Ичимлик сувидан қонуний ва самарали фойдаланиш юзасидан туманда назорат тадбирлари ўтказиляпти
Ичимлик суви инсон учун энг зарур ресурсларидан бири саналади. Бугунги кунда сув захираларининг камайиши ва талабнинг ортиши туфайли жаҳон ҳамжамияти мазкур муаммога жиддий эътибор қаратаётгани сир эмас. Глобал иқлим ўзгариши, ресурслардан самарасиз фойдаланиш, сув тақчиллиги ҳамда ноқонуний уланишлар ичимлик суви билан боғлиқ муаммоларни янада кучайтирмоқда. Шу сабабли маҳаллий даражада ҳам сув ресурсларидан оқилона ва унумли фойдаланиш, шунингдек, ҳисоб-китоб интизомини таъминлаш долзарб вазифага айланмоқда.
Амударё туманида аҳолини тоза ичимлик суви билан барқарор ва узлуксиз таъминлаш, мавжуд инфратузилмани замонавийлаштириш ҳамда сув йўқотилишини камайтиришга қаратилган кенг қамровли ишлар амалга оширилмоқда. Ушбу йўналишда хизмат сифати ва масъулиятни ошириш, истеъмолчиларда сувдан фойдаланиш маданиятини шакллантириш устувор аҳамият касб этмоқда.
Тумандаги мавжуд ҳолат чуқур таҳлил қилиниб, тегишли идоралар томонидан бир қатор амалий чора-тадбирлар белгиланган. Хусусан, Қорақалпоғистон Республикаси қурилиш ва уй-жой коммунал хўжалиги соҳасида назорат қилиш ҳудудий инспекциясининг ичимлик сувидан оқилона фойдаланиш ва сотишни мувофиқлаштириш ҳамда оқова сув хизматларидан фойдаланиш бўлими мутахассислари ҳамда “Қорақалпоқ сув таъминоти” акциядорлик жамиятининг Амударё тумани филиали ходимлари ҳамкорлигида маҳаллаларда хонадонма-хонадон юриб, аҳоли билан суҳбатлар ташкил этилмоқда. Ушбу тарғибот ишлари аҳолини сувдан оқилона фойдаланиш, ҳисоб-китобда аниқликни таъминлаш ҳамда тўлов интизомини юксалтиришга хизмат қилмоқда. Шу билан бирга, улар орқали сув тармоқларига ноқонуний уланишларни аниқлаш ва уларнинг олдини олиш бўйича профилактик чоралар кўрилмоқда.
Сув таъминоти тармоқларига ўзбошимчалик билан уланиш, ҳисоблагичларнинг пломбаларини бузиш ёки кўрсаткичларини сохталаштириш каби қоидабузарликлар тизим самарадорлигига жиддий зиён етказади, молиявий йўқотишларга ва ноқонуний истеъмолга олиб келади. Шу сабабли, Ўзбекистон Республикаси Маъмурий жавобгарлик тўғрисидаги Кодексида бундай ҳаракатлар учун қатъий жавобгарлик белгиланган. Жумладан, қонунбузарлик ҳолатларида фуқароларга базавий ҳисоблаш миқдорининг ўн бараваридан ўн беш бараваригача, мансабдор шахсларга эса ўн беш бараваридан йигирма беш бараваригача жарима қўлланилиши назарда тутилган. Бу каби қонунбузарликлар оқибатида бутун тизимнинг ишончлилиги ва самарадорлиги издан чиқади, натижада ҳалол тўлов қилувчи аҳоли ҳам бевосита жабр кўради.
Аҳолининг ҳуқуқий онги ва жавобгарлик ҳисси ортган сари, сув таъминоти тизимидаги муаммолар камайиб, унинг самарадорлиги ошиб боради. Бу эса нафақат иқтисодий барқарорликни, балки ижтимоий мувозанатни таъминлашда ҳам муҳим ўрин тутади.
Кескинлашиб бораётган иқлим ўзгаришлари шароитида сув ресурсларини тежамли ва оқилона бошқариш — бугунги куннинг устувор талаби ҳисобланади. Бундай тизимли ва мақсадли ишлар сувдан фойдаланишда масъулият ва назоратни мустаҳкамлаб, кенг кўламли экологик барқарорликни таъминлашга хизмат қилади.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
