Fidoyi ustoz xizmatlari munosib eʼtirof etildi
Yurtimizda oʻz umri davomida yosh avlod tarbiyasi, mamlakat ravnaqi yoʻlida vijdonan, halol mehnat qilayotgan insonlar koʻp. Davlatimiz va jamiyat tomonidan bunday fidoyi shaxslarning xizmatlari doimiy ravishda eʼtirof etilib kelinmoqda.
Amudaryo tumani Maktabgacha va maktab taʼlimi boʻlimi tasarrufidagi 29-sonli umumtaʼlim maktabida faoliyat yuritayotgan chaqiruvga qadar boshlangʻich tayyorgarlik fani oʻqituvchisi Turgʻanboy aka Yeshmuratov ham Ana shunday fidoyi insonlardan sanaladi. Yaqinda Turgʻanboy aka Yeshmuratovning koʻp yillik faoliyati “Veteran” jangchi-faxriy nogironlar birlashmasi tomonidan yuqori baholanib, “Yoshlarni vatanparvarlik ruhida tarbiyalash uchun” medali bilan taqdirlandi. Bu mukofot yosh avlod tarbiyasida jonkuyarlik koʻrsatgan fidoyi ustoz xizmatlarining yorqin eʼtirofi boʻldi. Mukofotni topshirish tadbirida Oʻzbekiston “Veteran” jangchi-faxriy nogironlar birlashmasi Qoraqalpogʻiston Respublikasi boʻlimi Amudaryo tumani vakili B. Jumaniyozov hamda uyushma aʼzosi O. Xujaniyozovlar ishtirok etdilar.
Turgʻanboy Yeshmuratov 2002-yildan buyon ushbu taʼlim dargohida mehnat qilyapti. 2020-yildan esa chaqiruvga qadar boshlangʻich tayyorgarlik fani oʻqituvchisi sifatida ishlab kelmoqda. U oʻz faoliyati orqali oʻquvchilarga Vatanga muhabbat, intizom, jasorat va masʼuliyat tuygʻularini singdirishga alohida eʼtibor qaratmoqda.
Ustozning oddiy, biroq juda sharafli mehnati yillar davomida oʻz samarasini berib, munosib ravishda yuksak mukofot bilan qadrlandi. Bu eʼtirof — nafaqat ustozning fidokorona mehnatiga berilgan baho, balki uning qoʻl ostida tarbiyalanayotgan oʻquvchilar uchun ham katta ilhom manbaidir.
Turgʻanboy aka nafaqat oʻqituvchi, balki yoshlar uchun hayot saboqlarini oʻrgatuvchi, haqiqiy insonparvar tarbiyachidir. Uning mehnati, fidoyiligi va tarbiyaviy taʼsiri koʻplab oʻquvchilar qalbida Vatanga muhabbat tuygʻusini uygʻotmoqda.
Bugun biz ana shunday fidoyi insonlar borligidan faxrlanamiz. Chunki mehnat qadrlangan jamiyatda fidoyilar yanada koʻpayadi.
Sevinch Oʻmirboyeva, Oʻzbekiston jahon tillari universiteti talabasi, tahririyat amaliyotchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
