislari hamda “Qoraqalpoq suv taʼminoti” aktsiyadorlik jamiyatining Amudaryo tumani filiali xodimlari hamkorligida mahallalarda xonadonma-xonadon yurib, aholi bilan suhbatlar tashkil etilmoqda. Ushbu targʻibot ishlari aholini suvdan oqilona foydalanish, hisob-kitobda aniqlikni taʼminlash hamda toʻlov intizomini yuksaltirishga xizmat qilmoqda. Shu bilan birga, ular orqali suv tarmoqlariga noqonuniy ulanishlarni aniqlash va ularning oldini olish boʻyicha profilaktik choralar koʻrilmoqda.

Suv taʼminoti tarmoqlariga oʻzboshimchalik bilan ulanish, hisoblagichlarning plombalarini buzish yoki koʻrsatkichlarini soxtalashtirish kabi qoidabuzarliklar tizim samaradorligiga jiddiy ziyon yetkazadi, moliyaviy yoʻqotishlarga va noqonuniy isteʼmolga olib keladi. Shu sababli, Oʻzbekiston Respublikasi Maʼmuriy javobgarlik toʻgʻrisidagi Kodeksida bunday harakatlar uchun qatʼiy javobgarlik belgilangan. Jumladan, qonunbuzarlik holatlarida fuqarolarga bazaviy hisoblash miqdorining oʻn baravaridan oʻn besh baravarigacha, mansabdor shaxslarga esa oʻn besh baravaridan yigirma besh baravarigacha jarima qoʻllanilishi nazarda tutilgan. Bu kabi qonunbuzarliklar oqibatida butun tizimning ishonchliligi va samaradorligi izdan chiqadi, natijada halol toʻlov qiluvchi aholi ham bevosita jabr koʻradi.

Aholining huquqiy ongi va javobgarlik hissi ortgan sari, suv taʼminoti tizimidagi muammolar kamayib, uning samaradorligi oshib boradi. Bu esa nafaqat iqtisodiy barqarorlikni, balki ijtimoiy muvozanatni taʼminlashda ham muhim oʻrin tutadi.

Keskinlashib borayotgan iqlim oʻzgarishlari sharoitida suv resurslarini tejamli va oqilona boshqarish — bugungi kunning ustuvor talabi hisoblanadi. Bunday tizimli va maqsadli ishlar suvdan foydalanishda masʼuliyat va nazoratni mustahkamlab, keng koʻlamli ekologik barqarorlikni taʼminlashga xizmat qiladi.

Shohzod Qurbonboyev.